តៃវ៉ាន់គ្រោងនឹងបង្កើនការចំណាយលើវិស័យការពារជាតិចំនួន ១/៥ នៅឆ្នាំក្រោយដោយលើស៣%នៃផលិតផលក្នុងស្រុកសរុប ខណៈខ្លួនវិនិយោគបន្ថែមរាប់ពាន់លានដុល្លារ លើគ្រឿងបរិក្ខាថ្មីដើម្បីប្រឈមមុខជាមួយនឹងប្រទេសចិនកាន់តែប្រសើរ និងបង្ហាញឱ្យសហរដ្ឋអាមេរិក ឃើញថា តៃវ៉ាន់យកចិត្តទុកដាក់ចំពោះការអំពាវនាវឱ្យពង្រឹងយោធារបស់ខ្លួន។
ទីភ្នាក់ងារសារព័ត៌មានរ៉យទ័រ បានរាយការណ៍នៅថ្ងៃទី២១ ខែសីហា ឆ្នាំ២០២៥នេះថា ចំណាត់ការនេះកើតឡើងនៅពេលដែលប្រទេសចិន ចាត់ទុកតៃវ៉ាន់ដែលគ្របដណ្តប់ដោយលទ្ធិប្រជាធិបតេយ្យនេះ ជាអធិបតេយ្យភាពរបស់ខ្លួនដោយបានបង្កើនសម្ពាធយោធា និងនយោបាយក្នុងរយៈពេលប្រាំឆ្នាំចុងក្រោយនេះ ដើម្បីអះអាងការទាមទាររបស់ខ្លួន តែទីក្រុងតៃប៉ិបដិសេធយ៉ាងខ្លាំង។
នាយករដ្ឋមន្រ្តីតៃវ៉ាន់ លោក ឆូ ចុងថៃ(Cho Jung-tai) បានប្រាប់អ្នកសារព័ត៌មានថា ការចំណាយលើថវិកាជាតិនៅឆ្នាំ២០២៦នេះ នឹងឈានឡើងដល់ ៩៤៩.៥ពាន់លានដុល្លារ ដែលប្រហែល(៣១.២៧ពាន់លានដុល្លារអាមេរិក)។ លើសពីនេះ តួរលេខរដ្ឋាភិបាលបានបង្ហាញថា ចំនួន ៣.៣២%នៃផលិតផលក្នុងស្រុកសរុបចំនួននេះ បានលើសកម្រិត៣% ជាលើកដំបូងចាប់តាំងពីឆ្នាំ២០០៩។
បន្ថែមពីនេះ លោក ឆូ បាននិយាយកាលពីថ្ងៃព្រហស្បតិ៍ថា ‘‘នេះគឺជាការបង្ហាញមួយផ្សេងទៀតដល់ពិភពលោកអំពីការប្តេជ្ញាចិត្តនៃប្រជាជនយើង និងសមត្ថភាពរបស់យើង ក្នុងការការពារដែនអធិបតេយ្យភាព និងសន្តិសុខ ការរក្សាស្ថិរភាពសន្តិសុខនៅក្នុងតំបន់ឥណ្ឌូប៉ាស៊ីហ្វិក និងបំពេញការទទួលខុសត្រូវរួមគ្នារបស់យើងចំពោះពិភពលោក’’។
ផែនការនេះ រួមមាន សំណើរថវិកាជាតិពិសេសមួយចំនួនដែលមានតម្លៃសរុប ១១៧.៦ពាន់លានដុល្លារសម្រាប់យន្តហោះចម្បាំងថ្មី និងការបង្កើនការការពារកងទ័ពជើងទឹក ដែលត្រូវបានរំពឹងទុកយ៉ាងទូលំទូលាយពីក្រសួងការពារជាតិ នៅក្នុងសម័យប្រជុំសភាខាងមុខនៅឆ្នាំនេះ។
រដ្ឋាភិបាលតៃវ៉ាន់ បានធ្វើទំនើបកម្មយោធាក្លាយជាវេទិកានយោបាយដ៏សំខាន់ និងបានសន្យាម្តងហើយម្តងទៀត ក្នុងការចំណាយថវិកាបន្ថែមលើការការពារជាតិរបស់ខ្លួន ដោយសារតែការគំរាមពីសំណាក់សាធារណៈរដ្ឋប្រជាមានិតចិន រួមទាំងការអភិវឌ្ឍនាវាមុជទឹកដែលផលិតនៅតៃវ៉ាន់ផងដែរ៕
