ប្រជាពលរដ្ឋនៅភូមិព្រៃចាន់រាប់សិបនាក់ បានអំពាវនាវឱ្យអន្តរជាតិជួយការពារដីស្រែ និងផ្ទះសម្បែងពួកគេ ខណៈទាហានថៃមួយក្រុមបំពានដោយអាវុធស្វ័យប្រវត្តិ បានពង្រាយកម្លាំងព្យាយាមរាយបន្លាលួសព័ទ្ធយកដីភូមិ និងស្រែចម្ការពួកគេ ។
យ៉ាងណា សារអំពាវនាវនេះ ត្រូវបានគេមើលឃើញថា ពលរដ្ឋដែលប្រឈមបាត់បង់ដីធ្លីផ្ទះសម្បែងទាំងនោះ ហាក់អស់ជំនឿលើមេដឹកនាំបក្សកាន់អំណាច ជុំវិញឆន្ទៈការពារបូរណភាពទឹកដី ខណៈមេដឹកនាំប្រកាសជំហរឈប់ប្រឈមមុខ ជាមួយយោធាថៃ ក្រោមហេតុផលគោរពបទឈប់បាញ់ឱ្យបានពេញលេញ ក្នុងនាមជាមដឹកនាំដែលស្រឡាញ់សន្តិភាព។
តាមរយៈវីដេអូដែលផ្សព្វផ្សាយតាមបណ្តាញសង្គម អ្នកភូមិដែលប្រឈមមុខជាមួយកម្លាំងប្រដាប់អាវុធថៃនោះ មានទាំងស្ត្រី កុមារ និងជនពិការផងដែរ។ ពួកគេឈររារាំងរហូតយោធាថៃដកថយចេញវិញ ហើយពលរដ្ឋបានខ្លះ អំពាវនាវឱ្យអន្តរជាតិទប់ស្កាត់ថៃឈ្លានពានដីខ្មែរផងដែរ។
ពលរដ្ឋថា៖ «យកផ្ទះខ្ញុំហើយ មកចង់យកចម្ការខ្ញុំទៀត! វាចង់ដាក់បន្លាលួសខ្ញុំសារចេញអស់ហើយ! ពួកអាអស់នេះ វាសាហាវណាស់ សុំឲ្យខាងអន្តរជាតិខាងថ្នាក់លើជួយមើលផង ឲ្យដឹងថាទីណាដីវា! ទីណាដីខ្ញុំ! នេះគឺជាដីខ្ញុំពិតប្រាកដ»។
បន្ថែមលើនេះ បុរសម្នាក់ទៀត បានស្រែកឱ្យអ្នកភូមិជួយគ្នារើលួសបន្លាចេញ ដោយបារម្ភបាត់បង់ទឹកដី បើនៅតែបន្តអត់ធ្មត់ជាមួយយោធាថៃ។
លោកថា៖ «កាត់ឱ្យខ្លីៗ ទាញមក! អត់ខ្លាចទេ! កុំមានការអត់ធ្មត់ជាមួយវាទៀត ព្រោះយើងប្រជាពលរដ្ឋ! យើងដឹង។ យកលួស កាត់ឱ្យហើយ»។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក សួន សូរីដា យល់ថា ការរួមគ្នាបណ្តេញទាហានថៃកុំឱ្យរាយបន្លាលួសនេះ ដោយសារអ្នកភូមិអស់ជំនឿលើរដ្ឋាភិបាលក្នុងការការពារបូរណភាពទឹកដី។
លោកថា៖ «ការឆ្លើយតបប្រជាពលរដ្ឋយើងឃើញថា បានទទួលជោគជ័យមែន ដូច្នេះយើងគិតថា ប្រសិនបើយើងនៅបន្តនៅស្ងៀមស្ងាត់ ដោយយកលេសថាជាការគោរពបទឈប់បាញ់! ខ្ញុំគិតថា វាជាភាពកម្សោយរបស់រដ្ឋាភិបាល ហើយច្បាស់ជាប្រជាពលរដ្ឋនឹងអស់សង្ឃឹមចំពោះរដ្ឋាភិបាល និងលែងគាំទ្ររដ្ឋាភិបាលទៅវិញទេ»។
ជាងនេះទៀត លោកថា តំបន់ដែលថៃឈ្លានពានបានសម្រេច ដូចជា ច្រកអានសេះ ភ្នំទ្រព្យ ប្រាសាទតាមាន់ធំ ជាដើម ខ្មែរមិនងាយនឹងគ្រប់គ្រងមកវិញបានទេ បើនៅតែអត់ធ្មត់គោរពបទឈប់បាញ់បែបនេះ។
លោកថា៖ «តើសង្ឃឹមលើអី! សង្ឃឹមលើថៃហ្នឹង! សុខៗ គេប្រគល់ដែនដីដណ្តើមយកពីកម្ពុជាហ្នឹង! ឲ្យយើងវិញដោយស្រួលៗ ឬយ៉ាងម៉េច! ទាល់តែយើងធ្វើការទាមទារ តាមរយៈទី១អន្តរជាតិ គឺយើងប្ដឹងទៅអង្គការសហប្រជាជាតិ! ប្ដឹងទៅតុលាការយុត្តិធម៌អន្តរជាតិ ICJ ហើយជួនកាលយើងត្រូវតែប្រើកម្លាំងទ័ព»។
ជុំវិញរឿងនេះ VOD មិនអាចសុំការឆ្លើយតបពីអ្នកនាំពាក្យក្រសួងការពារជាតិ អ្នកស្រី ម៉ាលីសុជាតា បានទេ ដោយគ្មានអ្នកទទួលទូរសព្ទ។
ដោយឡែក ទំព័រហ្វេសប៊ុកក្រសួងការពារជាតិកម្ពុជា ក៏មិនទាន់មានប្រតិកម្មរឿងពលរដ្ឋខ្មែររាប់សិបនាក់ នៅថ្ងៃទី១៦ ខែកញ្ញា តទល់ជាមួយយោធាថៃ នៅភូមិព្រៃចាន់ទេ ក្រៅតែពីរំឮកពីបទឈប់បាញ់ និងអំពាវនាវឱ្យថៃដោះលែងកងទ័ពកម្ពុជាចំនួន ១៨រូបមកវិញ។
ដោយឡែក ទំព័រហ្វេសប៊ុកប្រធានព្រឹទ្ធសភា លោក ហ៊ុន សែន នៅតែបន្តផ្សព្វផ្សាយបទចម្រៀងជាច្រើនបទ ក្នុងន័យអរគុណសន្តិភាព និងដឹងគុណលោក ហ៊ុន សែន ជាដើម។
យ៉ាងណា ភាគីថៃវិញ បានប្រកាសហាមពលរដ្ឋខ្មែរ មិនឱ្យចូលមកប្រាសាទតាមាន់ធំបានដូចមុនទៀតឡើយ បើគ្មានលិខិតឆ្លងដែន។
បន្ថែមលើនេះ សារព័ត៌មានក្នុងស្រុកថៃ រាយការណ៍ថា ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ត្រូវបានក្រុមទាហានថៃ ក៏កំពុងសាងសង់លេណដ្ឋានជិតរួចរាល់ហើយ ក្រោយវាយកម្ទេចប៉ុស្តិ៍យោធាខ្មែរនិងផ្ទះពលរដ្ឋខ្មែរ ព្រមទាំងបានបណ្តេញពលរដ្ឋខ្មែរចេញពីទីនោះ។
អតីតនាយកខុទ្ទកាល័យលោក កឹម សុខា គឺ លោក មុត ចន្ថា រិះគន់លើហ្វេសប៊ុកលោកថា កម្ពុជាគឺជាប្រទេសទី១ក្នុងពិភពលោក ដែលបើកភ្នែកឱ្យបរទេសឈ្លានពាន ដោយមិនតបត និងទប់ទល់។
លោកថា ដំណោះស្រាយរបស់នាយករដ្ឋមន្រ្តី ហ៊ុន ម៉ាណែត គឺដេកឱបកិច្ចព្រមព្រៀងឈប់បាញ់គ្នា រីឯចោរសៀមបន្តឈ្លានពានយ៉ាងគឃ្លើន។ ក្នុងន័យនេះ លោកហាក់ស្តីបន្ទោសលោក ហ៊ុន ម៉ាណែត ថាល្មមចុះចេញពីតំណែងហើយ។
ក្រោយបទឈប់បាញ់ចូលជាធរមាន ទាហានថៃបានចល័តទ័ពចូលមកចាប់ខ្លួនទាហានកម្ពុជា នៅជួរមុខចំនួន២០នាក់ ដែលបច្ចុប្បន្ននៅសល់ទាហានខ្មែរ ១៨នាក់ទៀត ថៃមិនទាន់ប្រគល់ឱ្យកម្ពុជាវិញទេ ទោះកម្ពុជាអំពាវនាវជាង១ខែទៅនេះក្តី។
លើសពីនេះ ថៃបានចូលមករាយបន្លាលួសព័ទ្ធយកប្រាសាទតាមាន់ធំ តំបន់អានសេះ ភូមិព្រៃចាន់ ភូមិអូរបីជាន់ ក្នុងស្រុកអូរជ្រៅ ខេត្តបន្ទាយមានជ័យ និងគំរាមប្រើកម្លាំងយោធារុះរើផ្ទះពលរដ្ឋខ្មែរ១៧០ខ្នង នៅភូមិជោគជ័យ ខណៈរដ្ឋាភិបាលកម្ពុជានៅបន្តអត់ធ្មត់ ដែលធ្វើឱ្យពលរដ្ឋនៅភូមិជោគជ័យ ចេញប្រឈមមុខជាមួយទាហានថៃយ៉ាងតិចពីរដង ប្រឆាំងនឹងទង្វើឈ្លានពានរបស់ថៃ ចាប់ពីពេលមានបទឈប់បាញ់មក។
ការណ៍នេះ អ្នកឃ្លាំមើលព្រំដែនព្រមានពីគ្រោះថ្នាក់បូរណភាពទឹកដីខ្មែរ ក្រោមអំណាចគ្រួសារហ៊ុនដែលមិនប្រើសិទ្ធិការពារខ្លួន និងពន្លឿនប្តឹងថៃទៅតុលាការយុត្តិធម៌អន្តរជាតិ (ICJ) រួមទាំងប្រើប្រាស់កិច្ចព្រមព្រៀងសន្តិភាពទីក្រុងប៉ារីស ដើម្បីទប់ទល់ឱ្យបានទាន់ពេលទេនោះ៕
