អ៊ុយក្រែនបានបើកការវាយប្រហារដោយដ្រូនលើរុស្សី កាលពីថ្ងៃអាទិត្យ ដែលបណ្តាលឱ្យសមត្ថភាពម៉ាស៊ីនបង្កើតថាមពលនុយក្លេអ៊ែរ នៅរោងចក្រដ៏ធំមួយរបស់រុស្សី ថយចុះហើយបង្កឱ្យមានការឆាបឆេះយ៉ាងសន្ធោសន្ធៅនៅឯស្ថានីយនាំចេញឥន្ធនៈ អាស់លូការ(Ust-Luga)។
ទីភ្នាក់ងារសារព័ត៌មាន រ៉យទ័រ បានរាយការណ៍នៅថ្ងៃទី២៤ ខែសីហា ឆ្នាំ២០២៥នេះថា ទោះបីជាមានការចរចាអំពីសន្តិភាពរវាងរុស្សីនិងអ៊ុយក្រែនក៏ដោយ សង្រ្គាមដែលសាហាវឃោឃៅមួយកំពុងបន្តតាមខ្សែបន្ទាត់ជួរមុខ អមជាមួយការវាយប្រហារដោយដ្រូនបើកចូលជ្រៅទាំងរុស្ស៊ី និងអ៊ុយក្រែន។
ក្រសួងការបរទេសរបស់រុស្សី បាននិយាយថា យ៉ាងហោចណាស់ មានដ្រូនរបស់អ៊ុយក្រែនចំនួន ៩៥គ្រឿង ត្រូវបានស្ទាក់ចាប់នៅតំបន់រុស្ស៊ី នៅថ្ងៃទី២៤ខែសីហា ខណៈដែលអ៊ុយក្រែនប្រារព្ធពិធីប្រកាសឯករាជ្យជាតិរបស់ខ្លួនពីសហភាពសូវៀតក្នុងឆ្នាំ១៩៩១។
រោងចក្រផលិតនុយក្លេអ៊ែរ ខួស(Kursk) ដែលមានចម្ងាយត្រឹមតែ៦០គីឡូម៉ែត្រ ពីព្រំដែនជាមួយអ៊ុយក្រែន បានប្រាប់ថា ប្រព័ន្ធការពារអាកាសបានបាញ់ទម្លាក់ដ្រូន ផ្ទុះនៅជិតរោងចក្រនៅយប់កណ្តាលអធ្រាតថ្ងៃទី២៣ ចូលថ្ងៃទី២៤ ខែសីហានេះ ធ្វើឱ្យខូចខាតឧបករណ៍បម្លែងថាមពលបណ្តាលឱ្យសមត្ថភាពម៉ាស៊ីនបង្កើតនុយក្លេអ៊ែរលេខ៣ ថយចុះ៥០%។
អភិបាលតំបន់ និយាយថា ចម្ងាយប្រមាណ១០០០គីឡូម៉ែត្រនៃភាគខាងជើងឈូងសមុទ្រហ្វាំងឡង់ យ៉ាងហោចណាស់ មានដ្រូនអ៊ុយក្រែន ១០គ្រឿង ត្រូវបានបាញ់ទម្លាក់លើកំពង់ផែអាស់លូកា (Ust-Luga) ក្នុងតំបន់លេនីនរាដ (Leningrad) ភាគខាងជើងនៃប្រទេសរុស្ស៊ី ដោយមានកម្ទេចធ្លាក់ចុះបណ្តាលឱ្យផ្ទុះឆេះនៅស្ថានីយដំណើរការណវ៉ាតិក (Novatek)ដែលជាស្ថានីយនាំចេញឥន្ធនៈនៅសមុទ្របាល់តិចដ៏ធំហើយក៏ជាកន្លែងកែច្នៃផងដែរ៕
