នៅក្នុងវីដេអូ ដែលមានរយៈពេលជាង ៣នាទី បង្ហោះឡើងវិញដោយសកម្មជនចលនាមាតាធម្មជាតិ បានលាតត្រដាងថា អាណាចក្រជំនួញរបស់លោក ឆៃ ជីងហ៊ាង កំពុងចាក់ឫសយ៉ាងជ្រៅនៅក្នុងទំនាក់ទំនងនយោបាយ ដែលក្រុមហ៊ុនចំនួន២ ក្នុងចំណោមក្រុមហ៊ុនទាំង ៤១របស់លោក កំពុងមានទំនាក់ទំនងជាមួយគ្រួសារត្រកូលហ៊ុន និងអ្នកមានអំណាចក្នុងជួររដ្ឋាភិបាល។
ប្រភពបានបង្ហាញថា ក្រុមហ៊ុនចំនួន២ របស់លោក ឆៃ ជីងហ៊ាង លោករកស៊ីពុករលួយជាមួយគ្រួសារមេដឹកនាំត្រកូលហ៊ុននោះ រួមមាន ក្រុមហ៊ុន HKLCH IMPORT EXPORT ដែលមានក្មួយបង្កើតរបស់ប្រធានព្រឹទ្ធសភា លោក ហ៊ុន សែន គឺលោកស្រី ហ៊ុន គឹមឡេង ជាម្ចាស់ភាគហ៊ុនផងដែរ និងទីពីរ គឺក្រុមហ៊ុន អង្គរមាស (ANGAR MEAS) ដែលមានអតីតមន្ត្រីរដ្ឋបាលព្រៃឈើខេត្តកំពង់ធំ និងត្រូវជាប្អូនថ្លៃរបស់ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ លោក គន់ គីម គឺលោក គឹង វណ្ណៈ។
តាមវីដេអូស៊ើបអង្កេតដដែល បានឱ្យដឹងថា កាលពីឆ្នាំ២០១៦ ក្រុមហ៊ុនរបស់លោក ឆៃ ជីងហ៊ាង ធ្លាប់ទទួលរងការស៊ើបអង្កេតពីក្រសួងរ៉ែ និងថាមពល ពាក់ព័ន្ធនឹងការជីកយករ៉ែមាសខុសច្បាប់នៅខេត្តរតនគិរី ដែលប្រតិបត្តិការនេះ ខុសពីវិសាលភាពនៃអាជ្ញាប័ណ្ណបូមខ្សាច់ ដែលលោកទទួលបាន។
ក្នុងឆ្នាំដដែលនោះ ក្រុមហ៊ុន ឆៃ ជីងហ៊ាង គ្រុប និងក្រុមហ៊ុន ជីនយ័ន ហ្វីងលាន ខូ អិលធីឌី (JINYIAN HUANGLIAN TRADKING Co., Ltd) សាងសង់ទីតាំងកែច្នៃវល្លិ៍រមៀត នៅក្នុងឃុំប្ញស្សីជ្រុំ នៅស្រុកថ្មបាំង ខេត្តកោះកុង ដោយខុសច្បាប់ និងការគ្រោងប្រមូលវល្លិ៍រមៀត នៅក្នុងតំបន់ការពារធម្មជាតិ ភូមិសាស្ត្រខេត្តកោះកុង ទៀតផង។ កាលនោះ រដ្ឋមន្ត្រីក្រសួងបរិស្ថាន លោកសាយ សំអាល់ បានចាត់ទុកថា ការកែច្នៃវល្លិ៍រមៀត គឺជាសកម្មភាពផ្ទុយ នឹងច្បាប់ស្តីពីតំបន់ការពារធម្មជាតិ ត្រង់មាត្រា៦១ ដែលត្រូវផ្តន្ទាទោសជាបទល្មើសធនធានធម្មជាតិថ្នាក់ទី៣ និងច្បាប់ស្តីពីព្រៃឈើ ត្រង់មាត្រា៩៧ ដែលត្រូវផ្តន្ទាទោស ជាបទល្មើសព្រៃឈើថ្នាក់ទី១។
ទោះជាយ៉ាងនេះក្ដី ចលនាមាតាធម្មជាតិ រកឃើញថា ទោះបីក្រុមហ៊ុនរបស់ លោក ឆៃ ជីងហ៊ាង បានបំពានបទបញ្ញត្តិសម្បទានយ៉ាងណាក៏ដោយ នៅថ្ងៃទី៣ ខែមិថុនា ឆ្នាំ២០២២ ក៏ក្រុមហ៊ុនរបស់លោកឈ្មោះ K.P Cement នៅតែបានទទួលដីសម្បទានក្នុងតំបន់ព្រៃឡង់ ចំនួនជិត១ពាន់ហិកតា (៩៣៨ហិកតា) ដោយមានការយល់ព្រមពីអតីតរដ្ឋមន្ត្រីក្រសួងរ៉ែ និងថាមពល គឺលោក ស៊ុយ សែម។
តែយ៉ាងណា កំឡុងពេលនោះ ក្រុមហ៊ុនរបស់លោក ឆៃ ជីងហ៊ាង បានកាប់ឆ្ការព្រៃឈើលើសពីទំហំដី ដែលក្រុមហ៊ុនលោកទទួលបាន និងដឹកឈើប្រណិតទាំងឡានៗ ឆ្ពោះទៅកាន់ផ្លូវធំ។ នេះបើយោងតាមវីដេអូស៊ើបអង្កេតដែលអង្គការមាតាធម្មជាតិ ធ្លាប់ផ្សព្វផ្សាយកាលពី៣ខែមុន និងត្រូវបានយកមកផ្សព្វផ្សាយម្ដងទៀត ដោយសកម្មជនចលនាមាតាធម្មជាតិ គឺអ្នកស្រី ស៊ុន រដ្ឋា។
ថ្លែងប្រាប់វីអូឌី នៅថ្ងៃទី០៣ ខែមិថុនា អ្នកស្រី ស៊ុន រដ្ឋា ឱ្យដឹងថា ការចាក់ផ្សាយវីដេអូនេះឡើងវិញ គឺដើម្បីស្នើទៅកាន់ក្រសួងបរិស្ថានជាថ្មីម្ដងទៀត ឱ្យបើកការស៊ើបអង្កេត និងតាមដានការអភិវឌ្ឍលើដីសម្បទាន ដែលក្រុមហ៊ុន KP Cement ទទួលបាននៅព្រៃឡង់។ អ្នកស្រីបន្តថា ភាពស្ងប់ស្ងាត់របស់ក្រសួង កំពុងធ្វើឱ្យប្រជាពលរដ្ឋព្រួយបារម្ភពីជោគវាសនាធនធានធម្មជាតិនៅកម្ពុជា ក្រោយធ្លាក់ទៅក្នុងដៃឈ្មួញដែលមានប្រវត្តិបង្កវិនាសកម្មព្រៃឈើ។
អ្នកស្រី ស៊ុន រដ្ឋា ថ្លែងថា៖ «យើងក៏បានតាំងចិត្តហើយដែរ ថាគេនឹងមិនឆ្លើយតបជាមួយនឹងរឿងទាំងអស់ហ្នឹងទេ ព្រោះដោយសារតែរឿងហ្នឹង គឺយើងធ្វើការស៊ើបអង្កេតដោយមានភស្តុតាងជាក់លាក់ មានឯកសារច្បាស់លាស់ត្រឹមត្រូវ ដើម្បីបង្ហាញជាសាធារណៈ។ អ្វីដែលយើងរំពឹង គឺយើងគ្រាន់តែរំពឹងថាបន្ទាប់ពីប្រជាជនខ្មែរបានឃើញនូវវីដេអូទាំងអស់ហ្នឹង គាត់នឹងហ៊ានក្រោកឡើងដើម្បីទាមទារ ប្រើប្រាស់អំណាចរបស់ខ្លួនឯង ដើម្បីទាមទារឱ្យមានតម្លាភាព មានគណនេយ្យភាព ក្នុងការអភិវឌ្ឍប្រទេស មានការគិតគូរពីធនធានធម្មជាតិ ក៏ដូចជាគិតគូរពីសុខភាពរបស់ប្រជាពលរដ្ឋ»។
ការធ្វើវីដេអូស៊ើបអង្កេតរបស់ក្រុមចលនាមាតាធម្មជាតិ ធ្វើឡើងក្រោយរដ្ឋាភិបាល កាលពីថ្ងៃទី៣ ខែមករា ឆ្នាំ២០២៥ បានប្រកាសពីការសម្រេចកាត់ដីចំនួន ៩៩ហិកតា បន្ថែមទៀត នៅក្នុងដែនជម្រកសត្វព្រៃ ព្រៃឡង់ ឱ្យទៅក្រុមហ៊ុន K.P Cement សម្រាប់បង្កើតរោងចក្រផលិតស៊ីម៉ងត៍។
ដំណឹងផ្ដល់ដីសម្បទានជាបន្តបន្ទាប់ ទៅកាន់ក្រុមហ៊ុនរបស់ លោក ឆៃ ជីងហ៊ាង បានបង្កការព្រួយបារម្ភដល់សកម្មជនបរិស្ថាន ស្របពេលដែលតំបន់ព្រៃក្រាស់មួយនេះ កំពុងរងការកាប់បំផ្លាញពីឈ្មួញរកស៊ីឈើគ្រាក់ៗដទៃទៀត។
វីអូឌី នៅមិនទាន់ទទួលបានការឆ្លើយតបពីអ្នកនាំពាក្យក្រសួងបរិស្ថាន លោក ខ្វៃ អាទិត្យា ជុំវិញរឿងនេះបានទេនៅថ្ងៃទី៣ ខែកញ្ញា ដោយលោកប្រាប់ថាកំពុងជាប់ប្រជុំ។
លោក ខ្វៃ អាទិត្យា និយាយថា៖ «កំពុងជាប់ប្រជុំតែបន្តិចទេ ចាំម្ដងទៀតទៅណា ចាំម្ដងទៀត»។
យ៉ាងណាក៏ដោយចុះ សកម្មជនបរិស្ថាន និងសហគមន៍ការពារធនធានធម្មជាតិ បានបើកយុទ្ធនាការជំរុញឱ្យរដ្ឋាភិបាលលុបចោលអនុក្រឹត្យដែលអនុញ្ញាតឱ្យក្រុមហ៊ុនឯកជនសាងសង់រោងចក្រស៊ីម៉ងត៍ លើផ្ទៃដីព្រៃការពារ ៩៩ហិកតា ក្នុងដែនជម្រកសត្វព្រៃព្រៃឡង់។ ពួកគេបានលើកឡើងថា ការផ្ដល់ដីសម្បទាននេះ នឹងធ្វើឱ្យប៉ះពាល់ដល់ជីវចម្រុះព្រៃឈើ អាកាសធាតុប្រែប្រួល និងបង្កឱ្យមានភាពកង្វក់ដល់បរិស្ថានធ្ងន់ធ្ងរ៕
