យោធាថៃគំរាមប្រើច្បាប់អាជ្ញាសឹក វាយគ្រប់គ្រងយកភូមិជោគជ័យរបស់កម្ពុជា ស្ថិតក្នុងស្រុកអូរជ្រៅ ខេត្តបន្ទាយមានជ័យ ដោយសំអាងថា ទីតាំងនោះជាដែនដីរបស់ខ្លួន ស្ថិតនៅភូមិណងចាន់ បើទោះបី ក្រុមការងារជំនាញនៃប្រទេសទាំងពីរ កំពុងមូលមាត់គ្នាអនុវត្តកិច្ចព្រមព្រៀងបទឈប់បាញ់។
ការណ៍នេះ អ្នកឃ្លាំមើលនិយាយថា ថៃកំពុងប្រើយុទ្ធសាស្ត្រគំរាមផង ចរចាផង ដើម្បីសម្រេចមហិច្ឆតាលេបទឹកដីខ្មែរតាមបន្ទាត់ព្រំដែន តាមផែនទីដែលថៃគូរដោយឯកតោភាគី ដែលមេដឹកនាំខ្មែរ លោក ហ៊ុន សែន ធ្លាប់ហៅថា ជាផែនទីចោរ។
កងកម្លាំងបូរ៉ាផាថៃ កាលពីថ្ងៃទី២៨ ខែសីហានេះ បានប្រកាសប្រើច្បាប់អាជ្ញាសឹក នឹងវាយគ្រប់គ្រងភូមិណងចាន់ ខ្មែរហៅថាភូមិជោគជ័យ ឃុំអូរបីជាន់ ខេត្តបន្ទាយមានជ័យ។
ប្រភពនិយាយថា ការចេញច្បាប់អាជ្ញាសឹកនេះ ដោយសារភាគីកម្ពុជា បាននាំប្រជាជនខ្លួនចូលមកបង្កហេតុចលាចលក្នុងរាជាណាចក្រថៃ ស្ថិតនៅក្នុងទីតាំងភូមិណងចាន់ ស្រុកគូកសួង ខេត្តស្រៈកែវ ដែលតាមពិតទៅភូមិដែលថៃហៅថា ភូមិណងចាន់នោះ ស្ថិតក្នុងដែនអធិបតេយ្យរបស់កម្ពុជា ដែលមានឈ្មោះថាជាភូមិជោគជ័យ ស្ថិតក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ប្រភពបន្តថា ដើម្បីរក្សាអធិបតេយ្យ បូរណភាពដែនដីថៃ កងកម្លាំងបូរ៉ាផា ចាំបាច់ត្រូវប្រើកម្លាំងដើម្បីរារាំង និងទប់ស្កាត់ពលរដ្ឋខ្មែរមិនឱ្យចូលទន្រ្ទានឈ្លានពានដែនអធិបតេយ្យថៃ នៅភូមិណងចាន់នេះទេ។
យោធាថៃ ព្រមានថា ដើម្បីរក្សាភាពរៀបរយនិងសុខសុវត្ថិភាពនៅភូមិណងចាន់ កងកម្លាំងបូរ៉ាផា នឹងចាត់វិធានការត្រួតនិពិត្យនិងគ្រប់គ្រង។
បើយោធាថៃ ភូមិជោគជ័យ ដែលថៃថាណងចាន់ ហាមយកអាវុធគ្រប់ប្រភេទ ហាមបិទផ្លូវដែលប៉ះពាល់ដល់ដំណើរការប្រតិបត្តិការរបស់មន្ត្រី និងមិនឱ្យថតរូបមូលដ្ឋានប្រតិបត្តិការរបស់យោធាថៃជាដើម។
នេះបើយោងតាមការចុះផ្សាយផ្ទាល់របស់គេហទំព័រហ្វេសប៊ុករបស់កងទ័ពជួរមុខថៃ ដែលត្រូវបានប្រព័ន្ធផ្សព្វផ្សាយថៃជាច្រើន បង្ហោះនៅលើបណ្តាញសង្គមនៅថ្ងៃទី២៩ ខែសីហា ឆ្នាំ២០២៥នេះ។
លើសពីនេះ បើតាមការចុះផ្សាយរបស់សារព័ត៌មាន អាំម៉ារិន កាលពីថ្ងៃទី២៨ ខែសីហា បានដកស្តង់សម្តីអ្នកនាំពាក្យក្រសួងការពារជាតិថៃ លោក ណាត់ថាក់ផុន នាគផាណិជ្យ មកចុះផ្សាយថា ដោយមើលឃើញពីស្ថានភាពនៅភូមិណងចាន់ មានសភាពចលាចល ស្នើឱ្យមេទ័ពភូមិភាគទី១ ប្រកាសឱ្យពលរដ្ឋថៃចាកចេញជាបណ្តោះអាសន្ន ដើម្បីសុវត្ថិភាព រងចាំលទ្ធផលចរចាទ្វេភាគីកម្ពុជា-ថៃ GBC បើមិនមានការយល់ព្រមគ្នាត្រង់ចំនុចណាទេ បារម្ភអាចនឹងមានការប៉ះទង្គិចគ្នាម្តងទៀត។
លោក ណាត់ថាក់ផុន និយាយថា ក្នុងឱកាសនេះ សូមឱ្យបងប្អូនថៃចាកចេញពីទីតាំងនេះសិន (បានណងចាន់) ដើម្បីសុវត្ថិភាព ព្រោះប្រសិនបើប្រជាជនកើតការប៉ះទង្គិចគ្នា និងធ្វើឱ្យរឿងកាន់តែវែងឆ្ងាយ ហើយប្រសិនបើរឿងកាន់តែវែងឆ្ងាយឡើង វាអាចនឹងបង្កឱ្យមានការប៉ះទង្គិចគ្នាម្តងទៀតជាដើម។
ការគំរាមរបស់យោធាថៃនេះ ធ្វើឡើងប៉ុន្មានថ្ងៃ ក្រោយពីពលរដ្ឋខ្មែររាប់សិបនាក់ ក្នុងនោះមានទាំងស្រ្តីកូនតូច និងស្តី្រមានផ្ទៃពោះ បានរួមគ្នាប្រឈមមុខជាមួយទាហានថៃ ដែលថៃបានព្យាយាមរាយបន្លាលួសព័ទ្ធយកផ្ទៃដីពួកគេដូចនៅភូមិអូរបីជាន់។
ប៉ុន្តែការប្រឈមមុខដាក់គ្នាពេលនេះ ក្រុមទាហានថៃបានដកថយវិញ ក្រោយមិនអាចទប់ទល់ទៅនឹងប្រតិកម្មរបស់ពលរដ្ឋខ្មែរនៅទីនោះ ហើយរហូតមកដល់ពេល ពលរដ្ឋទាំងនោះ ត្រូវគេអះអាងមកថា ពួកគេនៅបន្តដេកចាំផ្ទះដោយខ្លួនឯង ដោយបារម្ភខ្លាចទាហានថៃមកឈ្លានពានជាលើកទី២។
ជុំវិញរឿងនេះ អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា មិនឆ្លើយនឹងសំណួរដែលភាគីថៃប្រកាសប្រើច្បាប់អាជ្ញាសឹក ដើម្បីរំលោភយកដីខ្មែរនៅភូមិជោគជ័យនោះទេ។
ដោយអ្នកស្រីបាននិយាយក្នុងសម្តីដើមថា៖ ««អរគុណ! សូមទៅស្រាវជ្រាវឱ្យបានច្បាស់លាស់ គ្រប់ជ្រុងជ្រោយផង។ សូមទទួលយកព័ត៌មានតាមការធ្វើបច្ចុប្បន្នភាព អរគុណ!»»។
យ៉ាងនេះក្តី អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា បានថ្លែងក្នុងសន្តិសីទកាសែតនៅថ្ងៃទី២៩ ខែសីហានេះថា កម្ពុជាបន្តប្តេជ្ញាចិត្តយ៉ាងម៉ឺងម៉ាត់គោរព និងអនុវត្តលើបទឈប់បាញ់គ្នាឈានដល់ថ្ងៃទី២៩ ខែកក្កដា ឆ្នាំ២០២៥ ព្រមទាំងកិច្ចព្រមព្រៀង ១៣ចំណុចអនុម័តនៅក្នុងកិច្ចប្រជុំវិសាមញ្ញរបស់គណៈកម្មាធិការព្រំដែនទូទៅកម្ពុជា ថៃ (GBC) នាថ្ងៃទី៧ ខែសីហា ឆ្នាំ២០២៥។
អ្នកស្រីថា៖ «កម្ពុជាសូមគូសបញ្ជាក់យ៉ាងម៉ឺងម៉ាត់ និងច្បាស់លាស់បំផុតនូវការប្ដេជ្ញាចិត្តឥតងាករេ របស់ខ្លួនក្នុងការគោរពនិងអនុវត្តយ៉ាងខ្ជាប់ខ្ជួន នូវបទឈប់បាញ់ដែលសម្រេចបាន កាលពីថ្ងៃទី២៨ ខែកក្កដាឆ្នាំ២០២៥ និងគោលការណ៍ឯកភាពទាំង១៣ចំណុច នៅក្នុងកិច្ចប្រជុំវិសាមញ្ញគណកម្មាធិការកិច្ចការព្រំដែនទូទៅកម្ពុជាថៃ GBC កាលពីថ្ងៃទី២៧ ខែសីហា ឆ្នាំ២០២៥»។
ដោយឡែក តំណាងរាស្រ្តបក្សសង្រ្គោះជាតិ លោក អ៊ុំ សំអាន ប្រាប់VODនៅថ្ងៃទី២៩ ខែសីហានេះថា ការគំរាមរបស់ថៃ គឺថៃចង់សម្រេចមហិច្ឆតាលេបទឹកដីខ្មែរ តាមផែនទីខ្នាត១/៥០០០ ដែលថៃគូរដោយឯកតោភាគី។
លោកបន្តថា ថៃបន្តប្រើផែនទីចោរនេះ ដើម្បីយកលេសបន្តឈ្លានពានទឹកដីខ្មែរតាមទំនើងចិត្ត ហើយទម្លាក់កំហុសដាក់កម្ពុជាដែលជាជនរងគ្រោះ។
លោកថា៖ «កាលណាគេវាយផងចរចាផងហ្នឹង បើគេគ្រប់គ្រងបានសមរភូមិច្រើនកន្លែងហើយ ការចរចាហ្នឹងគឺគេទទួលជោគជ័យអ៊ីចឹងហើយបានគេវាយផង ចរចាផង អាហ្នឹងជាយុទ្ធសាស្ត្រនៃការធ្វើសង្រ្គាម ហើយកាលដែលថៃគេប្រកាសច្បាប់អាជ្ញាសឹកនេះ គឺគេចង់បណ្ដេញប្រជាពលរដ្ឋយើងចេញពីទីតាំងដែលប្រជាពលរដ្ឋយើងឈរជើងប៉ុន្មានថ្ងៃនេះ បន្ទាប់ពីគាត់រើបន្លាលួសរបស់ថៃចេញ»។
សម្រាប់លោក អ៊ុំ សំអាន បារម្ភថា បើថៃបន្តប្រើប្រាស់ផែនទីចោរនេះ ទឹកដីកម្ពុជាតាមបន្ទាន់ព្រំដែននឹងបន្តបាត់បង់ ជាពិសេសភូមិជោគជ័យ ភូមិព្រៃចាន់ និងតំបន់មួយចំនួនទៀត រួមច្រកអានសេះជាដើម បើបក្សកាន់អំណាចកម្ពុជា ខ្វះសមត្ថភាពទប់ទល់។
លោកថា៖ «ថៃគំរាមកំហែងមកលើបូរណភាពទឹកដីកម្ពុជា ព្រោះគេចង់បានដីដែលគេចង់ឈ្លានពានទៅតាមផែនទីខ្នាតមួយលើ៥០ពាន់ ហើយគេយល់ថាខ្មែរយើងកំពុងតែបាក់ស្បាត បន្ទាប់ពីធ្វើសង្គ្រាម៥ថ្ងៃហ្នឹងគឺលែងហ៊ានជាមួយថៃហើយ អ៊ីចឹងហើយថៃគំរាមយកដើម្បីឲ្យគេចង់បានដីកន្លែងណាគេនឹងយកកន្លែងហ្នឹង ហើយយើងនេះខ្លាចសម្លុតថៃឱ្យថៃយកអីយកទៅ»។
ដោយឡែក អ្នកច្បាប់ និងជាអ្នកវិភាគឯករាជ្យ លោក វន់ ចាន់ឡូត និយាយថា ការប្រកាសច្បាប់អាជ្ញាសឹករបស់ទាហានថៃនេះ ឆ្លុះបញ្ចាំងថា ថៃកំពុងប្រើយុទ្ធសាស្រ្ត២ ចរចាផង គំរាមរំលោភយកដីខ្មែផង។
លោកអះអាងថា ចោរសៀមនៅតែចិញ្ចឹមចិត្តឈ្លានពានដីខ្មែរ ដោយសារតែកម្ពុជាខ្សោយ មេដឹកនាំហាក់មិនមានសមត្ថភាពគ្រប់គ្រាន់ក្នុងតតាំងប្រឆាំង ទប់ទល់នឹងទង្វើឈ្លានពានរបស់ចោរសៀមនេះ។
លោកបារម្ភថា បើកម្ពុជាមិនខ្លាំងទេ មិនពឹងសហប្រធានកិច្ចព្រមព្រៀងសន្តិភាពទីក្រុងបារីស ឬប្រទេសមហាអំណាចទេ ថៃនឹងបន្តប្រើផែនទីចោរ រំលោភយកដីខ្មែរតាមខ្សែបន្ទាត់ព្រំដែនមិនចប់នោះទេ។
លោកថា៖ «ការបន្តប្រើប្រាស់ផែនទីដែលគូសជាឯកតោភាគីនេះ គឺគ្រាន់តែជាលេសមួយដ៏សមហេតុផលដើម្បីបំពេញនូវមហិច្ឆតានៃការឈ្លានពានរបស់ភាគីថៃ មកកាន់កម្ពុជា ដូចយើងដឹងហើយភាគីថៃតែងតែទទូចឲ្យកម្ពុជាទទួលយកយន្តការនៃការចរចាជាទ្វេភាគី ដោយបញ្ចៀសទៅការប្ដឹងទៅតុលាការយុត្តិធម៌អន្តរជាតិ។ ទី២ភាគីថៃតែងតែប្រើប្រាស់ការគំរាមកំហែង ប្រើកម្លាំងទ័ពមកលើកម្ពុជា ក្នុងករណីដែលការចរចាបរាជ័យដែលមានន័យថា កម្ពុជាមិនទទួលយកនូវការគោរពតាមផែនទីដែលគូសជាឯកតោភាគីនោះ ប្រាកដណាស់នៅក្នុងនាមចារឹកនៃអ្នកឈ្លានពាន គឺនឹងប្រើប្រាស់នូវកម្លាំងយោធាដើម្បីបំពេញនូវកម្មវត្ថុនៃការឈ្លានពានរបស់ខ្លួនដោយចៀសមិនផុតទេ»។
កន្លងទៅ លោក ហ៊ុន សែន ធា្លប់និយាយក្នុងសភាថា កម្ពុជានឹងមិនអនុញ្ញាតឱ្យថៃប្រើផែនទីនេះ ដើម្បីកំណត់បន្ទាត់ព្រំដែននោះទេ ដោយចាត់ទុកផែនទីដែលថៃគូរដោយឯកតោភាគីនោះថាជាផែនទីចោរ។
លោកថា៖ «យើងគ្រាន់តែធ្វើការដាស់តឿនចំពោះអ្នកតែប៉ុណ្ណោះ ចំពោះមុខប្រជាជាតិរបស់យើង យើងមានតម្លាភាពចំពោះការប្រើប្រាស់ផែនទី។ ផែនទីចោរដែលឈ្លានពានយើងកាលពីឆ្នាំ២០០៨ យើងមិនគម្បីត្រូវបានប្រើប្រាស់ទៀតទេ យើងសុំប្រាប់អ្នកឱ្យបានដឹង»។
ប៉ុន្តែមួយខែកន្លងទៅនេះ ថៃមិនបានគោរពបទឈប់បាញ់នេះទេ ដោយចល័តទ័ពចូលចាប់ទាហានខ្មែរ២០នាក់ ដល់ក្នុងបន្ទាយនៅព្រំដែនជួរមុខ រហូតបច្ចុប្បនៅ១៨នាក់ទៀត ដែលថៃមិនទាន់ប្រគល់ឱ្យកម្ពុជានៅឡើយ ទោះកម្ពុជាបន្តអំពាវនាវនិងរកអន្តរាគមន៍ពីសហគមន៍អន្តរជាតិ។
លើសពីនេះ យោធាថៃបានចល័តទ័ពចូលទៅរាយបន្លាលួសព័ទ្ធយកប្រាសាទតាមាន់ធំ ក្នុងខេត្តឧត្តរមានជ័យ ព័ទ្ធយកតំបន់អានសេះ ខេត្តព្រះវិហារ និងភូមិអូរបីជាន់ និងគំរាមចុះរុះរើផ្ទះពលរដ្ឋជិត២០០ខ្នងទៀត នៅភូមិណងចាន់ ស្រុកអូរជ្រៅ ខេត្តបន្ទាយមានជ័យ ខណៈភាគីកម្ពុជាមិនតបតដោយប្រកាសជំហរយ៉ាងម៉ឺងម៉ាត់គោរពបទឈប់បាញ់៕
