ក្រុមហ៊ុនចិនឈ្មោះផៅវ័រឆាយណាស៊ីឈួន អេនជីនារីង ខបភើរេសិន លីមីធីត ដែលទទួលបានសិទ្ធិសាងសង់គម្រោងអនុស្ថានីយ៍វារីអគ្គិសនីនៅភូមិសុបិន្ត ឃុំពានី ស្រុកកំពង់ត្រឡាច ខេត្តកំពង់ឆ្នាំង បានដេញកាប់ដេញវ៉ៃកម្មករ កាលពីយប់ថ្ងៃទី១៨ ខែកញ្ញា បន្ទាប់ពីកម្មករប្រមាណជិត១០០នាក់ បានប្រមូលផ្តុំគ្នាតវ៉ាជាច្រើនថ្ងៃមកហើយ ទាមទារបើកប្រាក់ឈ្នួលពីក្រុមហ៊ុននេះ។ នេះបើយោងតាមលោក លាស់ សុភាក់ តំណាងកម្មករ។
លោក សុភាក់ បានឱ្យដឹងថា កម្មករប្រមាណជិត១០០នាក់ ដែលភាគច្រើនជាពលករដែលទើបវិលត្រឡប់មកពីថៃបានចូលមកធ្វើការនៅក្រុមហ៊ុនចិនផៅវ័រឆាយណា ស៊ីឈួន នៅភូមិសុបិន្ត ឃុំពានី ជាង១ខែមកហើយ។ ប៉ុន្តែនៅពេលដល់ថ្ងៃកំណត់ត្រូវបើកប្រាក់ឈ្នួល ក្រុមហ៊ុនមិនបានបើកប្រាក់ឈ្នួលឱ្យឡើយដោយសន្យាម្តងថ្ងៃនេះម្តងថ្ងៃនោះ។
លោកបន្តថា កាលពីល្ងាចថ្ងៃទី១៨ខែកញ្ញា បុគ្គលិកក្រុមហ៊ុនជាច្រើននាក់ដែលជាជនជាតិចិន បានកាន់កាំបិត និងដែកបំពង់ទីប ដេញកាប់ដេញវ៉ៃកម្មករ ដែលទៅតវ៉ានៅមុខក្រុមហ៊ុន ក្នុងភូមិសុបិន្ត ដើម្បីទាមទារបើកប្រាក់ឈ្នួលតាំងពីព្រឹកមកនោះ។
លោកថា៖ «ល្ងាចមិញ មេប៉ុស្តិ៍ប៉ូលិសអីក៏នៅក្នុងហេតុការណ៍នេះដែរ តែអត់មានចំណាត់ការអីខាងជនដែលដេញកាប់ដេញវ៉ៃមកលើក្រុមកម្មករសោះ។ វាដេកយ៉ាងស្រួល អត់មានចំណាត់ការអីចាប់វាយកទៅអប់រំ ឬយកទៅដោះស្រាយឱ្យកម្មករសោះ»។
បើតាមលោក សុភាក់ កម្មករនិងមេជាងដែលត្រូវបានក្រុមហ៊ុនចិនជួល ឱ្យមកធ្វើការទទួលបានប្រាក់ឈ្នួលក្នុង១ថ្ងៃមានចាប់ពី៥ម៉ឺនរៀល ទៅដល់៨ម៉ឺនរៀល។
វីអូឌី មិនមានប្រភពទាក់ទងនាយកប៉ុស្តិ៍ឃុំពានី និងមិនអាចទាក់ទង លោក តេង ច័ន្ទណាត ស្នងការនគរបាលខេត្តកំពង់ឆ្នាំង ដើម្បីស្នើសុំធ្វើការបញ្ជាក់លើបញ្ហានេះបានទេ នៅថ្ងៃទី១៩ខែកញ្ញានេះ។
វីអូឌី ក៏មិនអាចទាក់ទងលោក ស៊ុន មេសា អ្នកនាំពាក្យក្រសួងការងារ ដើម្បីស្នើសុំធ្វើអត្ថាធិប្បាយលើបញ្ហានេះបានដែរ នៅថ្ងៃទី១៩កញ្ញានេះ។
ប៉ុន្តែទាក់ទងនឹងការងាររបស់ពលករខ្មែរដែលទើបវិលត្រឡប់មកពីប្រទេសថៃ លោកស៊ុន មេសា បានស្រង់សម្តី លោក ហេង សួរ រដ្ឋមន្ត្រីក្រសួងការងារដែលបានថ្លែងកាលពីថ្ងៃទី១០ខែកញ្ញាថា អតីតពលករខ្មែរត្រឡប់មកពីថៃប្រមាណ ២២ម៉ឺននាក់ ក្នុងចំណោមជាង៩០ម៉ឺននាក់ បានទទួលឱកាសការងារធ្វើក្នុងស្រុកតាមរយៈយន្ដការរបស់ក្រសួងការងារ និងតាមរយៈការជួយសម្របសម្រួលពីវិស័យឯកជន ក៏ដូចជាមេដឹកនាំសហជីព។
បើតាមក្រសួងការងារ នាពេលបច្ចុប្បន្ន នៅមានឱកាសការងារជិត ៩ម៉ឺនកន្លែងផ្សេងទៀត នៅ២៥រាជធានី-ខេត្ត ទូទាំងប្រទេស សម្រាប់ប្រជាពលរដ្ឋ ក៏ដូចជាអតីតពលករដែលទើបត្រឡប់មកពីប្រទេសថៃវិញដែលជាការងារស្ថិតនៅក្នុងប្រព័ន្ធ។
កម្មករសំណង់ប្រមាណជិត ១០០នាក់ ដែលភាគច្រើនជាអ្នកទើបតែត្រឡប់មកពីប្រទេសថៃ បានប្រមូលផ្ដុំគ្នាតវ៉ាជាច្រើនថ្ងៃមកហើយ ករណីក្រុមហ៊ុនចិនផៅវ័រឆាយណា ស៊ីឈួន មិនបើកប្រាក់ឈ្នួលឱ្យ បន្ទាប់ពីពួកគេបានធ្វើការជាង១ខែ។ នេះបើយោងតាមសម្ព័ន្ធសហជីពចលនាកម្មករ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ (CUMW) បានចុះទៅកាន់ទីតាំង ដែលកម្មករតវ៉ា ស្ថិតនៅក្នុងស្រុកកំពង់ត្រឡាច ខេត្ដកំពង់ឆ្នាំង កាលពីថ្ងៃទី១៨ខែកញ្ញា ដើម្បីជួបកម្មករសំណង់ទាំងនោះ ដែលត្រូវបានថៅកែសំណង់ក្រុមហ៊ុន Power China មិនទាន់បើកប្រាក់ឈ្នួលជូនពួកគាត់នៅឡើយ។
លោក ប៉ាវ ស៊ីណា បានស្តាប់នូវបញ្ហារបស់កម្មករសំណង់ទាំងនោះ ដែលភាគច្រើនជាអតីតពលរដ្ឋខ្មែរទើបវិលត្រឡប់មកពីប្រទេសថៃ ដែលបានឱ្យដឹងថា ពួកគាត់បានចូលធ្វើការនៅទីនេះ ចាប់តាំងពីដើមខែកក្កដាមក ប៉ុន្ដែរហូតដល់ពេលនេះមិនទាន់បានបើកប្រាក់ឈ្នួលម្ដងនោះទេ។
តាមការបញ្ជាក់ពីកម្មករ បានឧ្យដឹងថា ពួកគេបានស្នើសុំបើកប្រាក់ឈ្នួលជាច្រើនដងមកហើយ ប៉ុន្តែថៅកែតែងតែពន្យាពេល ម្ដងហើយម្ដងទៀត ខណៈកម្មករម្នាក់ៗបានរៀបចំអីវ៉ាន់រួចរាល់ហើយ ដើម្បីទៅស្រុកកំណើតក្នុងឱកាសបុណ្យភ្ជុំបិណ្ឌ ប៉ុន្ដែគ្មានប្រាក់សូម្បីតែថ្លៃធ្វើដំណើរ។
លោកប៉ាវ ស៊ីណា និយាយក្នុងសំដីដើមថា៖ «ចំពោះខ្ញុំយល់ឃើញថា ករណីនេះ មន្រ្តីពាក់ព័ន្ធត្រូវចាត់វិធានការឱ្យបានតឹងរឹងចំពោះទង្វើរបស់ថៅកែនេះ កុំឱ្យរួចផុតពីការទទួលខុសត្រូវរបស់ខ្លួន»។
លោកបន្ដថា ការមិនបើកប្រាក់ឈ្នួលឱ្យកម្មករ គឺធ្វើឱ្យប៉ះពាល់ដល់ជីវភាពរស់នៅរបស់ពួកគាត់ធ្ងន់ធ្ងរ ពិសេសគឺពលករដែលទើបមកពីថៃ ពួកគាត់អាចមានសតិអារម្មណ៍ ហើយអាចប្រៀបធៀប រវាងការងារនៅស្រុកគេ និងស្រុកខ្លួនឯងផងដែរ។ ដូច្នេះហើយ ដើម្បីកុំឱ្យមានការប៉ះពាល់ដល់ជីវភាពរបស់ពួកគាត់លោកសូមស្នើដល់មន្រ្តីជំនាញពាក់ព័ន្ធ ត្រូវចាត់វិធានការដោះស្រាយជាបន្ទាន់។
មានពលករខ្មែរជាច្រើនដែលទើបវិលត្រឡប់មកពីថៃ បន្ទាប់ពីមានការផ្ទុះសង្គ្រាមត្រូវបានគេរាយការណ៍ថា បានវិលត្រឡប់ទៅរកការងារធ្វើនៅក្នុងប្រទេសថៃវិញ ដោយសារតែមិនអាចរកការងារបានធ្វើនៅក្នុងប្រទេសកម្ពុជា ឬការងារនៅកម្ពុជាទទួលបានប្រាក់ឈ្នួលទាបជាដើម។ ក្នុងចំណោមពលករខ្មែរដែលវិលត្រឡប់ទៅថៃវិញទាំងនោះ មានរហូតដល់ជាង៧០០នាក់ត្រូវបានសមត្ថកិច្ចថៃចាប់ឃាត់ខ្លួនបាន។
លោក លឹង សុផុន មន្ត្រីគម្រោងផ្នែកការពារសិទ្ធិពលករប្រចាំប្រទេសថៃ នៃអង្គការសង់ត្រាល់ បានថ្លែងថា បើគិតនៅក្នុងឆ្នាំ២០២៤ និងដើមឆ្នាំ២០២៥ គឺនៅមុនពេលផ្ទុះសង្គ្រាម តាមទិន្នន័យដែលអង្គការសង់ត្រាល់ទទួលបានគឺមានពលករខ្មែរទៅធ្វើការ នៅក្នុងប្រទេសថៃប្រមាណជាង ២លាននាក់។ ពលករខ្មែរទាំងនោះធ្វើការលើវិស័យកសិកម្ម ឧស្សាហកម្ម រោងចក្រ សេវាកម្ម និងវិស័យសំណង់ជាដើម ក្នុងនោះអ្នកធ្វើការក្នុងវិស័យសំណង់មានជាង ៣៦ភាគរយ។
ចំណែកទាក់ទងទៅនឹងសំណួរថា តើមានកក្តាអ្វីខ្លះដែលពលរដ្ឋខ្មែរមួយចំនួនត្រឡប់មកកម្ពុជាវិញ ហើយបែរជាវិលត្រឡប់ទៅថៃវិញទាំងប្រថុយប្រថាន?។
លោកថា៖ «បងប្អូនដែលគាត់ធ្លាប់រស់នៅថៃកន្លងមក គឺគាត់ចិត្តមិនដាច់ទេក្នុងការរស់នៅធ្វើការនៅក្នុងស្រុកថៃ។ បើយើងនិយាយទៅដល់គុណភាពជីវិត គុណភាពការងារ និយាយទៅដល់ការគ្រប់គ្រងរបស់រដ្ឋ សង្គមមួយ គេត្រូវការអភិបាលកិច្ចល្អ បើសិនជាប្រទេសខ្មែរមានការអភិវឌ្ឍ ហើយមានអភិបាលកិច្ចល្អទាក់ទងការងារ ជាពិសេសលើកកម្ពស់គុណភាពជីវិតឱ្យប្រជាពលរដ្ឋមានប្រាក់ឈ្នួលត្រឹមត្រូវ មានការគ្រប់គ្រងដោយរដ្ឋត្រឹមត្រូវ គ្រប់ផ្នែកដែលយើងហៅថាអភិបាលកិច្ចល្អហ្នឹង ខ្ញុំគិតថា ប្រជាពលរដ្ឋមិនវិលត្រឡប់មករកការងារនៅក្នុងប្រទេសថៃទេ»។
បើតាមលោក សុផុន ក្នុងកំឡុងមានសង្គ្រាមក្តៅគគុកកន្លងមកនេះ មានពលរដ្ឋខ្មែរប្រមាណ៨០ភាគរយក្នុងចំណោមប្រមាណជាង២លាននាក់ ដែលធ្វើការនិងរស់នៅក្នុងប្រទេសថៃ បានវិលត្រឡប់ទៅកម្ពុជាវិញ ប៉ុន្តែមានមួយចំនួនដែលបានទៅដល់កម្ពុជាហើយ ក៏បានវិលត្រឡប់មករកការងារធ្វើនៅថៃវិញជាបន្តបន្ទាប់ផងដែរ ដោយគ្រាន់តែក្នុងរយៈពេលជាងពីរខែ គឺចាប់ពីខែកក្កដាដល់ដើមខែកញ្ញា មានពលករខ្មែរជាង៧០០នាក់ ត្រូវអាជ្ញាធរថៃចាប់ឃាត់ខ្លួន៕
