បន្ទាប់ពីកើតទុក្ខមិនសុខចិត្តរឿងទាហានរបស់ខ្លួន ដើរជាន់មីនសល់ពីសង្គ្រាមចាស់ នៅលើទឹកដីកម្ពុជា និងបាញ់ជំពាមកៅស៊ូមកលើកងទ័ពខ្មែរ ក្រោយពីមានបទឈប់បាញ់ ដែលសម្របសម្រួលដោយសហគមន៍អន្តរជាតិ ពេលនេះទាហានថៃបានដើរពង្រាយបន្លាលួសពាសវាលពាសកាល នៅតាមព្រំដែនកម្ពុជា រហូតដោយទៅជាមួយទាំងដីធ្លី និងផ្ទះសម្បែងរបស់ពលរដ្ឋខ្មែរ ដែលស្ថិតក្នុងបូរណភាពរបស់កម្ពុជា និងមានពលរដ្ឋបានរស់នៅតជំនាន់ទៅហើយនោះ អស់ជាច្រើនកន្លែងទៀតផង។
ម្ចាស់គណនីហ្វេសប៊ុក ឈ្មោះ វីតា ដែលត្រូវបានទាហានថៃ ព័ទ្ធបន្លាលួសយកផ្ទះ និងឃ្លាំងស្កុកទំនិញ ឃុំអូរបីជាន់ ស្រុកអូរជ្រៅ បានបង្ហោះវីដេអូ នៅថ្ងៃទី១៥ ខែសីហា ដោយរៀបរាប់ថា មកដល់ពេលនេះ ទាហានថៃ នៅមិនទាន់រើបន្លាលួសចេញពីផ្ទះរបស់ពលរដ្ឋខ្មែរនៅឡើយទេ ប៉ុន្តែទាហានថៃបានប្រាប់ទៅពលរដ្ឋខ្មែរ ដែលជាម្ចាស់ផ្ទះឱ្យចូលទៅរស់នៅបណ្ដោះអាសន្នបាន។
ទោះយ៉ាងណា ពលរដ្ឋខ្មែរ លើកឡើងថា ពួកគាត់នឹងមិនធ្វើតាមសម្ដីរបស់យោធាថៃនោះឡើង ព្រោះពួកគាត់មិនទុកចិត្ត ដោយពួកគាត់សុខចិត្តចងសំពត់កៅស៊ូដេកនៅក្បែរបន្លាលួសដែលយោធាថៃ បានដាក់ពង្រាយ ដើម្បីរង់ចាំកិច្ចអន្តរាគមន៍របស់រដ្ឋាភិបាលកម្ពុជា និងអន្តរជាតិ។ ពលរដ្ឋបានអះអាងថា បន្លាលួសនេះ យោធាថៃជាអ្នកដាក់ពង្រាយ ដូច្នេះយោធាថៃ គឺជាអ្នកដកបន្លាលួសនេះដោយខ្លួនឯងវិញ។
គាត់បាននិយាយថា៖ «ខ្ញុំចង់ឱ្យបងប្អូនទាំង ៣ពាន់នាក់ ធ្វើជាសាក្សីទាំងអស់គ្នាថា ចោរសៀមបានបំពានយកដីផ្ទះរបស់ឪពុកម្ដាយខ្ញុំ។ អ្វីដែលខ្ញុំជាពលរដ្ឋខ្មែរធម្មតាចង់បាន គឺប្រគល់អ្វីដែលជាសិទ្ធិរបស់ឈាមខ្មែរមកវិញ មិនមែនជាដីរបស់តាយាយអ្នកឯងបន្សល់ទុកទេ»។
កាលពីថ្ងៃទី១៣ ខែសីហា ទាហានថៃបានរាយបន្លាលួសរំលោភយកដីខ្មែរ ដោយហ៊ុំព័ទ្ធយកផ្ទះពលរដ្ឋខ្មែរ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ពលរដ្ឋអះអាងថា មុននឹងទាហានថៃ បានមកដាក់ពង្រាយបន្លាលួស និងសំបកកង់ឡាន ពួកគាត់ឃើញមានទាហានថៃមួយក្រុម ដែលមានគ្នាប្រហែលជាង ៤០នាក់ មានអាកប្បកិរិយាប្លែកៗ ក្នុងនោះមានទាហានថៃមួយចំនួន បានចូលមកទឹកដីកម្ពុជាដោយឆៅៗ និងដើររាវមីននៅកណ្ដាលផ្លូវយ៉ាងចម្លែក ស្រាប់តែក្រោយមកមានទាហានឈុតខ្មៅថៃ ផ្សេងទៀត បានមកបណ្ដេញពលរដ្ឋខ្មែរ ចេញពីផ្ទះទាំងកម្រោល ដោយមិនទុកពេលឱ្យពួកគាត់បានរើឥវ៉ាន់ និងរបស់របរយកទៅជាមួយនោះឡើយ។
កាន់តែធ្ងន់ធ្ងរជាងនេះ ទាហានថៃបានវាយកម្ទេចប៉ុស្តិ៍ប្រចាំការ និងផ្ទះរបស់ពលរដ្ឋខ្មែរអស់មួយចំនួនថែមទៀតផង។ ទង្វើរបស់កងទ័ពថៃនេះ បានធ្វើឱ្យពលរដ្ឋខ្មែរ ដែលជាម្ចាស់ផ្ទះ រួមមានជនពិការ និងមនុស្សចាស់ផងនោះ បានស្រក់ទឹកភ្នែកដោយសារស្ដាយស្រណោះផ្ទះសម្បែងរបស់ពួកគាត់ និងឈឺចាប់នឹងទង្វើឈ្លានពានរបស់យោធាថៃ មកលើបូរណៈភាពទឹកដីកម្ពុជា។ ពលរដ្ឋខ្មែរបានអះអាងថា ពួកគាត់បាននិងកំពុងរស់នៅតំបន់ភូមិព្រៃចាន់នេះ អស់ជាច្រើនជំនាន់មកហើយ ក៏ប៉ុន្តែចាប់តាំងពីក្រោយសម័យរំដោះចេញពីរបបខ្មែរក្រហមមក យោធាថៃ បានបង្ខិតព្រំដែន ដោយបានរុញឱ្យពលរដ្ឋខ្មែរ ចូលទៅក្នុងឆ្ងាយពីព្រំដែនចាស់អស់ជាច្រើនរយម៉ែត្រ។
ងាកមកមើលតំបន់ច្រកបឹងត្រកួន ក្នុងឃុំគោករមៀត ស្រុកថ្មពួក វិញ ក្រុមយោធាថៃ បានត្រៀមរាយបន្លាលួសព័ទ្ធផ្ទះពលរដ្ឋខ្មែរបន្ថែមទៀត ក៏ប៉ុន្តែត្រូវពលរដ្ឋជាច្រើននាក់ លើកគ្នាមកយាមតាមបន្ទាត់ព្រំដែនចាំតវ៉ាប្រឆាំង បើយោធាថៃហ៊ានចូលមករាយបន្លាលួសនៅក្បែរច្រកទ្វារបឹងត្រកួននេះ។ ពលរដ្ឋខ្មែរ បានប្រាប់ទៅកាន់ក្រុមទាហានថៃ ដែលបំពាក់ដោយអាវុធនៅក្នុងដៃថា ទោះបីជាត្រូវស្លាប់ ក៏ពួកគាត់មិនឱ្យយោធាថៃ ចូលមករាយបន្លាលួសក្នុងដីរបស់កម្ពុជាបានដាច់ខាត។
យុទ្ធនាការរាយបន្លាលួសរបស់យោធាថៃនេះ ធ្វើឡើងបន្ទាប់ពីមានការប៉ះទង្គិចគ្នាដោយអាវុធ រវាងកងទ័ពកម្ពុជានិងថៃ មានរយៈពេល៥ថ្ងៃ គឺចាប់ពីថ្ងៃទី២៤ ដល់ម៉ោង ១២យប់ ថ្ងៃទី២៨ ខែកក្កដា ឆ្នាំ២០២៥ នៅតំបន់ព្រំដែន ក្នុងខេត្តព្រះវិហារ ឧត្តរមានជ័យ និងពោធិ៍សាត់។ វិវាទនេះ បានស្ងប់ស្ងាត់ទៅវិញ បន្ទាប់ពីមានការសម្របសម្រួលពីប្រធានប្ដូរវេនអាស៊ាន គឺប្រទេសឥណ្ឌូនេស៊ី និងសហរដ្ឋអាមេរិក ដោយបង្កើតឱ្យមានកិច្ចព្រមព្រៀងបទឈប់បាញ់។
ទោះជាបែបនេះក្ដី យោធាថៃមិនបានអនុវត្តកិច្ចព្រមព្រៀងនេះ ឱ្យបានពេញលេញនោះឡើយ ដោយយោធាថៃ បានបង្កអារិយភាពមកលើកងទ័ពកម្ពុជា ក្រោមរូបភាពផ្សេងៗជាច្រើនលើក ខណៈកងទ័ពកម្ពុជា នៅតែរក្សាភាពអត់ធ្មត់ និងអនុវត្តកិច្ចព្រមព្រៀងបទឈប់បាញ់ បានយ៉ាងពេញលេញ។
ជាក់ស្ដែង ក្រោយការប្រកាសបទឈប់បាញ់ បានប្រហែល ៨ម៉ោង យោធាថៃបានប្រើប្រាស់ឧបាយកល ចាប់ទាហានខ្មែរចំនួន ២០នាក់ និងដោះលែងវិញចំនួន ២នាក់ ក្នុងសភាពពិការ និងវង្វែងស្មារតី។ ក្រោយមកទៀត ក្រុមយោធាថៃ បានបាញ់ជំពាមកៅស៊ូ មកលើទាហានខ្មែរ ជាច្រើនថ្ងៃ ហើយចុងក្រោយយោធាថៃ បានលេងក្បាច់ពិសេស ដោយប្រើប្រាស់កងកម្លាំងប្រដាប់អាវុធ និងគ្រឿងចក្រធន់ធ្ងន់ ដើរដាក់ពង្រាយបន្លាលួស និងសំបកកង់ឡានចូលមកលើទឹកដីកម្ពុជា នៅតំបន់អានសេះ ប្រាសាទតាមាន់ធំ និងច្រកបឹងត្រកួន ទោះបីមានការហាមឃាត់យ៉ាងខ្លាំងពីសំណាក់កងកម្លាំងរបស់កម្ពុជាយ៉ាងណាក៏ដោយ។
ទាក់ទិននឹងការរាយបន្លាលួសរបស់ក្រុមយោធាថៃនេះ ក្រុមអ្នកសង្កេតការណ៍អន្តរកាល (IOT) ចំនួន៧ប្រទេស ដឹកនាំដោយអនុព័ន្ធយោធាម៉ាឡេស៊ី ចុះទៅដល់ទីតាំងដែលទាហានថៃបានរាយបន្លាលួសព័ទ្ធផ្ទះអ្នកភូមិហើយនិងតំបន់ផ្សេងទៀត ដើម្បីពិនិត្យមើលសភាពការណ៍ព្រំដែនជាក់ស្តែង។ ចំណែកគណៈកម្មាធិការចម្រុះខណ្ឌសីមាព្រំដែនគោកកម្ពុជា JBC បានធ្វើការតវ៉ា និងប្រឆាំងដាច់អហង្ការចំពោះសកម្មភាពរំលោភបំពានរបស់យោធាថៃនេះ។
យ៉ាងណាក៏ដោយចុះ យុទ្ធនាការរាយបន្លាលួស និងសំបកកង់ឡានរបស់យោធាថៃនេះ មិនត្រូវបានស្ថាប័នសារព័ត៌មានល្បីៗរបស់ថៃ ចុះមកធ្វើសេចក្ដីរាយការណ៍ និងផ្សព្វផ្សាយនោះទេ ដោយទំនងពួកគេហាក់ដឹងច្បាស់ និងទទួលស្គាល់ អំពីការឈ្លានពានរបស់ក្រុមយោធារបស់ខ្លួន។
ពាក់ព័ន្ធរឿងនេះ អតីតសាស្រ្តចារ្យ និងជាអតីតមេធាវីការពារក្តីឲ្យមេដឹកនាំខ្មែរក្រហម ក្នុងអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) លោក កង ឫទ្ធិគិរី ប្រាប់វីអូឌីតាមបណ្ដាញតេឡេក្រាមថា ករណីនេះ គឺជាកាតព្វកិច្ចរបស់រាជរដ្ឋាភិបាលកម្ពុជា ក្នុងកិច្ចការពារអធិបតេយ្យភាពរបស់ខ្លួន។ លោកបន្តថា កម្ពុជាមិនចាំបាច់មានការជូនដំណឹងពីប្រជាពលរដ្ឋ ចំពោះការរំលោភបំពានណាមួយពីរដ្ឋបរទេសនោះទេ គឺមានចែងក្នុងរដ្ឋធម្មនុញ្ញកម្ពុជាយើង ហើយសកម្មភាពថៃវារំលោភលើធម្មនុញ្ញសហប្រជាជាតិ ដែលហាមប្រាមរដ្ឋជាសមាជិកប្រើកម្លាំងដោះស្រាយបញ្ហា និងត្រូវគោរពអធិបតេយ្យភាពគ្នាទៅវិញទៅមក។
លោក កង ឫទ្ធិគិរី បន្ថែមថា រដ្ឋាភិបាលកម្ពុជា កំពុងព្យាយាមដោះស្រាយបញ្ហានេះ ដោយសន្តិវិធី ស្របតាមធម្មនុញ្ញសហប្រជាជាតិ ដោយនាំអ្នកអង្កេតការណ៍អន្តរជាតិចុះទៅពិនិត្យផ្ទាល់ តាមព្រំដែនកម្ពុជា-ថៃហើយ និងកន្លែងខ្លះថៃក៏ដកកងទ័ពថយក្រោយវិញផងដែរ ព្រោះលោកកត់សម្គាល់ឃើញថា ថៃជារដ្ឋប្រើកម្លាំងរំលោភច្បាប់អន្តរជាតិទាំងស្រុង។
ប្រជាពលរដ្ឋរស់នៅច្រកបឹងត្រកួន ខេត្តបន្ទាយមានជ័យ បង្ហាញក្តីបារម្ភ ក្រោយថៃនៅតែបន្តរាយបន្លាលួសចូលដល់ជិតលំនៅឋានរបស់ពួកគាត់ និងសូមអំពាវនាវឱ្យអង្គការសហប្រជាជាតិ ជួយអន្តរាគមន៍ជួយប្រទេសកម្ពុជា ពីការឈ្លានពានរបស់យោធាថៃ៕
