មេដឹកនាំវៀតណាម បានជំរុញឱ្យមេដឹកនាំកម្ពុជា ពិនិត្យពីលទ្ធភាពឱ្យពលរដ្ឋខ្លួនបានចូលសញ្ជាតិខ្មែរ ដោយសំអាងថា ដើម្បីមានស្ថិរភាពជីវភាព ដែលការណ៍នេះ បង្កក្តីបារម្ភពីគ្រោះថ្នាក់ធ្ងន់ធ្ងរដល់ពូជសាសន៍ខ្មែរ ខណៈមេដឹកនាំខ្មែរពន្លឿនធ្វើច្បាប់ដកសញ្ជាតិពលរដ្ឋខ្លួនពីកំណើត។
សារព័ត៌មានវៀតណាមផ្លឹស បានចុះផ្សាយនៅថ្ងៃទី១៥ ខែសីហាថា នាយករដ្ឋមន្រ្តីវៀតណាម លោក ផាម មិញជីញ បានសន្ទនាតាមទូរស័ព្ទជាមួយ លោក ហ៊ុន ម៉ាណែត ដោយស្នើសម្រួលដល់ការចូលសញ្ជាតិសម្រាប់ជនជាតិវៀតណាមដែលមានសិទ្ធិ ក៏ដូចជាបង្កើតលក្ខខណ្ឌសម្រាប់ប្រជាជនវៀតណាម ដើម្បីមានស្ថិរភាពជីវភាពធ្វើសមាហរណកម្ម។
បើតាមប្រភពដដែល ការយកចិត្តទុកដាក់លើជនជាតិវៀតណាមបែបនេះ ក៏បានរួមចំណែកជាវិជ្ជមានដល់សង្គមកម្ពុជា និងធ្វីឱ្យសហគ្រាសវៀតណាមប្រតិបត្តិការប្រកបដោយស្ថិរភាព និងពង្រីកការវិនិយោគនៅកម្ពុជា។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក អ៊ុំ សំអាន យល់ថា វៀតណាមនៅតែមានមហិច្ចតាលេបទឹកដីខ្មែរដោយប្រើយុទ្ធសាស្រ្តបញ្ជូនជនជាតិខ្លួនឱ្យមករស់នៅកម្ពុជាច្រើនទៅៗ និងទាមទារសញ្ជាតិស្របច្បាប់ពីរដ្ឋាភិបាលគ្រួសារហ៊ុន។
លោកសង្កត់ធ្ងន់ថា ដើម្បីដឹងគុណវៀតណាមដែលលើកបន្ទុកលោក ហ៊ុន សែន ឱ្យកាន់អំណាចតាំងពីទស្សវត្សរ៍ទី៨០មក លោក ហ៊ុន សែន ហ៊ានធ្វើគ្រប់បែបយ៉ាងដើម្បីបំរើមហិច្ចតាវៀតណាម ក្នុងនោះមានទាំងធ្វើច្បាប់ដកសញ្ជាតិពីពលរដ្ឋខ្លួនយកទៅឱ្យជនជាតិវៀតណាមដែលជាគ្រោះថ្នាក់ដល់ពូជសាសន៍ខ្មែរ។
លោកថា៖ «នៅពេលដែលធ្វើច្បាប់ដល់សញ្ជាតិខ្មែរពីកំណើត ហើយដកសញ្ជាតិខ្មែរពីអ្នកស្នេហាជាតិ ដែលប្រឆាំងនឹងវៀតណាម ប្រឆាំងទៅនឹងជនអន្តោប្រវេសន៍វៀតណាម ប្រឆាំងទៅនឹងការឈ្លានពានរបស់វៀតណាមហ្នឹង! ហើយអត់មានអ្នកប្រឆាំងទៅនៅវៀតណាម ដូចនៅប្រទេសឡាវអ៊ីចឹង! ថ្ងៃអនាគតទៅកម្ពុជានឹងក្លាយទៅជាកម្ពុជាក្រោមទីពីរ ហើយ។ ហើយអ្វីដែលជាក្ដីសុបិន្តរបស់ហូជីមិញ ក្នុងដំណើរឆ្ពោះមកទិសខាងលិច ដែលលេបត្របាក់យកកម្ពុជា និងឡាវដាក់ទៅក្នុងសហព័ន្ធឥណ្ឌូចិន រវាងកម្ពុជា វៀតណាម ឡាវ ជាប្រទេសតែមួយហ្នឹង បានសម្រេចនៅពេលអនាគត។ អាហ្នឹងជាក្ដីបារម្ភរបស់ខ្ញុំ»។
ជុំវិញរឿងនេះ VOD មិនអាចសុំការឆ្លើយតបពីអ្នកនាំពាក្យរដ្ឋាភិបាល លោក ប៉ែន បូណា បានទេគិតត្រឹមម៉ោងផ្សាយនេះ។
សម្រាប់ ប្រធានអង្គការប្រជាធិបតេយ្យខ្មែរប្រចាំប្រទេសអូស្រ្តាលី លោក ស៊ឹង សែនករុណា រំលឹកថា តាមប្រវត្តិសាស្រ្ត វៀតណាមបានស៊ីដាច់ទឹកដីកម្ពុជាក្រោមបាត់ទៅហើយ មកដល់បច្ចុប្បន្ននេះតាមរយៈយុទ្ធសាស្រ្តឱ្យបញ្ចូលជនជាតិខ្លួនទៅរស់ តែមិនចាកចេញវិញទេ។
ក្នុងន័យនេះ លោកបារម្ភថា កម្ពុជានឹងជាន់ដានប្រវត្តិសាស្រ្តម្តងទៀត បើឱ្យជនជាតិវៀតណាមរស់នៅលើទឹកដីខ្មែរច្រើនទៅៗ ដែលពួកគេនឹងមានវាសនាសម្រេចជោគវាសនាលើទឹកដីកម្ពុជា។
លោកថា៖ «បើមានពលរដ្ឋគេកាន់តែច្រើនហើយ ថ្ងៃក្រោយគេចេះខ្មែរ គេចេះវប្បធម៌អក្សរសាស្ត្រខ្មែរបានជ្រៅជ្រះពីព្រោះក្នុងច្បាប់សញ្ជាតិ គេផ្តល់សិទ្ធិឲ្យផ្តល់សញ្ជាតិទៅដល់អ្នកដែលគេមានសិទ្ធិ ក្នុងការស្នើសុំសញ្ជាតិហ្នឹង។ បើសិនជាវៀតណាមត្រូវបានផ្តល់សញ្ជាតិជាខ្មែរកាន់តែច្រើន គេមានសិទ្ធិក្នុងការបោះឆ្នោត ហើយកម្ពុជាជាប្រទេសប្រកាន់របបប្រជាធិបតេយ្យ អ៊ីចឹងអ្នកដឹកនាំដែលគេពេញចិត្តដែលការពារវៀតណាមហ្នឹង គឺចេះតែឈ្នះឆ្នោតរហូតអ៊ីចឹងទៅហើយវៀតណាមចេះតែបន្តពីមួយមកមួយ ពីកូនដល់ចៅ តដល់ចៅទួត អ៊ីចឹងយូរទៅជាតិសាសន៍ហ្នឹង វាកាន់តែកើនឡើងនៅក្នុងប្រទេសកម្ពុជាយើង»។
យ៉ាងណា លោកជំរុញឱ្យខ្មែរគ្រប់និន្នាការរួមគ្នា ទើបខ្មែរខ្លាំងអាចទប់ទល់បរទេសឈ្លានពានទឹកដីទាំងខាងលិច និងខាងកើតបាន។
រដ្ឋសភាកម្ពុជា កាលពីថ្ងៃទី១៣ ខែសីហា ឆ្នាំ២០២៥ បានអនុម័តទទួលយកសេចក្តីព្រាងច្បាប់ស្តីពីវិសោធនកម្មច្បាប់ស្តីពីការដកសញ្ជាតិខ្មែរពីកំណើត។
សេចក្តីព្រាងច្បាប់ស្តីពីវិសោធនកម្មច្បាប់ស្តីពីសញ្ជាតិខ្មែរ ត្រូវបានគណៈរដ្ឋមន្ត្រីសម្រេចយល់ព្រមក្នុងសម័យប្រជុំពេញអង្គ គណៈរដ្ឋមន្ត្រី កាលពីថ្ងៃទី១១ ខែសីហា ឆ្នាំ២០២៥ ដើម្បីបញ្ជូនមកសុំការអនុម័តពីស្ថាប័ន នីតិប្បញ្ញត្តិ។
យ៉ាងណា គណបក្សជំទាស់ និងអ្នកឃ្លាំមើល ចាត់ទុកបំណងរុះរើមាត្រា៣៣នៃរដ្ឋធម្មនុញ្ញនេះ ថាជាអំពើប្រហាររដ្ឋធម្មនុញ្ញ និងជាឧក្រិដ្ឋកម្មប្រល័យពូជសាសន៍ខ្មែរ។
លើសពីនេះ ពួកគេថា ការធ្វើវិសោធនកម្មនេះ ជាការបំពានរដ្ឋធម្មនុញ្ញកម្ពុជា និងធម្មនុញ្ញអង្គការសហប្រជាជាតិទៀតផង ខណៈកម្ពុជាបានផ្តល់សច្ចាប័នលើកតិកាសញ្ញាអន្តរជាតិ ស្តីពីសិទ្ធិពលរដ្ឋ និងសិទ្ធិនយោបាយ នៅឆ្នាំ១៩៩២។
ក្រៅពីធ្វើច្បាប់ដកសញ្ជាតិពីពលរដ្ឋខ្មែរហើយ ប្រធានបក្សកាន់អំណាច លោក ហ៊ុន សែន ក៏ធ្លាប់គំរាមរំលាយរបបរាជានិយមអាស្រ័យធម្មនុញ្ញ បើព្រះអង្គមិនព្រមឡាយព្រះហស្តលេខា លើសន្ធិសញ្ញាព្រំដែនបំពេញបន្ថែមឆ្នាំ២០០៥។
គណបក្សប្រឆាំង ចោទថា សន្ធិសញ្ញានេះរំលោភកិច្ចព្រមព្រៀងសន្តិភាពទីក្រុងប៉ារីស ដើម្បីសម្រេចមហិច្ឆតាវៀតណាមលេបទឹកដី ដែលធ្វើឱ្យរបូតចង្កោមកោះក្រចកសេះ កោះត្រល់ រួមទាំងដែនដីគោកច្រើនទៀតតាមព្រំដែន ធ្លាក់ក្នុងដៃវៀតណាម រហូតបច្ចុប្បន្ន៕
