និយ័តករទូរគមនាគមន៍កម្ពុជាបានរកឃើញថា អំពើឆបោកតាមអនឡាញលើបណ្តាញសង្គមតេឡេក្រាម មានការកើនឡើង ដែលការណ៍នេះ សាធារណជនត្រូវប្រុងប្រយ័ត្ន កុំផ្តល់ព័ត៌មានផ្ទាល់ខ្លួន រួមទាំងព័ត៌មានហិរញ្ញវត្ថុ ដើម្បីបញ្ចៀសការឆបោក។
នេះបើតាមសេចក្តីជូនដំណឹង ចុះថ្ងៃទី១៥ ខែកញ្ញា ឆ្នាំ២០២៥ របស់និយ័តករទូរគមនាគមន៍កម្ពុជា «ស្តីពីការកើនឡើងនៃការឆបោកតាមរយៈថ្នាលតេឡេក្រាម (Telegram)»។
និយ័តករ បាននិយាយថា ខ្លួនសង្កេតឃើញការកើនឡើងនៃការផ្ញើសារឆបោក តាមរយៈតេឡេក្រាមដែលជនឆបោកទាំងនោះ បានប្រើប្រាស់វិធីសាស្ត្រផ្សេងៗគ្នា ដូចជា ប្រើឈ្មោះបុគ្គលល្បីៗ ថ្នាក់ដឹកនាំក្រសួង ស្ថាប័ន ឬថ្នាក់ដឹកនាំក្រុមហ៊ុន ។
ពួកគេបង្កើតកម្មវិធីវិនិយោគក្លែងក្លាយ ដើម្បីអូសទាញសាធារណជនឱ្យធ្វើការវិនិយោគ ដោយសន្យាថា នឹងទទួលបានផលចំណេញខ្ពស់ក្នុងរយៈពេលដ៏ខ្លី។
ទម្រង់មួយទៀត ជនឆបោកផ្ញើសារជូនដំណឹងអំពីការឈ្នះរង្វាន់ និងតម្រូវឱ្យអ្នកទទួលបានសារទាំងនោះផ្តល់ព័ត៌មានផ្ទាល់ខ្លួន និងព័ត៌មានហិរញ្ញវត្ថុ ដើម្បីអាចទទួលបានរង្វាន់ ផ្ញើសារបំភិតបំភ័យដោយបញ្ជាក់ថា គណនីកំពុងត្រូវបានលួច ឬមានភាពមិនប្រក្រតី និងតម្រូវឱ្យអ្នកទទួលបានសារនោះផ្តល់នូវលេខសម្ងាត់ ឬព័ត៌មានចាំបាច់មួយចំនួន ដើម្បីផ្ទៀងផ្ទាត់គណនី។
សម្រាប់និយ័តករ ដើម្បីការពារសុវត្ថិភាពពីការឆបោកទាំងនេះ សូមសាធារណជន ធ្វើការពិនិត្យនិងផ្ទៀងផ្ទាត់ព័ត៌មានដែលទទួលបាន កុំចែករំលែកលេខសម្ងាត់ ឬព័ត៌មានផ្ទាល់ខ្លួនទៅកាន់អ្នកដទៃ កុំចុចលើតំណភ្ជាប់ ដែលមានការសង្ស័យ និងអនុវត្តវិធីសាស្ត្រពាក់ព័ន្ធនឹងមុខងាររបស់តេឡេក្រាម។
បើតាមប្រភពនោះ វិធានការពារ ត្រូវដាក់ដំណើរការមុខងារផ្ទៀងផ្ទាត់ពីរជំហាន (Two-Step Verification -2FA) ដែលអ្នកប្រើប្រាស់ត្រូវមានការផ្ទៀងផ្ទាត់បន្ថែមមួយទៀត ពីលើការប្រើប្រាស់លេខទូរស័ព្ទ និងកូដដែលទទួលបាន ដើម្បីចូលទៅក្នុងគណនីតេឡេក្រាម។
ប្រើប្រាស់ពាក្យសម្ងាត់រឹងមាំ ដែលមានយ៉ាងហោចណាស់ ៨ខ្ទង់ រួមទាំងប្រើមុខងារ Passcode Lock ដែលអ្នកប្រើប្រាស់អាចចាក់សោរកម្មវិធីដោយប្រើលេខកូដសម្ងាត់ ដើម្បីការពារនៅពេលដែលចូលប្រើប្រា ស់តេឡេក្រាមនៅលើឧបករណ៍។
ជុំវិញរឿងនេះ ក្រុមហ៊ុនហួយវ័នគ្រុបរបស់ឧកញ៉ា ហ៊ុន តូ ក្មូយប្រុស លោក ហ៊ុន សែន ត្រូវបានអាមេរិករកឃើញថា ជាប់ពាក់ព័ន្ធបទឧក្រិដ្ឋកម្មលាងលុយ ដែលចាប់ពីខែសីហាឆ្នាំ២០២១ ដល់ខែមករា ឆ្នាំ២០២៥ ក្រុមហ៊ុននេះ បានលាងលុយកខ្វក់៤ពាន់លានដុល្លារ ឱ្យក្រុមឧក្រិដ្ឋជន។
លើសពីនេះ វិទ្យាស្ថាន Humanity Research Consultancy (HRC) នៅខែឧសភា ឆ្នាំ២០២៥ បានចេញរបាយការណ៍សិក្សាស្រាវជ្រាវជាង៧០ទំព័រ រកឃើញថា កម្ពុជាគឺជាទីតាំងស្នូលនៃការប្រព្រឹត្តិឧក្រិដ្ឋកម្មឆ្លងដែនជាពិសេសឧក្រិដ្ឋកម្មអនឡាញ។
បើតាមរបាយការណ៍ដដែល មានអ្នកបម្រើការក្នុងឧក្រិដ្ឋកម្មអនឡាញនេះលើសពី១៥ម៉ឺននាក់ នៅទឹកដីកម្ពុជា ហើយមន្ត្រីជាន់ខ្ពស់ក្នុងជួររដ្ឋាភិបាល និងឧកញ៉ាគ្រាក់ៗ ចំនួន ២៨នាក់ ជាមេបណ្តាញឧក្រិដ្ឋកម្មឆ្លងដែននៅកម្ពុជា។
លើសពីនេះទៀត គណបក្សប្រជាជនកម្ពុជា គឺជាមេការពារបណ្តាញឧក្រិដ្ឋកម្មឆ្លងដែន ដើម្បីប្រមូលប្រាក់យកទៅចិញ្ចឹមអំណាចរបស់ខ្លួន ដែលអាចរកចំណូលបានពីឧក្រិដ្ឋកម្មអនឡាញ ប្រមាណពី ១២,៥ពាន់លាន ទៅ ១៩ពាន់លានដុល្លារ នៅក្នុង១ឆ្នាំ៕
