មេដឹកនាំកម្ពុជា អំពាវនាវដល់ពលរដ្ឋរក្សាភាពស្ងៀមស្ងាត់ និងពិចារណាឱ្យបានដឹតដល់ចំពោះការធ្វើពហិការមិនប្រើប្រាស់ផលិតផលកូកាកូឡា ដែលជាផលិតផលរបស់អាមេរិកផលិតនៅកម្ពុជា ដើម្បីជៀសវាងចាញ់ល្បិចកលរបស់ថៃ ដែលចង់រុញឱ្យកម្ពុជាធ្វើជាសត្រូវជាមួយអាមេរិក។
ការអំពាវនាវនេះ បានធ្វើឡើងក្នុងសំណេររបស់លោក ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា ជាការឆ្លើយតបនឹងការបង្ហោះសាររបស់អ្នកសារព័ត៌មានម្នាក់ ក្នុងបណ្តាញសង្គមហ្វេសប៊ុក នៅយប់ថ្ងៃទី១៧ ខែសីហា ឆ្នាំ២០២៥ ក្រោយពីក្រុមហ៊ុនកូកាកូឡា (Coca-Cola) បានផ្តាច់កុងត្រាជាមួយ លោក វណ្ណដា ដែលជាតារាចំរៀងរ៉េបល្បីឈ្មោះមួយរូបនៅកម្ពុជា ដែលគេនៅមិនទាន់ដឹងថាតើការផ្តាច់កុងត្រានោះដោយសារមូលហេតុអ្វីនៅឡើយទេ។
ក្នុងសំណេរនោះ លោក ហ៊ុន សែន បានលើកឡើងថា កូកាកូឡា ជាផលិតផលអាមេរិក តែវាក៏ជាផលិតផលរបស់ខ្មែរដែរ ព្រោះផលិតនៅក្នុងប្រទេសកម្ពុជា ដែលកម្មករខ្មែរជាអ្នកធ្វើការនិងទទួលផល ខណៈការបង់ពន្ធក៏បានមកកម្ពុជា ដែលជាការរួមចំណែកដល់កំណើនសេដ្ឋកិច្ចជាតិ។
ករណីនេះ លោក ហ៊ុន សែន បានអំពាវនាវដល់ប្រជាពលរដ្ឋ រក្សាភាពស្ងប់ស្ងាត់ និងពិចារណាឱ្យបានដឹតដល់មុននឹងធ្វើពហិការមិនប្រើប្រាស់ផលិតផលកូកា ហើយត្រូវស្វែងយល់ជាដំបូងសិន ថាតើក្រុមហ៊ុនផ្តាច់កុងត្រាជាមួយលោក វណ្ណដា ដោយសារ លោក វណ្ណដា ស្រឡាញ់ជាតិឬយ៉ាងណា?
លោកបានគូសបញ្ជាក់ថា ប្រសិនក្រុមហ៊ុនកូកា ដកខ្លួនចេញពីកម្ពុជានោះ កម្ពុជាគឺជាអ្នកខាតបង់ ហើយសត្រូវរបស់កម្ពុជា គឺថៃជាអ្នកទទួលផល។
លោកថា៖ «សត្រូវរបស់យើងចង់វាយខាងសេដ្ឋកិច្ចយើងតាំងពីដំបូង ដូចជា គំរាមកាត់ផ្តាច់អគ្គីសនី ផ្តាច់អ៊ីនធើណែត ឈប់លក់ប្រេង តែយើងបានម្ចាស់ការកាត់ផ្តាច់ និងឈប់ទិញជាមុន ដើម្បីកុំឲ្យគេគំរាមយើងបានទៀត។ ខ្ញុំមិនជំទាស់ទេប្រសិនបើកូកានេះផលិតនៅថៃ បងប្អូនអាចឈប់ប្រើបាន តែបើកូកានេះផលិតនៅកម្ពុជា បងប្អូនពហិការមិនប្រើ កម្ពុជាគឺជាអ្នកខាតបង់ទាំងការងារ ទាំងប្រាក់ចំណូលដោយផ្ទាល់ និងដោយប្រយោលរបស់ប្រជាជននិងចំណូលរដ្ឋ»។
លោក ហ៊ុន សែន បន្តទៀតថា ក្រៅពីរឿងសេដ្ឋកិច្ចនៅមានរឿងសំខាន់មួយទៀត នោះគឺថៃចង់រុញកម្ពុជាឲ្យធ្វើជាសត្រូវជាមួយអាមេរិកតែម្តង ដែលរឿងនេះវាបង្កើតនូវបញ្ហាខាងការទូតសេដ្ឋកិច្ច ពាណិជ្ជកម្ម និងការវិនិយោគ រវាងកម្ពុជាជាមួយអាមេរិកតែម្តង។
លោកថា៖ «សូមកុំចូលអន្ទាក់របស់សត្រូវយើងឲ្យសោះ។ សូម្បីតែក្រុមហ៊ុនថៃដែលកំពុងវិនិយោគនៅកម្ពុជា ក៏យើងត្រូវខិតខំរក្សា ដើម្បីជាប្រយោជន៍របស់យើងដែរ»។
គួរបញ្ជាក់ថា ភេសជ្ជៈកូកាកូឡា ត្រូវបានបង្កើតឡើងតាំងពីឆ្នាំ១៨៨៦ ពោលគឺមានរយៈពេលប្រមាណ ១៣៩ឆ្នាំហើយគិតមកដល់បច្ចុប្បន្ន ដោយលោកវេជ្ជបណ្ឌិត John S. Pemberton មានទីលំនៅក្នុងរដ្ឋអាត្លង់តា សហរដ្ឋអាមេរិក។ នេះបើតាមការចុះផ្សាយរបស់គេហទំព័រ worldofcoca-cola.com។
នៅកម្ពុជា ក្រុមហ៊ុន កូកាកូឡា ដែលជាផលិតផលដើមរបស់អាមេរិក បានសម្ពោធដំណើរការរោងចក្រនៅតំបន់សេដ្ឋកិច្ចពិសេសភ្នំពេញ ក្នុងខណ្ឌកំបូល រាជធានីភ្នំពេញ ចាប់តាំងពីឆ្នាំ២០១៦មក ដែលបានផ្តល់ការងារដល់ពលរដ្ឋខ្មែរខ្ទង់ពាន់នាក់ គិតមកដល់បច្ចុប្បន្ន៕
