អគ្គនាយកដ្ឋានពន្ធដារ បានព្រមានចាត់វិធានការក្នុងករណីរកឃើញថា មានអំពើគេចវេះពន្ធ និងហានិភ័យនៃការបាត់ប្រាក់ពន្ធ ដោយសំអាងថា សហគ្រាសមួយចំនួន ពុំទាន់បានបង់ពន្ធតបតាមលិខិតជូនដំណឹងរបស់ខ្លួននៅឡើយ ។
នេះបើតាមសេចក្តីណែនាំ ស្តីពី វិធានការរដ្ឋបាលចំពោះការខកខានក្នុងការអនុវត្តលិខិតជូនដំណឹង ស្តីពីការប្រកាសបង់ពន្ធមិនបានត្រឹមត្រូវលើកទី២ ចុះហត្ថលេខាដោយរដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកអគ្គនាយកនៃអគ្គនាយកដ្ឋានពន្ធដារ លោក គង់ វិបុល ចុះថ្ងៃទី២២ ខែសីហា ឆ្នាំ២០២៥ ដែលវីអូឌីទទួលបាននៅថ្ងៃពុធនេះ។
លោក គង់ វិបុល បាននិយាយក្នុងលិខិតនោះថា អនុលោមតាមសៀវភៅណែនាំស្តីពីបែបបទនិងនីតិវិធីនៃការធ្វើសវនកម្មពន្ធដារ សម្រាប់មន្ត្រីពន្ធដារ និងអ្នកជាប់ពន្ធ អគ្គនាយកដ្ឋានពន្ធដារ ដែលបានជូនដំណឹង ចុះថ្ងៃទី២១ ខែមីនា ឆ្នាំ២០២៥ លោកពិនិត្យឃើញថា មានសហគ្រាសមួយចំនួនពុំទាន់ធ្វើការបង់ពន្ធ ឬឆ្លើយតបលើលិខិតជូនដំណឹងនៅឡើយទេ។
លោកគូសបញ្ជាក់ថា ដើម្បីពង្រឹងការអនុវត្តច្បាប់ និងលិខិតបទដ្ឋានគតិយុត្តស្តីពីពន្ធដារប្រកបដោយប្រសិទ្ធភាពលើការអនុវត្តលិខិតជូនដំណឹងស្តីពីការប្រកាសបង់ពន្ធមិនបានត្រឹមត្រូវលើកទី២ ចំពោះសហគ្រាសដែលមិនបានបង់ប្រាក់ពន្ធ អគ្គនាយកដ្ឋានពន្ធដារនឹងចាត់វិធានការផ្លូវច្បាប់។
សម្រាប់ លោក គង់ វិបុល វិធានការដែលត្រូវធ្វើ គឺកត់ត្រាប្រាក់ពន្ធ ពន្ធបន្ថែម និងការប្រាក់ដែលមាននៅក្នុងលិខិតជូនដំណឹងលើកទី២ ជាបំណុលពន្ធនិងអនុវត្តនីតិវិធីនៃការប្រមូលបំណុលពន្ធស្របតាមប្រកាស ចុះថ្ងៃទី២០ ខែវិច្ឆិកា ឆ្នាំ២០២០ ស្តីពីការគ្រប់គ្រងបំណុលពន្ធដារ ព្រមទាំងជាកម្មវត្ថុនៃការចុះធ្វើសវនកម្មពន្ធដារ។
លើសពីនេះ ត្រូវព្យួរសុពលភាពវិញ្ញាបនបត្រអាករលើតម្លៃបន្ថែម ឬចាត់វិធានការផ្សេងៗស្របតាមច្បាប់ និងលិខិតបទដ្ឋានគតិយុត្តស្តីពីពន្ធដារជាធរមាន ក្នុងករណីអគ្គនាយកដ្ឋានពន្ធដារពិនិត្យឃើញថា មានអំពើគេចវេះពន្ធ និងហានិភ័យនៃការបាត់ប្រាក់ពន្ធ។
ទូរទស្សន៍ Al Jazeera អំឡុងខែកក្កដា ឆ្នាំ២០១៨ ធ្លាប់បានចុះផ្សាយថា លោក គង់ វិបុល មានទ្រព្យសម្បត្តិតម្លៃរាប់លានដុល្លារសហរដ្ឋអាមេរិក នៅក្នុងប្រទេសអូស្ត្រាលី និងមុខជំនួញជាច្រើនទៀត បើទោះបីប្រាក់ខែរបស់លោក មិនដល់ ១.០០០ដុល្លារសហរដ្ឋអាមេរិកក្តី។
ទូរទស្សន៍នេះ ឱ្យដឹងទៀតថា លោក គង់ វិបុល បានបង្កើតក្រុមហ៊ុនវិនិយោគ ជាមួយប្តីប្រពន្ធជនជាតិអូស្ត្រាលីមួយគូ ដែលក្រោយមកត្រូវបានតុលាការកាត់ទោសពីបទប្រព្រឹត្តអំពើទុច្ចរិត ដោយកេងបនំ្លពន្ធរបស់ប្រទេសអូស្ត្រាលី ក្នុងទឹកប្រាក់ប្រមាណជាង ១,៨ លានដុល្លារសហរដ្ឋអាមេរិក។
បើតាមប្រភពនោះ តាមរយៈលិខិតរបស់តុលាការ ដែលត្រូវបានគេជឿថា បានចុះហត្ថលេខានៅឯស្ថានទូតអូស្ត្រាលីក្នុងទីក្រុងភ្នំពេញ បានឱ្យដឹងថា លោក គង់ វិបុល ធ្លាប់បានផ្ទេរប្រាក់ចំនួន ១,២ លានដុល្លារសហរដ្ឋអាមេរិក ទៅកាន់ក្រុមហ៊ុនប្តីប្រពន្ធមួយគូនេះទៀតផង៕
