ប្រទេសស៊ុយអ៊ែត បាននិយាយកាលពីថ្ងៃចន្ទថា ខ្លួនបានចុះហត្ថលេខាលើកិច្ចព្រមព្រៀងលក់យន្តហោះចម្បាំងគ្រីបភិន (Gripen) ចំនួន ៤គ្រឿង ដែលផលិតដោយក្រុមហ៊ុន ស្វេស្កា អ៊ែរ៉ូផ្លេន អាក់ថេបូឡាហ្គេត(Svenska Aeroplan Aktiebolaget) ទៅឱ្យប្រទេសថៃ។ នេះបើយោងតាមប្រភពទីភ្នាក់ងារសារព័ត៌មានរ៉យទ័រ។
រ៉យទ័រ បានរាយការណ៍នៅថ្ងៃ២៥ ខែសីហា ឆ្នាំ២០២៥នេះថា អគ្គនាយកដ្ឋានរដ្ឋបាលសម្ភារៈការពារជាតិប្រទេសស៊ុយអ៊ែត លោក ម៉ៃឃឺល ហ្រ្គែនហូម (Mikael Granholm) បាននិយាយនៅក្នុងសេចក្តីថ្លែងការណ៍មួយថា កិច្ចព្រមព្រៀងនេះ ពង្រឹងឱកាសអភិវឌ្ឍន៍រយៈពេលវែង សម្រាប់យន្តហោះចម្បាំងស៊ុយអ៊ែត។
ក្រុមហ៊ុន ស្វេស្កា អ៊ែរ៉ូផ្លេន អាក់ថេបូឡាហ្គេត បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា តម្លៃនៅក្នុងការបញ្ជាទិញដែលរួមមាន យន្តហោះ គ្រីបភិនអ៊ី(Gripen E)ចំនួន ៣គ្រឿង និង គ្រីបភិនអេហ្វ (Gripen F)ចំនួន១គ្រឿង ព្រមទាំងគ្រឿងបរិក្ខា ឧបករណ៍ជំនួយ និងការហ្វឹកហ្វឺន ដែលមានតម្លៃប្រហែល ៥.៣ពាន់លាន ដែលស្មើប្រមាណ ៥៥៦លានដុល្លារ នឹងចែកចាយនៅចន្លោះឆ្នាំ២០២៥ ដល់ ២០៣០។
ដោយឡែក ដាហ្គែនសារីអែនណា(Dagensararena) បង្ហាញអំពីប្រតិកម្មលើកឡើងអំពីការដាក់សម្ពាធដោយបង្កកការលក់អាវុធទៅឱ្យប្រទេសថៃ និងប្រទេសមិនមែនប្រជាធិបតេយ្យផ្សេងទៀត។ ប្រភពនោះបន្តថា លក្ខណៈវិនិច្ឆ័យប្រជាធិបតេយ្យសម្រាប់ការនាំចេញអាវុធត្រូវរឹតបណ្តឹង បន្ទាប់ពីប្រទេសថៃប្រើប្រាស់យន្តហោះ ដ្យាសគ្រីបភិន(Jas Gripen) ប្រឆាំងដោយដាក់គោលដៅនៅប្រទេសកម្ពុជា។
លើសពីនេះ ប្រភពបានបន្ថែមថា វាមិនគ្រប់គ្រាន់នោះទេ ដោយគ្រាន់តែពិនិត្យការលក់ទៅឱ្យរបបផ្តាច់ការប៉ុន្តែប្រទេសស៊ុយអ៊ែត ត្រូវតែពិនិត្យមើលឱ្យបានហ្មត់ចត់លើគណៈវិនិច្ឆ័យ ដែលបានអនុវត្តក្នុងការនាំចេញ។ ប្រទេសថៃ ដែលបានផ្លាស់ប្តូរទៅវិញទៅមករវាងរបបផ្តាច់ការយោធា និងរដ្ឋាភិបាលទន់ខ្សោយអស់រយៈពេលជាច្រើនទសវត្សរ៍មកហើយនោះ ជាទូទៅត្រូវបានគេទទួលស្គាល់ថា របបមិនមែនប្រជាធិបតេយ្យ។
ប្រភពគូរបញ្ជាក់ថា ការផ្តល់ឱ្យរបបគ្រប់គ្រងដោយយោធានេះ ជាមួយយន្តហោះចម្បាំងជាច្រើនគ្រឿង និងធ្វើឱ្យមានការលើកស្ទួយសន្តិភាព និងស្ថេរភាពក្នុងតំបន់តិចតួចណាស់។ រាល់កិច្ចព្រមព្រៀងដែលដំណើរការដោយក្រុមហ៊ុនផលិតសព្វាវុធស៊ុយអែតផ្សេងទៀត គួរតែត្រូវបានផ្អាករហូតដល់លក្ខណៈវិនិច្ឆ័យប្រជាធិបតេយ្យរបស់អាយអេហ្វភី (ISP) ត្រូវបានពិនិត្យ និងពង្រឹងឱ្យបានហ្មត់ចត់៕
