ខណៈអ្នកប្រើប្រាស់បណ្តាញសង្គម បានចែករំលែកវីដេអូថៃឈ្លានពាននៅភូមិព្រៃចាន់ ដែលនាំទៅដល់ការរិះគន់រដ្ឋាភិបាលគ្រួសារហ៊ុនកើនឡើងថា អសមត្ថភាពការពារទឹកដីនោះ នគរបាលរាជធានីភ្នំពេញបានទម្លាយសារថា កម្លាំងអន្តរាគមន៍ពិសេសត្រៀមអន្តរាគមន៍ នៅពេលមានសភាពការណ៍ចាំបាច់។
ហ្វេសប៊ុករបស់ស្នងការនគរបាលរាជធានីភ្នំពេញ នៅថ្ងៃទី១៨ខែកញ្ញានេះ គេសង្កេតឃើញបង្ហោះរូបភាពកងកម្លាំងអធិការនគរបាលតាមដានមួយចំនួន ដូចជាខណ្ឌពោធិ៍សែនជ័យ ខណ្ឌចំការមន និងខណ្ឌដង្កោជាដើម និងបានរំលេចសារដូចៗគ្នាថា អធិការនគរបាលខណ្ឌនិមួយៗ បានដឹកនាំកិច្ចប្រជុំត្រួតពិនិត្យកម្លាំងអន្តរាគមន៍ពិសេស ដើម្បីធានាក្នុងកិច្ចការការពារសុខសុវត្ថិភាពក្នុងមូលដ្ឋាន និងត្រៀមអន្តរាគមន៍នៅពេលមានសភាពការណ៍ចាំបាច់ ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលតាមដានបញ្ហាព្រំដែន បាននិយាយថា កងកម្លាំងអន្តរាគមន៍ពិសេស ត្រូវត្រៀមលក្ខណៈឱ្យរួចរាល់សម្រាប់បង្រ្កាបខ្មែរគ្នាឯង មិនមែនសម្រាប់ទប់ទល់ទាហានថៃឈ្លានពាននោះទេ។
កាលពីថ្ងៃទី១៧ ខែកញ្ញានេះ ពលរដ្ឋខ្មែរនៅភូមិព្រៃចាន់ យ៉ាងតិច ២៨នាក់ រួមទាំងព្រះសង្ឃផង ត្រូវបានក្រសួងការពារជាតិអះអាងថាបានរងរបួស ក្រោយប្រឈមមុខជាមួយយោធាថៃ ដើម្បីការពារលំនៅឋាន និងដីអាស្រ័យផលរបស់ពួកគេ។
ហេតុការណ៍នោះ កងកម្លាំងថៃបានបាញ់ផ្សែងពុល និងកាំភ្លើងបាញ់គ្រាប់ជ័រ ដើម្បីបំបែកពលរដ្ឋខ្មែរ ដែលប្រមូលផ្តុំគ្នាតវ៉ាប្រឆាំងនឹងកម្លាំងចម្រុះថៃឈ្លានពាន។
វីដេអូប៉ះទង្កិចនេះ ត្រូវបានគេចែកចាយយ៉ាងច្រើនលើបណ្តាញសង្គម និងខ្លះរិះគន់ថា បញ្ហាដែលបានកើតឡើងមកពីអសមត្ថភាពរបស់មេដឹកនាំ។
យ៉ាងណា អ្នកនាំពាក្យក្រសួងមហាផ្ទៃ ចេញសេចក្ដីថ្លែងការណ៍ថ្កោលទោសសកម្មភាពនគរបាល និងកម្លាំងចម្រុះថៃ ដោយចាត់ទុកទង្វើនោះថា ជាការបំពានដែនដី និងធ្វើទុក្ខបុកម្នេញលើពលរដ្ឋខ្មែរ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ៕
