ប្រជាជនប្រទេសកម្ពុជាកំពុងជំរុញឱ្យធ្វើពហិកាផលិតផលនឹងសេវាកម្មថៃ ខណៈដែលភាពតានតឹងនៅតាមព្រំដែនរវាងប្រទេសទាំងពីរ កាន់តែក្តៅគគុក បន្ទាប់ពីកិច្ចព្រមព្រៀងបទឈប់បាញ់ដែលបង្ករជាបញ្ហាប្រឈមសម្រាប់ក្រុមហ៊ុនថៃ ដែលបានពង្រីកទីផ្សារនៅប្រទេសជិតខាង។
នីគីអេស៊ា(Nikkei Asia) បានឱ្យដឹងនៅថ្ងៃទី១៥ ខែសីហា ឆ្នាំ២០២៥នេះថា ប្រជាជនកម្ពុជារាប់ពាន់នាក់ នៅលើបណ្តាញសង្គម អំពាវនាវឱ្យម៉ាកយីហោនៅក្នុងស្រុកខ្មែរជំនួសអាជីវកម្ម និងសិទ្ធិផ្តាច់មុខរបស់ថៃ។ ពីស្ថាននីយ៍ឥន្ធនៈរហូតដល់ហាងកាហ្វេ ស្លាកយីហោថៃត្រូវបានដកចេញ ហើយស្លាកយីហោត្រូវបានបិទបាំងពាសពេញក្រុងភ្នំពេញ ខណៈដែលម្ចាស់អាជីវកម្មប្រញាប់ប្រញាលសម្របតាមអារម្មណ៍ និងតាមទស្សនៈរបស់សាធារណជនក្នុងស្រុក។
ប្រភពគូសបញ្ជាក់ថា ក្នុងចំណោមក្រុមហ៊ុនថៃដែលរងផលប៉ះពាល់ គឺប្រេងឥន្ធនៈភីធីធី(PTT) នេះបើផ្អែកតាមរបាយការណ៍ផ្សព្វផ្សាយក្នុងស្រុក ដែលមានស្ថានីយប្រេងចំនួន១៨៦ នៅប្រទេសកម្ពុជា។
ជាមួយគ្នានេះដែរ បន្ទាប់ពីការប្រយុទ្ធដ៏ក្តៅគគុករយៈពេល ៥ថ្ងៃ ដែលបានសម្លាប់មនុស្សយ៉ាងហោច ៤៣ នាក់ នៅក្នុងប្រទេសអាស៊ីអាគ្នេយ៍ ប្រទេសទាំងពីរ បានឈានដល់បទឈប់បាញ់កាលពីចុងខែមុន ដែលសម្របសម្រួលដោយប្រទេសម៉ាឡេស៊ី ដែលមានការគាំទ្រពីសហរដ្ឋអាមេរិក និងចិន។
បន្ថែមពីនេះ កាលពីសប្តាហ៍មុន ពួកគេអនុញ្ញាតឱ្យក្រុមអាស៊ាន(ASEAN) ត្រួតពិនិត្យបទឈប់បាញ់ ប៉ុន្តែយ៉ាងណាក៏ដោយ ការចោទប្រកាន់នៅតែបន្តកើតមានពីភាគីទាំងសងខាង ជុំវិញការរំលោភបំពាន ហើយអ្នកជំនាញនិយាយថា ឫសគល់នៃជម្លោះហាក់បីនៅឆ្ងាយពីការដោះស្រាយ។
លើសពីនេះ ការបន្តកើនឡើងតាមប្រព័ន្ធឌីជីថលអ៊ីនធឺណិតក្នុងចំណោមអ្នកនិយមលេងអ៊ីនធឺណិត គឺជាលក្ខណៈសំខាន់នៃជម្លោះ ខណៈដែលយុទ្ធនាការនិងនិន្នាការដូចជា‘‘ខ្មែរស្រឡាញ់ខ្មែរ’’ និង ‘‘ពហិការផលិតផលថៃ’’នៅតែបន្តទទួលបានភាពទាក់ទាញខ្លាំង។
លោក ទៀ ស្យាម ដែលជាម្ចាស់ក្រុមហ៊ុនលក់ផ្តាច់មុខរបស់ភីធីធី(PTT) និងជាប្អូនប្រុសរបស់រដ្ឋមន្ត្រីក្រសួងការពារជាតិកម្ពុជា លោក ទៀ សីហា កំពុងតែដឹកនាំប្តូរឈ្មោះ‘‘ស្ថានីយ៍ប្រេងឥន្ធនៈភីធីធី (PTT)ទូទាំងប្រទេស’’ទៅជាក្រុមហ៊ុន ‘‘ខ្មែរ សន្តិភាព ប្រេងឥន្ធនៈ កម្ពុជា’’ ដែលជាកម្មសិទ្ធិរបស់ខ្មែរ។
ដោយឡែក អ្នកស្រាវជ្រាវសេដ្ឋកិច្ចនៃវិទ្យាស្ថានធនធានអភិវឌ្ឍន៍កម្ពុជា លោក និត កុសល បានប្រាប់ទៅ Nikkei Asiaថា លោកមានមន្ទិលសង្ស័យថា តើកម្ពុជាពិតជាអាចកាត់ថៃចេញពីសង្វាក់ផ្គត់ផ្គង់របស់ខ្លួនឬយ៉ាងណា?៕
