ទន្ទឹមនឹងការកើនឡើងកម្លាំងយោធាដ៏ច្រើនសន្ធឹកសន្ធាប់ ប្រទេសចិនបានចាប់ផ្តើមកើនទំហំ និងសមត្ថភាពនុយក្លេអ៊ែររបស់ខ្លួនយ៉ាងឆាប់រហ័ស នឹងជានិរន្តភាព នេះបើយោងតាមអ្នកជំនាញយោធា និងគ្រប់គ្រងអាវុធរបស់សហរដ្ឋអាមេរិក។
ទីភ្នាក់ងារសារព័ត៌មាន រ៉យទ័រ រាយការណ៍នៅថ្ងៃទី២០ ខែសីហា ឆ្នាំ២០២៥នេះថា មេបញ្ជាការនៃបញ្ជាការយុទ្ធសាស្រ្តអាមេរិក លោកឧត្តមសេនីយ៍ អាន់តូនី ខត់ថុន(Anthony Cotton) បានប្រាប់សភានៅខែមីនាថា មេដឹកនាំចិន លោក ស៊ី ជីនភីង(Xi Jinping)ថា យោធារបស់ប្រទេសចិនត្រៀមខ្លួនរួចរាល់ ដើម្បីដណ្តើមយកកោះតៃវ៉ាន់ទៅវិញនៅឆ្នាំ២០២៧ ហើយបានបង្កើតនុយក្លេអ៊ែរដែលអាចបាញ់ចេញពីដី អាកាស និងសមុទ្រ។
ជាមួយគ្នានេះ នៅក្នុងគោលនយោបាយការពារជាតិនៅឆ្នាំ២០២៣របស់ចិន បានបន្តការសន្យាយូរអង្វែងថា ខ្លួននឹងមិនប្រើនុយក្លេអ៊ែរមុនឡើយ ទោះស្ថិតក្រោមកាលៈទេសៈណាក៏ដោយ ឯគោលនយោបាយក៏បានរួមបញ្ចូលទាំងការសន្យាថា ប្រទេសចិនមិនប្រើ និងមិនគម្រាមដោយការប្រើអាវុធនុយក្លេអ៊ែរប្រឆាំងនឹងរដ្ឋណាដែលមិនមានអាវុធនុយក្លេអ៊ែរនោះទេ។ ប្រទេសចិន បានបន្ថែមទៀតថា ខ្លួនប្រកាន់ខ្ជាប់នឹងគោរពតាមយុទ្ធសាស្រ្តនុយក្លេអ៊ែរសម្រាប់ការពារខ្លួនតែប៉ុណ្ណោះ។
នៅក្នុងរបាយការណ៍ប្រចាំឆ្នាំអំពីកម្លាំងយោធាចិន ដែលមន្ទីរបញ្ចកោណ(Pentagon) បាននិយាយថា ទោះបីប្រទេសចិន ប្រកាសចំហរជាសាធារណៈក៏ដោយ យុទ្ធសាស្រ្តរបស់ចិនអាចរួមបញ្ចូល ‘‘ការប្រើនុយក្លេអ៊ែរមុន’’ ជាការឆ្លើយតបពេលចិនត្រូវបានវាយប្រហារ ដែលអាចគម្រាមដល់លទ្ធភាពជោគជ័យ នុយក្លេអ៊ែរ និងប៉ះពាល់ដល់ការគ្រប់គ្រងបញ្ជាការរបស់ខ្លួន។
បន្ថែមពីនេះ ប្រភពថា ទីក្រុងប៉េកាំងក៏ប្រហែលពិចារណាប្រើប្រាស់នុយក្លេអ៊ែរ ប្រសិនបើបរាជ័យនៅតៃវ៉ាន់ដែលបានគម្រាមដល់ភាពរស់រានរបស់របបកុម្មុយនិស្ត នេះបើតាមមន្ទីរបញ្ចកោនបានរាយការណ៍កាលពីចុងឆ្នាំមុន។
ប្រភពបន្ថែមថា ប្រទេសចិនកំពុងសាងសង់ប៉មថ្មីស្តុកមីស៊ីលប្រហែល ៣៥០ប៉ម និងកំពុងបង្កើតមូលដ្ឋានថ្មីជាច្រើនសម្រាប់មីស៊ីលដែលអាចបាញ់ចល័តបាន។ ប្រភពថា កងយោធាចិនត្រូវបានប៉ាន់ស្មានថា មាន មីស៊ីលបាញ់ប្រហែល ៧១២ ដែលមានមូលដ្ឋាននៅលើដី និងក្នុងចំណោមមីស៊ីលផ្ទុក៤៦២ អាចឈានដល់ទ្វីបអាមេរិក៕
