ថៃគំរាមឈ្លានពានកម្ពុជាយ៉ាងតិច៣កន្លែងទៀត នៅខេត្តកោះកុង តាមដែនទីដែលថៃគូរដោយឯកតោភាគី ក្រោយសម្រេចមហិច្ឆតារំលោភយកដីខ្មែរ នៅភូមិជោគជ័យ ភូមិព្រៃចាន់ និងភូមិអូរបីជាន់ ខេត្តបន្ទាយមានជ័យ ដោយចោទថា ពលរដ្ឋខ្មែរនៅទីនោះ បានធ្វើផ្ទះ និងដីកសិកម្មលើដីថៃ។
ការបង្ហាញមហិច្ឆតាឈ្លានពានរបស់ថៃនេះ ចំពេលដែលរដ្ឋាភិបាលកម្ពុជា បានប្រកាសជំហរម្តងហើយម្តងក្រោយមានបទឈប់បាញ់ថា កម្ពុជានឹងមិនជ្រើសរើសយកការប្រឈមខាងយោធា ដើម្បីដោះស្រាយបញ្ហាព្រំដែននោះទេ តែជ្រើសរើសយកការសន្ទនា ដើម្បីរក្សាសន្តិភាពសម្រាប់ប្រទេសទាំងពីរ។
បើតាមប្រភពពី The Nation និង Khaosod របស់ថៃ ចេញផ្សាយនៅថ្ងៃទី១៦ខែកញ្ញានេះ ថៃបានចោទពលរដ្ឋកម្ពុជាថា បានសាងសង់ផ្ទះ និងប្រើប្រាស់ដីកសិកម្មលើទឹកដីថៃចំនួន៣តំបន់ ដែលថានៅក្នុងខេត្តត្រាតរបស់ខ្លួន។
បើតាមប្រភពនោះ កងទ័ពជើងទឹកថៃ ត្រៀមបង្កើនវិធាន ប្រសិនបើកម្ពុជា មិនអើពើនឹងកិច្ចព្រមព្រៀង RBC ក្នុងការរុះរើរចនាសម្ព័ន្ធចំនួនបី នៅខេត្តត្រាត។
ពួកគេចោទថា ពលរដ្ឋកម្ពុជាបានសាងសង់ផ្ទះ និងកំពុងប្រើប្រាស់ដីកសិកម្មតាមព្រំដែនកម្ពុជា-ថៃ នៅតំបន់ចំនួន៣ ក្នុងស្រុកមឿង ខេត្តត្រាត ស្ថិតនៅក្រោមអធិបតេយ្យភាពរបស់ថៃ។
វីអូឌី មិនអាចទាក់ទងអ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា ដើម្បីសុំប្រតិកម្មតបជុំវិញការចុះផ្សាយរបស់សារព័ត៌មានថៃនេះបានទេ គិតត្រឹមម៉ោងផ្សាយនេះ។
ប៉ុន្តែសម្រាប់ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលមានបទពិសោធន៍កិច្ចការព្រំដែនបានលើកឡើងថា ថៃនឹងបន្តឈ្លានកម្ពុជា ចំនួន១៧តំបន់បន្ថែមទៀត នៅខេត្តពោធិ៍សាត់។
លោកថា ការបន្តឈ្លានពានទឹកដីខ្មែរនេះ ដោយភាគីថៃសំអាងលើផែនទីចោរ ខ្នាត១លើ៥០ពាន់របស់ថៃ ដែលថៃគូរដោយឯកតាភាគី ។
យ៉ាងណា មេដឹកនាំកម្ពុជា លោក ហ៊ុន សែន ធ្លាប់បានវាយបកវិញថា កម្ពុជាមិនអាចទទួលយកការកំណត់ព្រំដែនតាមផែនទីថៃគូរដោយឯកតោភាគីនោះបានទេ ដែលលោកហៅផែនទីថៃ ជាផែនទីចោរ និងគំរាមនាំយកសំណុំរឿងព្រំដែននេះ ទៅតុលាការយុត្តិធម៌អន្តរជាតិ(ICJ) ។
ប៉ុន្តែមកទល់ពេលនេះ គណបក្សប្រឆាំងចោទថា មេដឹកនាំកម្ពុជាមិនបានរុញបញ្ហានេះទៅតុលាការយុត្តិធម៌អន្តរជាតិ ដើម្បីការពារបូរណភាពទឹកដីនៅឡើយទេ ដោយជាប់ដៃបន្តប្រើយន្តការទ្វេភាគី ដែលធ្វើឱ្យថៃមានប្រៀប សម្រេចមហិច្ឆតាលេបទឹកដីខ្មែរតាមផែនទីដែលថៃគូរដោយខ្លួនឯង៕
