ក្រោយពីប្រជាពលរដ្ឋជាច្រើននៅឃុំអូរបីជាន់ ខេត្តបន្ទាយមានជ័យ ទទូចរកការជួយទប់ស្កាត់ការឈ្លានពានរបស់ថៃ ដែលយោធាថៃ បានរាយលួសបន្លាព័ទ្ធយកផ្ទៈរបស់ពួកគេនោះ រដ្ឋាភិបាលបានអំពាវនាវឱ្យមានការអត់ធ្មត់ ដោយថា កុំធ្លាក់ក្នុងកលល្បិចរបស់ថៃ។
ការណ៍នេះ ជំរុញឱ្យមានការស្តីបន្ទោសថា ជាការបរាជ័យធ្ងន់ធ្ងររបស់មេដឹកនំាំបក្សកាន់អំណាច ដែលមិនអាចការពារប្រជាពលរដ្ឋ និងបូរណភាពទឹកដីរបស់ខ្លួនបាន។
ជុំវិញបញ្ហានេះ អ្នកប្រើប្រាស់បណ្តាញសង្គមហ្វេសប៊ុក ឈ្មោះថា បញ្ញា ស៊ុច កាលពីថ្ងៃទី១៣ ខែសីហានេះ បានបង្ហោះវីដេអូ ដោយរៀបរាប់ថា ទាហានថៃបានពង្រីកការរាយលួសបន្លាព័ទ្ធផ្ទះពលរដ្ឋខ្មែរនៅទីតាំងភូមិតំបន់៥ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ប្រភពអះអាងថា សូម្បីតែផ្ទះអតីតមេភូមិចាស់ ក៏ត្រូវបានចោរសៀមហ៊ុំព័ទ្ទរំលោភយកផងដែរ ខណៈប៉ុស្តិ៍បន្ទាយទាហានខ្មែរជាង ៣០០ម៉ែត្រ ក៏ត្រូវចោរសៀមបំផ្លាញនិងរំលោភយកទាំងកម្រោលដូចគ្នា។
លោកថា៖ «ភូមិតំបន់៥នៅថ្ងៃទី១៣ ខែសីហា ២០២៥ នៅវេលាម៉ោង១៦:៤៦នាទីនេះត្រូវពួកចោរសៀមមកហ៊ុមព័ទ្ធយកទឹកដីខ្មែរនៅភូមិតំបន់៥ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បាទនោះអតីតផ្ទះមេភូមិចាស់ វាហ៊ុមព័ទ្ធយកបាត់ហើយ គឺយោធាថៃយកដីមេភូមិចាស់គេហ៊ុមព័ទ្ធដីផ្ទះប្រជាពលរដ្ឋយើងនោះ ហើយបន្ទាយទាហានខ្មែរយើង នៅខាងមុខប្រហែល២០០ម៉ែត្រ ទៅ៣០០ម៉ែត្រឥឡូវវាហ៊ុមព័ទ្ធសឹងពាក់កណ្តាលភូមិតំបន់៥ ពួកចោរសៀមប្លន់ដីខ្មែរយើងអស់ហើយ»។
បន្ថែមពីនេះ អ្នកប្រើប្រាស់បណ្តាញសង្គមម្នាក់ទៀត បានបង្ហោះវីដេអូ ពីទុក្ខលំបាករបស់ពលរដ្ឋដែលស្រែកយំទាមទារដីនិងផ្ទះត្រឡប់មកវិញ ក្រោយចោរសៀមរាយបន្លាលួសព័ទ្ធយកដីផ្ទះរបស់ពួកគេ។
ប្រភពបន្តថា ពលរដ្ឋខ្មែរបានស្រែកយំ ទាមទារនិងស្នើដល់រាជរដ្ឋាភិបាលកម្ពុជា ជួយពន្លឿនដោះស្រាយបញ្ហានេះជូនពួកគាត់ឱ្យបានឆាប់ ព្រោះពួកគាត់មិនមានផ្ទះសម្បែងដើម្បីជ្រកកោណនោះទេ។
អ្នកស្រីថា៖ «ខ្ញុំរស់នៅ២០-៣០ឆ្នាំហើយ ខ្ញុំសុំដីផ្ទះខ្ញុំនៅវិញមក ផ្ទះខ្ញុំនៅទីនេះ ថៃវាព័ទ្ធបន្លាលួសយកអស់ហើយ ខ្ញុំសុំចូលនៅផ្ទះខ្ញុំវិញមកៗ ខ្ញុំសុំអង្វរខ្ញុំអត់មានដីនៅទេ អស់លោកសុំជួយខ្ញុំផងដែរ»។
ជាការឆ្លើយតប អ្នកនាំពាក្យរដ្ឋាភិបាលកម្ពុជា លោក ប៉ែន បូណា ថ្លែងក្នុងសិន្នសីទកាសែតនាថ្ងៃទី១៥ខែសីហានេះ អំពាវនាវឱ្យពលរដ្ឋខ្មែរមានការអត់ធ្មត់ ព្រោះការអត់ធ្មត់ជាគន្លឹះសំខាន់បំផុត ក្នុងការអនុវត្តបទឈប់បាញ់។
លោកបន្តថា បើសិនកម្ពុជាអស់ការអត់ធ្មត់ កម្ពុជានឹងក្លាយជាអ្នកបង្កហេតុ ហេតុនេះកម្ពុជាត្រូវតែប្រយ័ត្ន ហើយនេះជាអ្វីដែលភាគីថៃចង់បានបំផុត។
លោកថា៖ «បងប្អូនយើងតែងយល់ថា បើសិនជាយើងអស់ការអត់ធ្មត់ យើងនឹងក្លាយខ្លួនមួយរំពេចទៅជាអ្នកបង្កហេតុ ដូច្នេះដំណាក់កាលនេះ ម៉ោងនេះការអត់ធ្មត់ គឺជាភាពខ្លាំងនិងពីឈ្នះរបស់កម្ពុជា»។
លើសពីនេះ អ្នកនាំពាក្យក្រសួងការពារបរទេសកម្ពុជា លោក ជុំ សន្ទរី និយាយថា ការលុកលុយលើដែនអធិបតេយ្យកម្ពុជានេះ កម្ពុជាបានប្តឹងតវ៉ាតាមយន្តការការទូត ប្រឆាំងនឹងការរំលោភបំពានរបស់ថៃ និងទាមទារឱ្យថៃគោរពបទឈប់បាញ់ ច្បាប់អន្តរជាតិ និងដកកងកម្លាំងចេញពីដែនដីកម្ពុជា។
លោកថា៖ «សកម្មភាពទាំងនេះ បានបង្ខំឲ្យប្រជាពលរដ្ឋកម្ពុជា ផ្លាស់ប្ដូរទីលំនៅធ្វើឲ្យពួកគេបាត់បង់លំនៅឋាន ហើយទាំងជីវភាពរស់នៅដែលជាការរំលោភបំពានទៅលើសិទ្ធិជាមូលដ្ឋានរបស់គេ ទីតាំងដែលបានលើកឡើងខាងលើ គឺស្ថិតនៅក្នុងទឹកដីរបស់កម្ពុជាដូចដែលបានកំណត់ដោយផែនទីមាត្រដ្ឋាន១/២០០០០នៅក្រោមអនុសញ្ញាឆ្នាំ១៩០៤ និងសន្ធិសញ្ញាឆ្នាំ១៩០៧ រវាងឥណ្ឌូចិននិងសៀម»។
ជុំវិញបញ្ហានេះ តំណាងរាស្រ្តបក្សសង្គ្រោះជាតិ លោក សួន សូរីដា ប្រាប់VODនៅថ្ងៃទី១៥ ខែសីហានេះថា ភាពអត់ធ្មត់ មិនមែនជាកត្តាជោគជ័យសម្រាប់កម្ពុជា ក្នុងការទប់ទល់នឹងសត្រូវឈ្លានពាននោះទេ។
ក្នុងន័យនេះ លោកពន្យល់ថា ការអត់ធ្មត់ជាសត្រូវពេក និងធ្វើឱ្យសត្រូវបានចិត្ត គឺបន្តគឃ្លើនឈ្លានពានទឹកដីខ្មែរ ធ្វើបាបពលរដ្ឋខ្មែរហ៊ុំព័ទ្ធយកដីផ្ទះពួកគាត់ជាបន្តបន្ទាន់ គឺធ្វើឱ្យរាស្រ្តរងទុក្ខទៅវិញទេ។
លោកបន្តថា ក្នុងកាលៈទេសៈនេះ កម្ពុជាមិនអាចចេះតែអត់ធ្មត់ ឱ្យសត្រូវបន្តគឃ្លើនឈ្លានពានទឹកដីនោះទេ ត្រូវមានចំណាក់ការចំពោះមុខគឺរារាំង ទប់ទល់ និងរុះរើរួសបន្លារបស់ភាគីថៃចេញពីទឹកដីខ្មែរ។
លោកសង្កត់ធ្ងន់ថា បទឈប់បាញ់ និងយន្តការអន្តរជាតិ ច្បាប់អន្តរជាតិនានា កម្ពុជាគោរព អនុវត្ត តែកម្ពុជាក៏មានសិទ្ធិផងដែរ គឺច្បាប់សិទ្ធិស្វ័យការពារដែនអធិបតេយ្យ បូរណភាពទឹកដីរបស់ខ្លួន។
លោកថា៖ «ខ្ញុំគិតថា ភាពអត់ធ្មត់ វាមិនមែនជាកត្តាជោគជ័យនៅលើភាពឈ្នះទេ ព្រោះជាក់ស្ដែងដូចក្នុងសង្គ្រាមភាពឈ្នះចាញ់វាលើការកាន់កាប់ទឹកដីដែលភាគីម្ខាងៗដណ្តើមបាន ប្រសិនបើភាគីថៃចូលមកកាន់កាប់យកទឹកដីរបស់កម្ពុជាស្រេចតែចិត្ត ហើយមិនបានការប្រើប្រាស់កាំភ្លើង សូម្បីតែមួយគ្រាប់ឲ្យកាន់កាប់ទឹកដីខ្មែរបានអាហ្នឹងអី ខ្ញុំគិតថា ភាគីថៃទទួលបានជោគជ័យ»។
ប្រហែលគ្នានេះដែរ អ្នកច្បាប់និងជាអ្នកវិភាគឯករាជ្យ លោក វន់ ចាន់ឡូត យល់ថា ភាពអត់ធ្មត់របស់កម្ពុជាហាក់ឆ្លុះបញ្ចាំងពីភាពបរាជ័យ ចាញ់ប្រៀបយោធាថៃ ខណៈថៃបន្តឈ្លានពានទឹកដីកម្ពុជារហូត។
ក្នុងន័យនេះ លោកថា កម្ពុជាចាញ់ប្រៀបថៃនៅត្រង់ថា ទី១ថៃមិនគោរពបទឈប់បាញ់ ជាក់ស្តែងថ្ងៃទី២៩ ខែកក្កដា ចូលចាប់ទាហានខ្មែរ២០នាក់ក្នុងទឹកដីខ្មែរ យកធ្វើជាចំណាប់ខ្មាំងរហូតមកពេលបច្ចុប្បន្ន។
ទី២ ថៃបន្តគឃ្លើនរាយបន្លាលួស ធ្វើលេណដ្ឋាននៅលើប្រាសាទតាមាន់ធំ ច្រកអានសេះ និងថ្មីៗនេះ ថៃបានរាយលួសបន្លាព័ទ្ធដី និងផ្ទះពលរដ្ឋខ្មែរជាច្រើនកន្លែងនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យទៀត។
លោកបន្តថា ទាំងនេះស្តែងឱ្យឃើញថា ភាពអត់ធ្មត់របស់កម្ពុជា ដែលមិនធ្វើសកម្មភាពតទល់ រារាំង ហាមឃាត់ទាំងនេះហើយ ជាឳកាសរបស់ចោរសៀមបន្តគឃ្លើនឈ្លានពានទឹកដី និងធ្វើបាបរាស្រ្តខ្មែរ។
លោកថា៖ «អ្វីដែលយោធាថៃបាននិងកំពុងតែបន្តភាពគឃ្លើនរបស់ខ្លួន ក្រោយមានបទឈប់បាញ់នេះប្រាកដណាស់ គឺមាននូវថាយុទ្ធសាស្ត្រច្បាស់លាស់យុទ្ធសាស្ត្រទី១ យោធាថៃក៏កំពុងតែសិក្សាលម្អិតទៅនឹងទីតាំងភូមិសាស្ត្រ ក្នុងករណីដែលយោធាថៃសម្រេចចិត្តបើកការវាយប្រហារលើកទីពីរឡើងវិញ គឺត្រូវប្រាកដថានឹងអាចវាយដណ្តើមនៅទីតាំងសមរភូមិសំខាន់ៗដែលខ្លួនចង់បាន យើងដឹងក្នុងរយៈកាលនេះយោធាថៃបានបន្តជីកលេណដ្ឋាន ក៏ដូចជាការបន្តស៊ើបនៅទីតាំងសំខាន់ៗ ដើម្បីជាជំនួយទៅដល់ការប្រើប្រាស់យោធា ក៏ដូចជាប្រសិទ្ធភាពនៃការប្រើប្រាស់នូវការឈ្លានពាន»៕
