ក្រុមនិស្សិតបានជួបជាមួយមន្ត្រីជាន់ខ្ពស់២រូប កាលពីថ្ងៃព្រហស្បតិ៍ ដើម្បីដាក់ពាក្យបណ្តឹងរបស់ពួកគេ បន្ទាប់ពីការតវ៉ាជាងមួយសប្តាហ៍ រងការបង្ក្រាបដោយហិង្សា ពីប៉ូលីសប្រឆាំងនឹងក្រុមបាតុករ ខណៈការតវ៉ានោះជំទាស់ទៅនឹងការដំឡើងប្រាក់ខែដល់សមាជិកភាពលើស១០ដង នៃប្រាក់ចំណូលពលរដ្ឋ។
ទីភ្នាក់ងារសារព័ត៌មាន រ៉យទ័រ បានរាយការណ៍នៅថ្ងៃទី០៤ ខែកញ្ញា ឆ្នាំ២០២៥នេះថា ក្រុមមនុស្សដែលដឹកនាំដោយនិស្សិត កម្មករ និងក្រុមសិទ្ធិមនុស្ស បានដើរដង្ហែរតាមផ្លូវក្នុងរដ្ឋធានី កាលពីសប្តាហ៍មុន ដើម្បីប្រឆាំងនឹងការបង្កើនអត្ថប្រយោជន៍ដល់សភា ដែលបង្កឱ្យមានភាពចលាចលរីករាលដាលពាសពេញប្រទេស បន្ទាប់ពីរថយន្តរបស់ប៉ូលិសបានបើកបុកអ្នករត់ម៉ូតូឌុបម្នាក់ស្លាប់។
ក្រុមនិស្សិតដែលទាមទារឱ្យមានកិច្ចប្រជុំជាមួយលោកប្រធានាធិបតី ប្រាបូវូ សាប់ប៊ីយ៉ាន់តូ (Prabowo Subianto) បាននិយាយថា ពួកគេបានកំណត់ករណីរបស់ពួកគេ ប៉ុន្តែមិនបានធ្វើការលើកឡើងអំពីការសម្បទានជាក់លាក់ណាមួយពីរដ្ឋាភិបាលនោះទេ។
ដោយឡែក រដ្ឋមន្ត្រីលេខាធិការដ្ឋានរដ្ឋ លោក ប្រាសិត្យូ ហាទី (Prasetyo Hadi) ដែលជាមន្ត្រីមួយរូបនៅក្នុងកិច្ចប្រជុំនោះ បាននិយាយថា រដ្ឋាភិបាលនឹងសិក្សាអំពីការទាមទាររបស់និស្សិត ប៉ុន្តែមិនបានបញ្ជាក់លម្អិតបន្ថែមទេ។
នៅមុននេះ មន្ត្រីជាន់ខ្ពស់ទទួលបន្ទុកកិច្ចការច្បាប់របស់ប្រទេសឥណ្ឌូនេស៊ី លោក យូស្រ៊ីល ឡាស្សា ម៉ាហែនដ្រា (Yusril Ihza Mahendra) បាននិយាយថា មន្ត្រីដែលពាក់ព័ន្ធនឹងការបុកស្លាប់អ្នករត់ម៉ូតូឌុបអាចប្រឈមមុខនឹងនីតិវិធីព្រហ្មទណ្ឌ។
យ៉ាងណា អង្គការឃ្លាំមើលសិទ្ធិមនុស្សដែលមានមូលដ្ឋាននៅទីក្រុងញូវយ៉ក បាននិយាយថា អាជ្ញាធរប្រទេសឥណ្ឌូនេស៊ីបានឃុំមនុស្សជាង ៣ពាន់នាក់ នៅក្នុងការបង្ក្រាបទូទាំងប្រទេស៕
