ប្រធានាធិបតីប្រទេសឥណ្ឌូនេស៊ី លោក ប្រាបូវូ សាប់ប៊ីយ៉ាតូ (Prabowo Subianto)កាលពីថ្ងៃអាទិត្យបានបញ្ជាឱ្យកងកម្លាំងសន្តិសុខចាត់វិធានការយ៉ាងម៉ឺងម៉ាត់ ទប់ទល់ទៅនឹងភាពចលាចលដែលបានវាយលុកទីក្រុងជាច្រើននៅទូទាំងប្រទេស។
លើសពីនេះ ថែមទាំងបានប្រកាសថា សមាជិកសភាបានយល់ព្រមលុបចោលចំពោះការតំឡើងប្រាក់ឧបត្ថម្ភលំនៅដ្ឋានដែលជាភាពទុក្ខសោកដ៏សំខាន់មួយរបស់អ្នកតវ៉ា។
សារព័ត៌មាន នីគីអេស៊ា(Nikkie Asia) បានរាយការណ៍នៅថ្ងៃទី៣១ ខែសីហា ឆ្នាំ២០២៥នេះថា ផ្លូវនានានៅទីក្រុងចាកាតា និងទីក្រុងផ្សេងទៀត មានសភាពស្ងប់ស្ងាត់កាលពីថ្ងៃអាទិត្យ ដោយមានវត្តមានប៉ូលីសនិងយោធាជាច្រើននៅក្នុងតំបន់កណ្តាលនៃរដ្ឋធានីដែលធ្លាប់មានការតវ៉ា។ ទោះជាយ៉ាងណាក៏ដោយចំនួនអ្នកស្លាប់បានកើនឡើងដល់ ៧នាក់ កាលពីថ្ងៃអាទិត្យ បន្ទាប់ពីមានការរាយកាណ៍បន្ថែមពីការស្លាប់ចំនួនពីរករណី។
ភាពចលាចល គឺជាការគំរាមកំហែងដ៏ធំបំផុតដែលលោក ប្រាបូវូ (Prabowo) បានប្រឈមមុខនៅក្នុងតំណែងប្រធានាធិបតីរយៈពេល ១០ខែរបស់លោក។ ភាពចលាចលនេះផងដែរ បានជំរុញលោកឱ្យលុបចោលគម្រោងទស្សនៈកិច្ចទៅប្រទេសចិន ដែលជាកិច្ចប្រជុំកំពូលរបស់អង្គការសហប្រតិបត្តិការសៀងហៃ ជាកន្លែងដែលលោកបានគ្រោងនឹងជួបជាមួយប្រធានាធិបតី ស៊ី ជីនពីង (Xi Jinping)។
ការតវ៉ានេះ បង្កឡើងដោយការខកចិត្តរបស់សាធារណជន ចំពោះភាពពិបាកនៃសេដ្ឋកិច្ច និងការកើនឡើងនៃប្រាក់ខែរបស់សមាជិកសភា ដែលការតវ៉ានេះចាប់ផ្តើមនៅថ្ងៃទី២៥ ខែសីហា ឆ្នាំ២០២៥ និងបានបង្កើនការចលាចលដ៏ហិង្សារយៈពេល៣ថ្ងៃ គឺចាប់ពីថ្ងៃព្រហស្បតិ៍ដល់ថ្ងៃសៅរ៍ ដោយផ្តោតលើការទាមទារឱ្យកាត់បន្ថយអត្ថប្រយោជន៍លើសរបស់សមាជិកសភា រួមទាំងប្រាក់ឧបត្ថម្ភលំនៅដ្ឋានប្រចាំខែចំនួន ៥០លានរូពីស្មើប្រមាណ ៣ ១០០ដុល្លារ ដែលច្រើនជាងប្រាក់ឈ្នួលអប្បបរមាជាតិចំនួនដប់ដង។
ភាពចលាចលដែលបានផ្ទុះឡើងនៅក្នុងក្រុងហ្សាកាតា បានពង្រីកដល់កោះជ្វា(Java) កោះបាលី(Bali)ភាគខាងលិច នុសា តេងហ្គារ៉ា (Nusa Tenggara) កាលីម៉ាន់តាន់ Kalimantan និងស៊ូវេស៊ី Sulawesi បន្ទាប់ពីការបង្រ្កាបដោយហិង្សាកាលពីយប់ថ្ងៃព្រហស្បតិ៍៕
