ក្នុងជំនួបទល់មុខជាមួយភារធារីស្តីទីស្ថានទូតសហរដ្ឋអាមេរិកប្រចាំនៅកម្ពុជានៅថ្ងៃសុក្រនេះ មេដឹកនាំបក្សកាន់អំណាច លោក ហ៊ុន សែន លើកឡើងពីក្តីបារម្ភជុំវិញស្ថានការណ៍ព្រំដែន ដែលថៃដាក់បន្លាលួសជាបន្តបន្ទាប់ក្រោយបទឈប់បាញ់។
ការណ៍នេះ លោក ហ៊ុន សែន ចង់ឱ្យសហរដ្ឋអាមេរិកតាមដានយកចិត្តទុកដាក់ ចំពោះបញ្ហាដែលកំពុងកើតមានឡើង ដើម្បីធ្វើយ៉ាងណាធានាឲ្យបាននូវការគោរពបទឈប់បាញ់ឲ្យបានពេញលេញ។
នេះបើតាមព័ត៌មានដែលគេទម្លាយឱ្យដឹងនៅលើហ្វេសប៊ុក លោក ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា នៅថ្ងៃទី៥ ខែកញ្ញា ឆ្នាំ២០២៥នេះ។
បើតាមប្រភពដដែល នៅព្រឹកថ្ងៃសុក្រ ទី៥ ខែកញ្ញា លោក ហ៊ុន សែន បានជួបជាមួយ លោកស្រី Bridgette L. Walker ភារធារីស្តីទីស្ថានទូតសហរដ្ឋអាមេរិកប្រចាំនៅកម្ពុជា នៅវិមានព្រឹទ្ធសភា។
ក្នុងជំនួបនោះ លោក ហ៊ុន សែន បានប្រាប់ភាគីអាមេរិកថា បទឈប់បាញ់ដែលកម្ពុជា និងថៃ មានជាមួយគ្នាកាលពីថ្ងៃ២៨ ខែកក្កដាកន្លងទៅនេះ គឺមិនអាចកើតមានបានឡើយ ប្រសិនបើមិនមានគំនិតផ្តួចផ្តើមរបស់លោកប្រធានាធិបតីសហរដ្ឋអាមេរិក ដូណាល់ ត្រាំ ក្នុងការចូលរួមចំណែកជួយដោះស្រាយឱ្យទាន់ពេលវេលានោះទេ។
លោកអរគុណយ៉ាងខ្លាំង ចំពោះការចាត់វិធានការទាន់ពេលវេលារបស់រដ្ឋបាលលោក ដូណាល់ ត្រាំ និងរដ្ឋមន្ត្រីការបរទេសសហរដ្ឋអាមេរិក ដែលបានយកចិត្តទុកដាក់ក្នុងការតាមដាន និងដោះស្រាយបញ្ហាជម្លោះព្រំដែនកម្ពុជា-ថៃ។
សម្រាប់ លោក ហ៊ុន សែន បទឈប់បាញ់តាមរយៈការចូលរួមចំណែកពីប្រធានធិបតី ដូណាល់ ត្រាំ គឺបានជួយដល់ប្រទេសទាំងសងខាង ជាពិសេសកុំឱ្យមានទាហាន និងប្រជាពលរដ្ឋស្លាប់ក្នុងការផ្ទុះអាវុធបន្តទៀត។ យ៉ាងណា លោកបានបង្ហាញនូវក្តីព្រួយបារម្ភ ចំពោះស្ថានការណ៍ចុងក្រោយនៃបញ្ហាព្រំដែនកម្ពុជា និងថៃ ជាពិសេសការបន្តដាក់បន្លាលួសជាបន្តបន្ទាប់ ដែលចំណុចនេះលោកចង់ឱ្យសហរដ្ឋអាមេរិកតាមដានយកចិត្តទុកដាក់ចំពោះបញ្ហាដែលកំពុងកើតមានឡើង ដើម្បីធ្វើយ៉ាងណាធានាឲ្យបាននូវការគោរពបទឈប់បាញ់ឲ្យបានពេញលេញ។
លោកគូសបញ្ជាក់ថា កម្ពុជាបានអត់ធ្មត់គ្រប់បែបយ៉ាង ដើម្បីធានាការគោរពបទឈប់បាញ់ដែលបានសម្រេចជាមួយគ្នា ហើយជាជំហររបស់កម្ពុជា គឺកម្ពុជាចង់ឱ្យស្ថានភាពព្រំដែនកម្ពុជា-ថៃ ត្រឡប់មករកភាពប្រក្រតីឡើងវិញ។ លោកថា កម្ពុជាបានអ្នកសង្កេតការណ៍ជាក់លាក់ ដើម្បីធានានូវការអនុវត្តនូវបទឈប់បាញ់នេះឱ្យមានប្រសិទ្ធភាព។
ក្រោយបទឈប់បាញ់ចូលជាធរមាន ទាហានថៃបានចល័តទ័ពចូលមកចាប់ខ្លួនទាហានកម្ពុជា នៅជួរមុខចំនួន២០នាក់ ដែលបច្ចុប្បន្ននៅសល់ទាហានខ្មែរ ១៨នាក់ទៀត ថៃមិនទាន់ប្រគល់ឱ្យកម្ពុជាវិញទេ ទោះកម្ពុជាអំពាវនាវជាង១ខែទៅនេះក្តី។
លើសពីនេះ ថៃបានចូលមករាយបន្លាលួសព័ទ្ធយកប្រាសាទតាមាន់ធំ តំបន់អានសេះ ភូមិព្រៃចាន់ ភូមិអូរបីជាន់ ក្នុងស្រុកអូរជ្រៅ ខេត្តបន្ទាយមានជ័យ និងគំរាមប្រើកម្លាំងយោធារុះរើផ្ទះពលរដ្ឋខ្មែរ១៧០ខ្នង នៅភូមិជោគជ័យ ខណៈរដ្ឋាភិបាលកម្ពុជា នៅបន្តអត់ធ្មត់ ដែលធ្វើឱ្យពលរដ្ឋនៅភូមិជោគជ័យ ចេញប្រឈមមុខជាមួយទាហានថៃយ៉ាងតិចពីរដង ប្រឆាំងនឹងទង្វើឈ្លានពានរបស់ថៃ ចាប់ពីពេលមានបទឈប់បាញ់មក។
បញ្ហានេះ អ្នកឃ្លាំមើលបារម្ភថា ភូមិខ្មែរមួយចំនួនជាប់ព្រំដែន នឹងត្រូវថៃច្បាមយកជារៀងរហូត ដូចករណីវៀតណាមច្បាមយកដីខ្មែរ នៅតាមព្រំដែនដែរ បើរដ្ឋាភិបាលកម្ពុជាមិនប្រើយន្តការអន្តរជាតិ នាំយកសំណុំរឿងព្រំដែនទៅកាន់តុលាការយុត្តិធម៌អន្តរជាតិ(ICJ) និងប្តឹងទៅសហប្រធាននៃកិច្ចព្រមព្រៀងសន្តិភាពទីក្រុងប៉ារីសឱ្យកោះប្រជុំបន្ទាន់ទេនោះ៕
