ប្រទេសបារាំង អង់គ្លេស និងអាល្លឺម៉ង់ បានជួបជាមួយអ៊ីរ៉ង់ កាលពីថ្ងៃអង្គារ ដើម្បីព្យាយាមស្តាឡើងវិញនូវទំនាក់ទំនងការទូតជុំវិញកម្មវិធីនុយក្លេអ៊ែររបស់អ៊ីរ៉ង់ មុនពេលដែលពួកគេបាត់បង់លទ្ធភាពដាក់ទណ្ឌកម្មនៃអង្គការសហប្រជាជាតិលើទីក្រុងតេរ៉ង់(Tehran)។
ទីភ្នាក់ងារសារព័ត៌មាន រ៉យទ័រ រាយការណ៍នៅថ្ងៃទី២៧ ខែសីហា ឆ្នាំ២០២៥នេះថា ប្រទេសបារាំង អង់គ្លេស និងអាល្លឺម៉ង់ ដែលត្រូវបានគេហៅថា អ៊ី៣(E3) បានត្រៀមខ្លួនជាស្រេចក្នុងការដាក់ទណ្ឌកម្មនៃអង្គការសហប្រជាជាតិនៅប៉ុន្មានថ្ងៃខាងមុខនេះ ជុំវិញការចោទប្រកាន់ថា អ៊ីរ៉ង់បានរំលោភលើកិច្ចព្រមព្រៀងឆ្នាំ២០១៥ ជាមួយមហាអំណាចពិភពលោកដែលមានបំណងរារាំងទីក្រុងតេរ៉ង់(Tehran)ពីការអភិវឌ្ឍអាវុធនុយក្លេអ៊ែរ។
ប្រភពថា ដើម្បីធ្វើបែបនេះបាន ក្រុមប្រឹក្សាសន្តិសុខអង្គការសហប្រជាជាតិនឹងត្រូវបន្តដោះស្រាយក្រុមបឹក្សាសន្តិសុខអង្គការសហប្រជាជាតិឆ្នាំ២០១៥ ដែលកំណត់កិច្ចព្រមព្រៀងនុយក្លេអ៊ែរ ដោយបច្ចុប្បន្ននេះត្រូវផុតកំណត់នៅថ្ងៃទី១៨ ខែតុលា ហើយប្រទេសអ៊ី៣ នឹងបាត់បង់លទ្ធភាពក្នុងការដាក់ទណ្ឌកម្មនៃអង្គការសហប្រជាជាតិលើអ៊ីរ៉ង់។
ទីក្រុងតេរ៉ង់ បានព្រមានដោយ‘‘ឆ្លើយតបយ៉ាងមឺងម៉ាត់’’ថា ប្រសិនបើមានការដាក់ទណ្ឌកម្មឡើងវិញ នោះការជជែករវាងអ៊ី៣ និងអ៊ីរ៉ង់នឹងមានភាពតានតឹង ខណៈដែលក្រុងតេរ៉ង់ខឹងសម្បាចំពោះការទម្លាក់គ្រាប់បែក កាលពីខែមិថុនា លើរោងចក្រនុយក្លេអ៊ែររបស់ខ្លួន ដោយសហរដ្ឋអាមេរិក និងអ៊ីស្រាអែល។
ដោយឡែក ក្នុងសកម្មភាពមួយដែលស្មានមិនដល់នោះគឺ រុស្សី និងចិន ក៏ជាភាគីនៃកិច្ចព្រមព្រៀមព្រៀងនុយក្លេអ៊ែរផងដែរ បានផ្សព្វផ្សាយសេចក្តីព្រៀងដំណោះស្រាយមួយ ទៅកាន់សមាជិកក្រុមប្រឹក្សាទាំង១៥ កាលពីថ្ងៃអាទិត្យ ដែលនឹងបន្តកិច្ចព្រមព្រៀងនុយក្លេអ៊ែររហូតដល់ថ្ងៃទី១៨ ខែមេសា ឆ្នាំ២០២៦។
អ្នកកាទូតជាន់ខ្ពស់រុស្សីម្នាក់ ដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់រ៉យទ័រថា ភាសានេះនឹងរារាំងអ៊ី៣ ក្នុងការដាក់ទណ្ឌកម្មនៃអង្គការសហប្រជាជាតិលើអ៊ីរ៉ង់។ យ៉ាងណា ភ្លាមៗនោះគេមិនទាន់ដឹងច្បាស់ទេថា តើពេលណាសេចក្តីព្រាងសេចក្តីសម្រេចនេះអាចត្រូវបានគេបោះឆ្នោត?៕
