មេធាវីការពារសិទ្ធិឱ្យ លោក ថាច់ សេដ្ឋា អនុប្រធានគណបក្សភ្លើងទៀន បានស្នើដល់តុលាការក្រុងភ្នំពេញ កុំចាត់ការទៅលើបណ្តឹងថ្មី ដែលមេធាវីតំណាងគណបក្សប្រជាជនកម្ពុជា បានប្តឹងកូនក្តីរបស់លោក ដោយលើកហេតុផលថា បណ្តឹងនេះជាអង្គហេតុចាស់ ដែលអនុប្រធានបក្សប្រឆាំងរូបនេះធ្លាប់បានអនុវត្តទោសរួចមកហើយ។
តំណាងអយ្យការអមសាលាដំបូងរាជធានីភ្នំពេញ នៅថ្ងៃទី០៤ ខែកញ្ញា ឆ្នាំ២០២៥នេះ បានកោះហៅលោក ថាច់ សេដ្ឋា និងមេធាវីការពារសិទ្ធិរបស់លោក ឱ្យចូលទៅបំភ្លឺជុំវិញបណ្តឹងដែលលោក គី តិច មេធាវីតំណាងគណបក្សប្រជាជនកម្ពុជា ប្តឹងករណីដែលលោក ថាច់ សេដ្ឋា បានថ្លែងពេលជួបសំណេះសំណាលជាមួយពលករខ្មែរនៅឯប្រទេសកូរ៉េខាងត្បូង កាលពីថ្ងៃទី០៨ ខែមករា ឆ្នាំ២០២៣ ដែលការថ្លែងនោះបំផ្លើសការពិត និងជាការផ្តល់ព័ត៌មានក្លែងក្លាយ មានចេតនាទុច្ចរិតទម្លាក់កំហុស និងមួលបង្កាច់ធ្វើឱ្យប៉ះពាល់ធ្ងន់ធ្ងរដល់កិត្តិយសរបស់គណបក្សប្រជាជនកម្ពុជា។
លោក អែម ចន្ថា ជាមេធាវីការពារសិទ្ធិឱ្យលោក ថាច់ សេដ្ឋា បានឱ្យដឹងថា អំឡុងពេលបំភ្លឺនៅតុលាការនាព្រឹកមិញនេះ លោក ថាច់ សេដ្ឋា បានប្រាប់ទៅតំណាងអយ្យការថា បណ្តឹងថ្មីរបស់គណបក្សប្រជាជនកម្ពុជា ដែលប្តឹងពាក់ព័ន្ធនឹងការថ្លែងរបស់គាត់នៅប្រទេសកូរ៉េខាងត្បូងនោះ ជាអង្គហេតុចាស់ ឬស្ថិតក្នុងសំណុំរឿងចាស់ដែលគាត់បានអនុវត្តទោសរួចហើយ ទៅតាមសាលក្រមជាស្ថាពររបស់តុលាការកំពូល។
ការណ៍នេះ លោកមេធាវីថា រូបលោក ក៏ដូចជាលោក ថាច់ សេដ្ឋា បានស្នើទៅតំណាងអយ្យការ ពិចារណាក្នុងការតម្កល់សំណុំរឿង ឬកុំចាត់ការទៅលើបណ្តឹងថ្មីនេះ ព្រោះជាអង្គហេតុចាស់ ឬអង្គហេតុតែមួយដែលធ្លាប់អនុវត្តទោសរួច ដែលមិនអាចធ្វើការចោទប្រកាន់ជាថ្មីទៀតបានទេ។
លោកថា៖ «នេះជាបណ្តឹងថ្មី ប៉ុន្តែចោទប្រកាន់ទៅលើព្រឹត្តិការណ៍ដែលគាត់[លោកថាច់ សេដ្ឋា]នៅកូរ៉េ ដូចបណ្តឹងលើកមុនដដែល ដែលធ្លាប់កាត់ទោសហើយ។ ក្នុងនាមជាមេធាវី ហើយនិងកូនក្តី បានស្នើសុំ ជាពិសេសគឺសាម៉ីខ្លួនគាត់តែម្តង គឺស្នើសុំឱ្យតុលាការធ្វើការតម្កល់រឿងចោលឥតចាត់ការ ព្រោះវាជាអង្គហេតុដដែល»។
វីអូឌី មិនអាចសុំការឆ្លើយតបជុំវិញការស្នើនេះ ពីតំណាងអយ្យការអមសាលាដំបូងរាជធានីភ្នំពេញ លោក ប្លង់ សុផល ដែលជាអ្នកចេញលិខិតអញ្ជើញមេធាវី និងលោក ថាច់ សេដ្ឋា ឱ្យទៅបំភ្លឺនៅថ្ងៃនេះបានទេ។
ភរិយាលោក ថាច់ សេដ្ឋា គឺអ្នកស្រី ថាច់ សុខបូរ៉ានី មានប្រសាសន៍ថា អ្នកស្រីពុំបានដឹងថាតុលាការកោះហៅស្វាមីអ្នកស្រីជុំវិញសំណុំរឿងអ្វីនោះទេ ខណៈសមត្ថកិច្ចនៅតុលាការហាក់មានការរឹតត្បិតខ្លាំងទៅលើរូបគាត់ មិនឱ្យជួបនឹងស្វាមី។ អ្នកស្រីបន្តថា សកម្មភាពរបស់លោក ថាច់ សេដ្ឋា កន្លងមក គឺធ្វើដើម្បីជាតិមាតុភូមិ ដោយពុំបានប្រព្រឹត្តខុសដូចការចោទប្រកាន់ឡើយ។
អ្នកស្រីនិយាយថា៖«ខ្ញុំចង់សំណូមពរថា បើឌុបប្តីខ្ញុំមក សុំឱ្យខ្ញុំបានជួបគាត់ និយាយជាមួយគាត់ឱ្យស្រួលបួលបន្តិច កុំឱ្យប៉ូលីសហាមឃាត់ពួកខ្ញុំពេក ដល់ពេលចឹងខ្ញុំជាគ្រួសារគាត់ ខ្ញុំតែងតែឈឺចាប់ ឈឺចាប់ជាខ្លាំងតែម្តង ហាមឃាត់រហូត មិនដឹងថាហាមឃាត់រឿងអី ព្រោះខ្ញុំមិនមែនជនល្មើសអីខុសស្អីណា គ្រាន់តែរឿងគាត់ធ្វើដើម្បីជាតិសោះខុសដែរអី»។
អ្នកនយោបាយជំទាស់ លោកថាច់ សេដ្ឋា ដែលបច្ចុប្បន្នជាអនុប្រធានគណបក្សភ្លើងទៀន កំពុងអនុវត្តទោសក្នុងពន្ធនាគារ ក្រោមបទល្មើសចំនួន២។ កាលពីថ្ងៃទី២១ ខែកញ្ញា ឆ្នាំ២០២៣ លោកត្រូវតុលាការក្រុងភ្នំពេញ សម្រេចផ្តន្ទាទោសដាក់ពន្ធនាគាររយៈពេល ១៨ខែ និងបង្គាប់ឲ្យសងសំណងរដ្ឋប្បវេណី និងជំងឺចិត្តដើមបណ្តឹងជាង ៣ម៉ឺនដុល្លារទៀត នៅក្នុងសំណុំរឿងចេញសែកគ្មានសាច់ប្រាក់ តែគណបក្សប្រឆាំងបានច្រានចោល។
លោក ថាច់ សេដ្ឋា ដែលជាប្រធានសហគមន៍ខ្មែរកម្ពុជាក្រោមផងនោះ ក៏ត្រូវតុលាការក្រុងភ្នំពេញ កាលពីថ្ងៃទី១៨ ខែតុលា ឆ្នាំ២០២៣ កាត់ទោសក្នុងសំណុំរឿងមួយទៀត ឲ្យជាប់ពន្ធនាគារចំនួន៣ឆ្នាំ និងពិន័យជាទឹកប្រាក់ចំនួន៤លានរៀល ពីបទញុះញង់បង្កភាពវឹកវរ ពាក់ព័ន្ធនឹងការនិយាយពីប្រវត្តិសាស្ត្រវៀតណាមលេបទឹកដីខ្មែរ៕
