លោក ខាស ផាថែល នាយកអេហ្វប៊ីអាយ(FBI) បាននិយាយកាលពីថ្ងៃចន្ទថា ជនសង្ស័យដែលត្រូវបានចោទប្រកាន់ពីបទសម្លាប់សកម្មជនស្តាំនិយម លោក ឆាលី ឃើក ក្នុងរដ្ឋអូតាសនោះ បានប្រាប់អ្នកផ្សេងទៀតក្នុងសារជាអក្សរមុនពេលបាញ់ប្រហារថា លោកមានគម្រោងសម្លាប់ លោក ឃើក។
ទីភ្នាក់ងារសារព័ត៌មាន រ៉យទ័រ បានរាយការណ៍នៅថ្ងៃទី១៦ ខែកញ្ញា ឆ្នាំ២០២៥នេះថា នៅក្នុងការបង្ហាញខ្លួនលើហ្វក្ស ញូ(Fox News) លោក ផាថែល បាននិយាយថា ក្រុមអ្នកស៊ើបអង្កេតជឿថា ជនសង្ស័យបានសរសេរកំណត់ត្រាថា លោកមានឱកាសក្នុងការវាយប្រហារ លោក ឆាលី ឃើក(Charlie Kirk) ហើយលោកនឹងធ្វើបែបនោះ។ លោក ផាថែល (Patel) បានបន្ថែមថា កំណត់ត្រានោះត្រូវបានបំផ្លាញ ប៉ុន្តែក្រុមអ្នកស៊ើបអង្កេតបានប្រមូលភស្តុតាងពីខាងកោសល្យវិច្ច័យ ដែលបញ្ជាក់ថា មានភស្តុតាងនោះនិងបានបញ្ជាក់ខ្លឹមសារនេះតាមរយៈការសម្ភាសន៍ផងដែរ។
យ៉ាងណា លោក ផាថែល មិនបានផ្តល់ព័ត៌មានលម្អិតទេថា នរណាបានទទួលសារនោះ ឬតើនរណាបានឃើញការសរសេរកំណត់ត្រានោះ មុនពេលការវាយប្រហារនេះ។ ដោយឡែក ក្រុមអ្នកស៊ើបអង្កេតមិនបានកំណត់អត្តសញ្ញាណបង្ហាញជាសាធារណៈអំពីហេតុផលនេះនោះទេ។ រីឯអ្នកអនុវត្តច្បាប់ បាននិយាយថាពួកគេជឿជាក់ថា ជនសង្ស័យនោះ បានធ្វើសកម្មភាពតែម្នាក់ឯង នៅពេលដែលបាញ់លោក ឃើក ប៉ុន្តែក្រុមអ្នកស៊ើបក៏កំពុងស៊ើបថាតើនរណាផ្សេងទៀតមានតួនាទីក្នុងផែនការសម្លាប់នេះ។
បន្ថែមពីនេះ ដឹ វ៉ាស៊ីនតោន បានរាយការណ៍កាលពីចន្ទថា លោក រ៉ប៊ីនសុន(Robinson) បានផ្ញើសារតាមរយៈកម្មវិធីអនឡាញទៅកាន់មិត្តរបស់លោក ដែលទំនងជាសារភាពចំពោះឧក្រិដ្ឋកម្មនេះ។ លោក រ៉ប៊ីនសុន(Robinson) ដែលគេរំពឹងថាត្រូវបានចោទប្រកាន់ជាផ្លូវការនោះ ពេលនេះគឺនៅកន្លែងឃុំខ្លួននៅពន្ធនាគារនៅរដ្ឋអូតាសនៅឡើយ។
លោក ផាថែល បានប្រាប់ ហ្វក្ស ញូ ថាតេស្តឌីអេនអេ ដែលផ្គូរផ្គងជាមួយជនសង្ស័យ លោក ថាយល័រ រ៉ប៊ីនស៊ុន អាយុ២២ឆ្នាំរូបនេះ ត្រូវបានគេរកឃើញនៅកន្លែង រុំកាំភ្លើងដែលត្រូវបានគេជឿថា ជាអាវុធបាញ់សម្លាប់មនុស្សដែលរកឃើញនៅលើដំបូល ហើយអាជ្ញាធរនិយាយថាខ្មាន់កាំភ្លើងបានបាញ់។
អភិបាលរដ្ឋអូសតាស លោក ស្ពែនស៊រ ខក(Spencer Cox) បាននិយាយថា លោក រ៉ប៊ីនសុន(Robinson) មិនបានសហការជាមួយអាជ្ញាធរទេ ប៉ុន្តែក្រុមអ្នកស៊ើបអង្កេតកំពុងធ្វើការសម្ភាសន៍មិត្ត និងគ្រួសាររបស់លោក ក្នុងកិច្ចខំប្រឹងប្រែងដើម្បីកំណត់ពីហេតុផលសម្រាប់ការបាញ់ប្រហារនេះ៕
