យ៉ាងហោចណាស់ ពលរដ្ឋខ្មែររួមទាំងព្រះសង្ឃសរុប២៤អង្គ/នាក់បានរងរបួស ក្រោយប៉ូលិសនិងយោធាថៃ បាញ់គ្រាប់ជ័រ និងផ្សែងពុល បំបែកការតវ៉ារបស់ពលរដ្ឋខ្មែរ នៅភូមព្រៃចាន់ ស្រុកអូរជ្រៅ ខេត្តបន្ទាយមានជ័យ ខណៈពួកគេប្រមូលផ្តុំគ្នាតវ៉ានៅថ្ងៃពុធនេះ ប្រឆាំងនឹងការរាយបន្លាលួសព័ទ្ធយកដីខ្មែរនៅទីនោះ។
នេះបើតាមការអះអាងរបស់ពលរដ្ឋនៅភូមិព្រៃចាន់ និងវីដេអូជាច្រើន ដែលពលរដ្ឋផ្សាយផ្ទាល់បង្ហាញពីសកម្មភាពដែលទាហាថៃរៀបយុទ្ធសាស្ត្រ មករាយបន្លាលួសរំលោភយកដីខ្មែរនៅតំបន់នោះ មានទាំងកម្លាំងប៉ូលីស និងកម្លាំងយោធា ប្រដាប់ដោយអាវុធ និងខែលការពារ។
ក្រោយកើតហេតុ អ្នកនាំពាក្យរដ្ឋាភិបាលកម្ពុជា បានចេញមុខថ្កោលទោសទង្វើរបស់យោធាថៃ ប៉ុន្តែមិនបាននិយាយដល់ការប្រើប្រាស់សិទ្ធិ ដើម្បីការពារទឹកដី ប្រឆាំងនឹងការឈ្លានពាននេះទេ ដោយគ្រាន់តែបញ្ជាក់ថា ក្នុងហេតុការណ៍នោះ ពលរដ្ឋខ្មែររួមទាំងព្រះសង្ឃសរុប ២៤អង្គ/នាក់ បានរងរបួស។
យ៉ាងណា តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ចាត់ទុកទង្វើរបស់យោធាថៃ ជាការឈ្លានពានកម្ពុជាយ៉ាងសាហាវ ។
លោកថា ក្នុងហេតុការណ៍នោះ ប៉ូលិសថៃ និងយោធាថៃ បានបាញ់កាំភ្លើងគ្រាប់ជ័រ ដែលធ្វើឱ្យពលរដ្ឋខ្មែររងរបួស និងបាញ់ឧស្ម័នបង្ហូរទឹកភ្នែក លើពលរដ្ឋខ្មែរនិងព្រះសង្ឃ ដែលចេញការពារទឹកដី នៅភូមិព្រៃចាន់ ស្រុកអូរជ្រៅ ខេត្តបន្ទាយមានជ័យ និងថា មានមនុស្ស ២នាក់បានសន្លប់។
សូមបញ្ជាក់ថា ក្រោយពីមានបទឈប់បាញ់ជិត២ខែទៅនេះ ថៃបានចល័តទ័ពចូលឈ្លានពានកម្ពុជា ជាបន្តបន្ទាប់ ដូចជានៅភូមិអូរបីជាន់ ភូមិជោគជ័យ ប្រាសាទតាមាន់ធំ និងតំបន់អានសេះជាដើម គ្មានការទប់ស្កាត់ពីក្រសួងការពារជាតិទេ ដោយអះអាងថាកម្ពុជាគោរពបទឈប់បាញ់៕
