អង្គការ ប៊ីប៊ីស៊ី មេឌា អាកសិន (BBC Media Action) បានប្រកាសពីការផ្អាកដំណើការការិយាល័យរបស់ខ្លួន នៅកម្ពុជា ចាប់ពីដើមខែតុលា ឆ្នាំ២០២៥នេះ ដោយសារកង្វះខាតថវិកា ប៉ុន្តែនៅដំណើការផ្នែករដ្ឋបាលតិចតួច ដោយសង្ឃឹមថា ស្ថាប័ននេះនឹងបន្តដំណើការឡើងវិញនៅពេលអនាគត។
នេះបើតាមលិខិតរបស់ការិយាល័យសកលនៃ BBC Media Action ផ្ញើជូនអង្គការក្រៅរដ្ឋាភិបាលក្នុងស្រុក និងអន្តរជាតិ និងដៃគូអភិវឌ្ឍន៍នៅកម្ពុជា កាលពីថ្ងៃទី១៧ ខែកញ្ញា និងត្រូវបានយកមកចុះផ្សាយដោយសារព័ត៌មាន Kiripost នៅថ្ងៃទី១៨ខែកញ្ញា។
ប្រភពដដែល បានឱ្យដឹងថា ការិយាល័យសកលនៃ BBC Media Action បានប្រកាសពីការផ្អាកដំណើការការិយាលរបស់ខ្លួនប្រចាំនៅកម្ពុជា ចាប់ពីថ្ងៃទី០១ ខែតុលា ឆ្នាំ២០២៥ តទៅ ដោយសារកង្វះថវិកា និងប្រាក់ចំណូលបណ្តោះអាសន្ន។
លោក Md. Al Mamun នាយកប្រចាំតំបន់អាស៊ីអាគ្នេយ៍ ត្រូវបានប្រភពដដែឡស្រង់សម្តីមកចុះផ្សាយថា៖ «អង្គការនៅតែប្តេជ្ញាចិត្តចំពោះបេសកកម្មរបស់ខ្លួន ហើយយើងកំពុងស្វែងរកនូវឱកាស ដើម្បីទទួលបានមូលនិធិ និងធនធាន ដែលអាចឱ្យយើងបន្តប្រតិបត្តិការពេញលេញនៅក្នុងប្រទេសកម្ពុជា នាពេលអនាគត»។
លោកបន្តថា ក្នុងអំឡុងពេលផ្អាកដំណើការនេះ ការិយាល័យរបស់ខ្លួន នឹងបន្តមុខងាររដ្ឋបាលតិចតួចបំផុត ដើម្បីធានាបាននូវដំណើរការនៃអង្គការ។
លោក Md. Al Mamun បានគូសបញ្ជាក់បន្ថែមក្នុងលិខិតនោះថា៖ «ប្រសិនបើការផ្តល់មូលនិធិ អាចមានឡើងវិញ យើងនឹងចាប់ផ្តើមប្រតិបត្តិការឡើងវិញភ្លាមៗ ហើយបន្តគោលដៅ និងគំនិតផ្តួចផ្តើមរួមរបស់យើង ឆ្ពោះទៅរកការជះឥទ្ធិពលជាវិជ្ជមាន»។
គួរបញ្ជាក់ថា BBC Media Action បានដំណើការអស់រយៈពេល ២២ឆ្នាំ ដោយបានបំពេញបេសកកម្មគាំទ្រដល់ការចូលរួមរបស់ប្រជាពលរដ្ឋ ជាពិសេសយុវជន និងប្រព័ន្ធផ្សព្វផ្សាយឯករាជ្យជាច្រើន។ BBC Media Action បានដើរតួនាទីយ៉ាងសំខាន់ ក្នុងការរៀបចំសង្គមកម្ពុជា ចាប់តាំងពីឆ្នាំ២០០៣ ដោយផ្តោតលើសុខភាព សិទ្ធិផ្លូវភេទ ការបន្តពូជ និងបញ្ហាបម្រែបម្រួលអាកាសធាតុជាដើម៕
