លោក វ្លាឌីមៀពូទីន ទាមទារឱ្យអ៊ុយក្រែនបោះបង់តំបន់ដុនបាសនៃភាគខាងកើតទាំងអស់ បោះបង់មហិច្ឆតាចូលរួមជាមួយណាតូ(NATO) រក្សាអព្យាក្រឹត និងឱ្យទ័ពលោកខាងលិចចេញពីប្រទេស។ នេះបើតាមប្រភពបី ពីវិមានក្រឹមឡាំងបានប្រាប់សារព័ត៌មានរ៉យទ័រ(Reuters)។
រ៉យទ័រ បានរាយការណ៍នៅថ្ងៃទី២១ ខែសីហា ឆ្នាំ២០២៥នេះថា ប្រធានាធិបតីរុស្សី បានជួបជាមួយ លោកដូណាល់ ត្រាំ នៅអាឡាស្កា កាលពីថ្ងៃសុក្រ សម្រាប់កិច្ចប្រជុំកំពូលរុស្សី និងអាមេរិក ជាលើកដំបូងក្នុងរយៈពេល ៤ឆ្នាំមកនេះ ដែលចំណាយពេលស្ទើរតែ៣ម៉ោង ដើម្បីបញ្ចប់ការពិភាក្សាដើម្បីសម្រុះសម្រួលលើអ៊ុយក្រែន ថាតើនឹងចេញជារូបរាងបែបណា?
ការថ្លែងបន្ទាប់ពីលោក ត្រាំ និង លោកពូទីន បាននិយាយអំពីកិច្ចប្រជុំដែលសង្ឃឹមថា នឹងបើកផ្លូវទៅរកសន្តិភាពនៅអ៊ុយក្រែន ប៉ុន្តែមេដឹកនាំទាំងពីរហាក់បីមិនបានផ្តល់ព័ត៌មានជាក់លាក់ អំពីអ្វីដែលពួកគេបានពិភាក្សានោះទេ។
ដោយឡែក នៅក្នុងរបាយការណ៍លម្អិតមួយដែលមានមូលដ្ឋាននៅរុស្ស៊ី រហូតមកដល់បច្ចុប្បន្ន លើការផ្តល់ជូនរបស់ លោក ពូទីន នៅឯកិច្ចប្រជុំនោះ រ៉យទ័រ អាចគូសបញ្ជាក់ជុំវិញនូវអ្វីដែលវិមានក្រឹមឡាំងចង់ឃើញនៅកិច្ចព្រមព្រៀងសន្តិភាព ដើម្បីបញ្ចប់សង្រ្គាមនៅអ៊ុយក្រែនដែលស្លាប់មនុស្ស និងបណ្តាលឱ្យមនុស្សរបួសរាប់សែននាក់។
នៅក្នុងប្រភពនោះ រុស្សី និយាយថា លោក ពូទីន សម្រុះសម្រួលលើការទាមទារដីដែលដាក់ចេញនៅខែមិថុនា ឆ្នាំ២០២៤ ដែលតម្រូវឱ្យទីក្រុងគីវ(Kyiv)លះបង់ទាំងស្រុងនៃខេត្តចំនួន៤ ដែលក្រុងម៉ូស្គូទាមទារជាផ្នែកមួយនៃប្រទេសរុស្ស៊ី គឺដុនតេស្ក៍(Dontesk) និងលូហានស្ក៍ (Luhansk) នៅភាគខាងកើតអ៊ុយក្រែនដែលបង្កើតជា ដុនបាស(Donbas) ឃែសុន(Kherson) និងហ្សាប់ប៉ូរីសស្យា(Zaporizhzhia) នៅភាគខាងត្បូង។
យ៉ាងណា ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelenskiy) បានប្រាប់អ្នកយកព័ត៌មាននៅក្នុងការអត្ថាធិប្បាយដែលចេញផ្សាយដោយទីក្រុងគីវ(Kyiv) កាលពីថ្ងៃព្រហស្បតិ៍ថា‘‘ប្រសិនបើនិយាយអំពីការដកខ្លួនចេញពីភាគខាងកើតដោយសាមញ្ញនោះ យើងមិនអាចធ្វើវាបានទេ។ វាគឺបញ្ហានៃភាពរស់រាននៃប្រទេសរបស់យើង ដែលពាក់ព័ន្ធនឹងខ្សែការពារដ៏រឹងមាំបំផុត’’៕
