អ្នកសារព័ត៌មានអនឡាញចំនួន ២រូប ត្រូវបានតុលាការខេត្តសៀមរាប សម្រេចចោទប្រកាន់ពីបទ “ប្រគល់ឱ្យរដ្ឋបរទេសនូវព័ត៌មានជាអាទិ៍ អាចធ្វើឱ្យអន្តរាយការការពារ” ដែលជាបទចោទពាក់ព័ន្ធនឹងអំពើក្បត់ជាតិ ក្រោយបង្ហោះព័ត៌មានលើបណ្តាញសង្គមពីបញ្ហាជម្លោះព្រំដែនកម្ពុជា-ថៃ។
អត្ថបទខ្លីរបស់អង្គការការពារសិទ្ធិមនុស្សលីកាដូ ចេញផ្សាយនៅថ្ងៃទី០៨ ខែកញ្ញា ឆ្នាំ២០២៥នេះ បានឱ្យដឹងថា អ្នកសារព័ត៌មានអនឡាញ លោក ផន សុភាព និងលោក ភាព ភារ៉ា មកពីសារព័ត៌មាន ធីអេសភី ៦៨ ធីវី អនឡាញ ត្រូវបានចាប់ខ្លួននៅទីតាំងផ្សេងគ្នា កាលពីថ្ងៃទី៣១ ខែកក្កដា ក្រោយត្រឡប់មកពីធ្វើបទយកការណ៍មួយ ក្នុងខេត្តឧត្តរមានជ័យ នៅជិតព្រំដែនកម្ពុជា-ថៃ។
ប្រភពដដែលបន្តថា អ្នកសារព័ត៌មានទាំង ២រូបនេះ ត្រូវបានសាលាដំបូងខេត្តសៀមរាប ចោទប្រកាន់ ពីបទ “ប្រគល់ឱ្យរដ្ឋបរទេសនូវព័ត៌មានជាអាទិ៍ អាចធ្វើឱ្យអន្តរាយការការពារ” តាមបញ្ញតិ្តមាត្រា៤៤៥ នៃក្រមព្រហ្មទណ្ឌ និងបញ្ជូនទៅឃុំខ្លួនបណ្តោះអាសន្នក្នុងពន្ធនាគារខេត្តសៀមរាប។
បើតាមអង្គការលីកាដូ បទចោទនេះ ជាប្រភេទបទចោទពាក់ព័ន្ធនឹងអំពើក្បត់ជាតិមួយ ដែលនាំឱ្យពួកគេអាចប្រឈមនឹងជាប់ទោសពន្ធនាគារពី ៧ ទៅ ១៥ឆ្នាំ ជុំវិញការបង្ហោះព័ត៌មានលើបណ្តាញសង្គម ពីបញ្ហាជម្លោះព្រំដែនកម្ពុជា-ថៃ។ តែយ៉ាងណា ពុំមានការបញ្ជាក់ច្បាស់លាស់ អំពីការបង្ហោះណាមួយលើបណ្តាញសង្គម ដែលជាមូលហេតុនៃការចោទប្រកាន់ទាំងនោះនៅឡើយទេ។
អ្នកសារព័ត៌មានទាំងពីររូបនេះ ត្រូវបានគេឃើញថតជាប់ជាមួយនឹងទាហានកម្ពុជានៅពីមុខប្រាសាទតាក្របី ក្នុងរូបថតមួយសន្លឹកនៃរូបទាំងនោះ ត្រូវបានថតក្រោយពីបទឈប់បាញ់នៅថ្ងៃទី២៨ ខែកក្កដា ឆ្នាំ២០២៥។ រូបភាពទាំងនោះ ត្រូវបានគេយកបង្ហោះចែកចាយឡើងវិញដោយសារព័ត៌មានថៃ និងមាន រូបភាពមីន នៅផ្ទៃខាងក្រោយដែលមិនបញ្ជាក់ទីតាំង។
ជុំវិញករណីនេះ កាលពីថ្ងៃទី១ ខែកញ្ញា ភរិយាលោក ភាព ភារ៉ា គឺអ្នកស្រី អោម សារ៉ាត់ បានចេញវីដេអូខ្លីមួយនៅលើទំព័រហ្វេសប៊ុក ធីអេសភី ៦៨ ធីវី អនឡាញ សុំទោសទៅកាន់ប្រធានព្រឹទ្ធសភា លោក ហ៊ុន សែន លោកនាយករដ្ឋមន្រ្តី ហ៊ុន ម៉ាណែត និងរដ្ឋមន្ត្រីក្រសួងព័ត៌មាន លោក នេត្រ ភក្ត្រា ព្រមទាំងទាំងបានស្នើសុំឱ្យជួយអន្តរាគមន៍លើករណីស្វាមីរបស់អ្នកស្រី៕
