អ្នកការទូត ៤នាក់ បាននិយាយថា អង់គ្លេស បារាំង និងអាល្លឺម៉ង់ ទំនងជាចាប់ផ្តើមដំណើរការដាក់ទណ្ឌកម្មលើអ៊ីរ៉ង់ឡើងវិញ តាមច្បាប់អង្គការសហប្រជាជាតិ នៅថ្ងៃព្រហស្បតិ៍ ប៉ុន្តែសង្ឃឹមថាទីក្រុងតេរ៉ង់នឹងប្តេជ្ញាលើកម្មវិធីនុយក្លេអ៊ែររបស់ខ្លួនក្នុងរយៈពេល ៣០ថ្ងៃ ដែលអាចធ្វើឱ្យអឺរ៉ុបពន្យាពេលសកម្មភាពជាក់លាក់មួយចំនួន។
ទីភ្នាក់ងារសារព័ត៌មាន រ៉យទ័រ រាយការណ៍នៅថ្ងៃទី២៨ ខែសីហា ឆ្នាំ២០២៥នេះថា អង់គ្លេស បារាំង និង អាល្លឺម៉ង់ ដែលត្រូវបានគេហៅថាក្រុមអ៊ី៣(E3) បានជួបជាមួយអ៊ីរ៉ង់ កាលពីថ្ងៃអង្គារ ដើម្បីព្យាយាមស្តារឡើងវិញនូវទំនាក់ទំនងការទូតជុំវិញកម្មវិធីនុយក្លេអ៊ែរ មុនពេលពួកគេបាត់បង់សិទ្ធិនៅពាក់កណ្តាលខែតុលា ក្នុងការស្តារទណ្ឌកម្មលើទីក្រុងតេរ៉ង់ ដែលបានដកក្រោមកិច្ចព្រមព្រៀងនុយក្លេអ៊ែរឆ្នាំ២០១៥ ជាមួយប្រទេសមហាអំណាចធំៗ។
អ្នកការទូតអ៊ឺរ៉ុបបីនាក់ និងអ្នកការទូតលោកខាងលិចម្នាក់ បាននិយាយថា កិច្ចពិភាក្សាកាលពីថ្ងៃអង្គារហាក់បីមិនបានផ្តល់ការប្តេជ្ញាពីអ៊ីរ៉ង់គ្រប់គ្រាន់នោះទេ ទោះបីជាពួកគេជឿជាក់ថា នៅមានសិទ្ធិសម្រាប់ការទូតបន្ថែមទៀត ក្នុងសប្ដាហ៍ខាងមុខក៏ដោយ។
អ៊ីបី(E3) បានសម្រេចថា នឹងចាប់ផ្តើមដាក់ទណ្ឌកម្មតាមច្បាប់អង្គការសហប្រជាជាតិ នៅថ្ងៃព្រហស្បតិ៍ ជុំវិញការចោទប្រកាន់ថា អ៊ីរ៉ង់ បានរំលោភលើកិច្ចព្រមព្រៀងជាមួយប្រទេសមហាអំណាចពិភពលោក នៅឆ្នាំ ២០១៥ ដែលមានបំណងរារាំងទីក្រុងតេរ៉ង់(Tehran)ពីការអភិវឌ្ឍអាវុធនុយក្លេអ៊ែរ។
យ៉ាងណា ដំណើរការរបស់អង្គការសហប្រជាជាតិចំណាយរយៈពេល៣០ថ្ងៃ មុនពេលដែលដំណើរការដាក់ទណ្ឌកម្មដែលគ្របដណ្តប់ដោយហិរញ្ញវត្ថុ ធនាគារ និងវិស័យការពារជាតិរបស់អ៊ីរ៉ង់ ត្រូវបានស្តារឡើងវិញ៕
