ក្រុមអ្នកតាមដានបញ្ហាព្រំដែន ដែលមិនចំណុះឱ្យរដ្ឋាភិបាល បង្ហាញការព្រួយបារម្ភថា ភូមិជោគជ័យ ភូមិព្រៃចាន់ និងតំបន់មួយចំនួនទៀតរបស់កម្ពុជា នឹងក្លាយជាភូមិរបស់ថៃ ដូចវៀតណាមរំលោភយកភូមិលោក ហេង សំរិន ដែរ បើគ្រួសារហ៊ុនមិនរុញសំណុំរឿងព្រំដែនទៅកាន់តុលាការ(ICJ)ទាន់ពេលទេនោះ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលសកម្មតាមដានបញ្ហាព្រំដែន បាននិយាយលើបណ្តាញសង្គមនៅថ្ងៃទី១៦ខែកញ្ញានេះថា ភូមិជោគជ័យ និងភូមិព្រៃចាន់ នឹងក្លាយជាភូមិ លោក ហេង សំរិន ទី២ ហើយភូមិទាំង២នឹងក្លាយជារឿងនិទាន។
លោកគូសបញ្ជាក់ថា សព្វថ្ងៃនេះ ប្រជាពលរដ្ឋខ្មែរនៅភូមិជោគជ័យនិងភូមិព្រៃចាន់ កំពុងរស់នៅក្រោមតង់កៅស៊ូបន្ទាប់ពីទាហានថៃបានវាយកម្ទេចប៉ុស្តិ៍យោធាខ្មែរ និងផ្ទះពលរដ្ឋខ្មែរ ព្រមទាំងបានបណ្តេញពលរដ្ឋខ្មែរចេញពីទីនោះ។
ជុំវិញបញ្ហានេះ លោកជំរុញឱ្យរដ្ឋាភិបាលគួរតែផ្តល់ដីសម្បទាននៅតំបន់ផ្សេងទៀត ដល់ពលរដ្ឋខ្មែរទាំងនេះនិងសាងសង់ផ្ទះជូនពួកគាត់ ក្រោមហេតុផលថាលោកគ្មានសង្ឃឹមថា នឹងយកភូមិទាំងនោះបានមកវិញនោះទេ ខណៈទាហានថៃ បានសាងសង់លេណដ្ឋាន នៅភូមិជោគជ័យរបស់ខ្មែររួចរាល់ហើយ និងកំពុងតម្លើងបង្គោលភ្លើង ព្រមទាំងផ្តល់ប្លង់រឹងដល់ពលរដ្ឋថៃឱ្យមករស់នៅទីនោះទៀតផង។
សម្រាប់ លោក អ៊ុំ សំអាន លោក ហ៊ុន សែន និងលោក ហ៊ុន ម៉ាណែត នឹងកាត់ភូមិជោគជ័យ និងភូមិព្រៃចាន់ឱ្យទៅថៃដើម្បីប្តូរយកសន្តិភាព និងអំណាច ហើយលោក ហ៊ុន សែន នឹងចោទថា ប្រជាពលរដ្ឋខ្មែរទៅរស់នៅលើទឹកដីថៃដូចដែល លោក ហ៊ុន សែន និងលោក សុខ ទូច បានចោទប្រជាពលរដ្ឋខ្មែររស់នៅភូមិកំណើតលោក ហេង សំរិន ថាបានទៅរស់នៅលើដីវៀតណាមដែរ។
លើសពីនេះ លោក ហ៊ុន សែន នឹងចាប់ដាក់គុក នូវអ្នកស្នេហាជាតិដែលរិះគន់រឿងនេះ និងអ្នកកាសែត ព្រមទាំងប្រជាពលរដ្ឋខ្មែររស់នៅភូមិជោគជ័យ និងភូមិព្រៃចាន់ ណាដែលហ៊ានតវ៉ាថាបាត់ដីទៅថៃដូចដែលលោក ហ៊ុន សែន បានធ្វើដូចគ្នានេះរឿងព្រំដែនជាមួយវៀតណាម។
បន្ថែមពីនេះ លោកថា ថៃកំពុងសម្រុកធ្វើផ្លូវបេតុងឡើងភ្នំទ្រព្យជិតរួចរាល់ហើយ និងកំពុងធ្វើកន្លែងចតឡាន នៅថ្ងៃទី១៥ ខែកញ្ញា ឆ្នាំ២០២៥ ខណៈរដ្ឋាភិបាលខ្មែរ កំពុងអង្គុយទន្ទេញពាក្យ «អត់ធ្មត់ ចាស់ទុំនិងគោរពបទឈប់បាញ់» មិនប្តឹងទៅតុលាការយុត្តិធម៌អន្តរជាតិ ICJ ហើយក៏មិនទៅទប់ស្កាត់ការឈ្លានពានទឹកដីខ្មែរពីសំណាក់ថៃនោះ។
ការអះអាងនេះ ហាក់ស៊ីគ្នាទៅនឹងសកម្មភាពមេដឹកនាំកម្ពុជា រួមទាំងក្រសួងពាក់ព័ន្ធមួយចំនួន។ បើគេសង្កេតសារនៅលើហ្វេសប៊ុកមេដឹកនាំកម្ពុជា គឺលោក ហ៊ុន សែន ហាក់មិនបានបង្ហាញពីសកម្មភាពយោធាថៃ រាយបន្លាលួសព័ទ្ធយកដីខ្មែរ នៅភូមិជោគជ័យ និងភូមិព្រៃចាន់ នាពេលនេះទេ។
តែផ្ទុយពីនេះ លោក ហ៊ុន សែន ដែលគេដឹកនាំថាមានអំណាចកំពូលនៅកម្ពុជា ហាក់ចាប់អារម្មណ៍បង្ហោះបទចម្រៀង គុណធម៌បិតាសន្តិភាព និងពិធីកាន់បិណ្ឌ។
លើសពីនេះ លោកបានបញ្ចេញប្រតិកម្មការពារភាពស្អាតស្អំរបស់អតីតមដឹកនាំថៃ រួមទាំង លោក ថាន់ស៊ីន ដែលតុលាការថៃបង្គាប់ឱ្យឃុំខ្លួននៅពេលនេះ។
បើតាមមេដឹកនាំកម្ពុជា លោក ថាក់ ស៊ីន ឬលោកស្រី យីងឡាក់ ពុំមានទ្រព្យសម្បត្តិ ឬការរកស៊ីណាមួយនៅកម្ពុជានោះទេ។ លោកថា ពេលលោក ថាក់ស៊ីន និងអ្នកស្រី យ៉ីងឡាក់ មកកម្ពុជា គឺប្រើប្រាស់រថយន្តរបស់លោកទាំងអស់ ដែលថានេះបង្ហាញថា លោក ថាក់ស៊ីន គ្មានទ្រព្យសម្បត្តិណាមួយនៅកម្ពុជានោះឡើយ។
លើសពីនេះ លោកថា ប្រសិនព័ត៌មានបែបនេះចេញពីកម្ពុជា លោកស្នើសុំឲ្យបញ្ឈប់ជាបន្ទាន់ ដោយថា«ជាតិសាសន៍របស់យើង ត្រូវរក្សានូវភាពថ្លៃថ្នូរមិនកុហក ភូតភរមួលបង្កាច់ប្រឌិតរឿងខុសការពិត»។
ដោយឡែក ក្រសួងការពារជាតិវិញ ក៏មិនចាប់អារម្មណ៍ជំរុញឱ្យថៃរុះរើបន្លាលួសចេញពីភូមិជោគជ័យ ភូមិព្រៃចាន់ រួមទាំងតំបន់មួយទៀតក្នុងទឹកដីកម្ពុជាដែរ ក្រៅពីបន្តអំពាវនាវឱ្យថៃ ប្រគល់យោធាកម្ពុជា១៨នាក់ត្រឡប់មកវិញ ក្រោយទាហានថៃចាប់ធ្វើជាចំណាប់ខ្មាំងជិត៥០ថ្ងៃ ក្រោយមានកិច្ចព្រមព្រៀងបទឈប់បាញ់ នៅថ្ងៃទី២៨ ខែកក្កដា ឆ្នាំ២០២៥។
ក្រោយបទឈប់បាញ់ចូលជាធរមាន ទាហានថៃបានចល័តទ័ពចូលមកចាប់ខ្លួនទាហានកម្ពុជា នៅជួរមុខចំនួន២០នាក់ ដែលបច្ចុប្បន្ននៅសល់ទាហានខ្មែរ ១៨នាក់ទៀត ថៃមិនទាន់ប្រគល់ឱ្យកម្ពុជាវិញទេ ។
លើសពីនេះ ថៃបានចូលមករាយបន្លាលួសព័ទ្ធយកប្រាសាទតាមាន់ធំ ស្ថិតក្នុងខេត្តឧត្តរមានជ័យ តំបន់អានសេះ ក្នុងខេត្តព្រះវិហារ និងភូមិព្រៃចាន់ ភូមិអូរបីជាន់ ក្នុងស្រុកអូរជ្រៅ ខេត្តបន្ទាយមានជ័យ និងគំរាមប្រើកម្លាំងយោធារុះរើផ្ទះពលរដ្ឋខ្មែរ១៧០ខ្នង នៅភូមិជោគជ័យ ខណៈរដ្ឋាភិបាលកម្ពុជា នៅបន្តអត់មិនជ្រើសរើសយកការប្រឈមមុខខាងយោធា ក្រោយផ្ទុះអាវុធជាមួយថៃ រយៈពេល៥ថ្ងៃរួចមក ។
ជុំវិញបញ្ហានេះ ប្រធានក្រុមប្រឹក្សាឃ្លាំមើលកម្ពុជា លោក មែន ណាត ធ្លាប់ប្រាប់វីអូឌីថា ស្ថានភាពព្រំដែនកម្ពុជា-ថៃ កំពុងសង្កត់កម្ពុជាឲ្យទទួលយកផែនទីចោរ ខ្នាត ១/៥0.000 និងទាមទារកម្ពុជាឲ្យដោះគ្រាប់មីន ដើម្បីឲ្យខ្លួនសម្រេចមហិច្ឆតាឈ្លានពានកម្ពុជា តាមផែនទីដែលថៃគូរដោយឯកតោភាគី ។
យ៉ាងណា លោកថា មានតែកម្ពុជាប្រើយន្តការអន្តរជាតិទេ ទើបអាចការពារបូរណភាពទឹកដីបាន គឺត្រូវប្តឹងទៅតុលាការយុត្តិធម៌អន្តរជាតិ(ICJ) និងប្តឹងសហប្រធានកិច្ចព្រៀមព្រៀងទីក្រុងប៉ារីស ឱ្យកោះប្រជុំភាគីពាក់ព័ន្ធបន្ទាន់ ទើបអាចទប់ស្កាត់បាន៕
