មន្ត្រីសេតវិមាន បាននិយាយថា ប្រធានាធិបតីសហរដ្ឋអាមេរិក លោក ដូណាល់ ត្រាំ បានធ្វើជាអធិបតីនៅក្នុងកិច្ចប្រជុំគោលនយោបាយស្តីពីសង្រ្គាមអ៊ីស្រាអ៊ែលនៅតំបន់ហ្គាស្សា និងផែនការក្រោយសង្រ្គាមសម្រាប់ទឹកដីប៉ាឡេស្ទីន កាលពីថ្ងៃពុធ ដោយមានការចូលរួមពីអតីតនាយករដ្ឋមន្ត្រី តូនី ប្លែរ (Tony Blair) និងអតីតទូតពិសេសផ្នែកមជ្ឈឹមបូព៌ារបស់ លោក ត្រាំ គឺលោក ជេរែត ខាស្ន៊រ (Jared Kushner)។
ទីភ្នាក់ងារសារព័ត៌មាន រ៉យទ័រ បានរាយការណ៍នៅថ្ងៃទី២៨ ខែសីហា ឆ្នាំ២០២៥ថា មន្ត្រីសេតវិមានរូបនោះបានប្រាប់រ៉យទ័រថា លោក ត្រាំ និងក្រុមមន្ត្រីជាន់ខ្ពស់សេតវិមាន លោក ប្លែរ និងលោក ខាស្ន៊រ បានពិភាក្សាអំពីវិបត្តិចំណាប់ខ្មាំង និងផែនការបង្កើនការផ្តល់ជំនួយស្បៀងអាហារ និងផែនការក្រោយសង្គ្រាម។
លោក ត្រាំ បានសន្យាថា នឹងបញ្ចប់សង្រ្គាមនៅតំបន់ហ្គាស្សាយ៉ាងឆាប់រហ័ស អំឡុងយុទ្ធនាការប្រធានាធិបតីរបស់លោក ប៉ុន្តែដំណោះស្រាយហាក់បីបានអូសបន្លាយរយៈពេល ៧ខែ ក្នុងអាណត្តិទី២ របស់លោក។
អាណត្តិរបស់ លោក ត្រាំ ចាប់ផ្តើមជាមួយនឹងបទឈប់បាញ់ដែលមានរយៈពេល ២ខែ រហូតដល់ការវាយប្រហារអ៊ីស្រាអ៊ែល បានសម្លាប់ជនជាតិប៉ាឡេស្ទីនប្រហែលចំនួន ៤០០នាក់ នៅថ្ងៃទី១៨ ខែមីនា។ យ៉ាងណាថ្មីៗនេះ រូបភាពរបស់ជនជាតិប៉ាឡេស្ទីន ដែលពោពេញទៅដោយភាពស្រេកឃ្លាននៅតំបន់ហ្គាស្សា រួមមាន កុមារ ដែលធ្វើឱ្យពិភពលោកភ្ញាក់ផ្អើល និងមានការរិះគន់ទៅលើសម្ព័ន្ធមិត្តសហរដ្ឋអាមេរិក គឺអ៊ីស្រាអ៊ែលចំពោះស្ថានភាពដែលកាន់តែយ៉ាប់យ៉ឺននេះ។
លើសពីនេះ កាលពីខែកុម្ភៈ លោក ត្រាំ បានស្នើឱ្យសហរដ្ឋអាមេរិកកាន់កាប់តំបន់ហ្គាហ្សា និងការផ្លាស់ទីលំនៅជាអចិន្ត្រៃយ៍របស់ជនជាតិប៉ាឡេស្ទីន ចេញពីទឹកដីឆ្នេរសមុទ្រ ដែលផែនការនេះ ត្រូវបានថ្កោលទោសជាសកល និងដាក់ស្លាកថាជាសំណើ “បោសសម្អាតជាតិសាសន៍” ដោយអ្នកជំនាញខាងផ្នែកសិទ្ធិមនុស្ស និងអង្គការសហប្រជាជាតិ ហើយថាការផ្លាស់ទីលំនៅដោយបង្ខំ គឺខុសច្បាប់ក្រោមច្បាប់អន្តរជាតិ។
យ៉ាងណា ដឹហ្វាយណែនសលថាមស៍ បានរាយការណ៍នៅក្នុងខែកក្កដាថា វិទ្យាស្ថានតូនី ប្លែរ បានចូលរួមក្នុងគម្រោងអភិវឌ្ឍន៍ផែនការហ្គាស្សា ក្រោយសង្រ្គាម ដោយឡែកប្រភពថា ក្រុមអ្នកស្រាវជ្រាវបាននិយាយថា ខ្លួនបានហៅក្រុមផ្សេងគ្នាជជែកជុំវិញគម្រោងហ្គាហ្សាក្រោយសង្រ្គាម ប៉ុន្តែមិនមានករណីណាមួយដែលរួមបញ្ចូលអំពីគំនិតនៃការផ្លាស់ទីលំនៅដោយបង្ខំរបស់មនុស្សក្នុងតំបន់ហ្គាហ្សានោះទេ។
គួររំឭកថា ការបង្ហូរឈាមចុងក្រោយបំផុតនៅក្នុងជម្លោះរវាងអ៊ីស្រាអ៊ែល និងប៉ាឡេស្ទីន ដែលមានអាយុកាលរាប់ទសវត្សរ៍មកហើយនោះ បានកើតឡើងនៅខែតុលា ឆ្នាំ២០២៣ នៅពេលដែលក្រុមសកម្មប្រយុទ្ធហាម៉ាស បានវាយប្រហារលើអ៊ីស្រាអ៊ែល ដោយបានសម្លាប់មនុស្ស ១២០០នាក់ និងចាប់ចំណាប់ខ្មាំងប្រហែល ២៥០នាក់ នេះបើយោងតាមរបាយការណ៍របស់អ៊ីស្រាអែល៕
