ក្រុមអ្នកធ្វើការផ្នែកសិទ្ធិការងារ និងសហជីពណាហ្គាវើលដ៍ នៅថ្ងៃសុក្រនេះ បានរួមគ្នាដាក់បិណ្ឌនៅវត្តចាស់ក្នុងរាជធានីភ្នំពេញ ជាអារាមធ្លាប់តម្កល់សពលោកបណ្ឌិត កែម ឡី ដោយផ្ញើសារថា យុត្តិធម៌សង្គមជាទំនុកចិត្តអ្នកវិនិយោគ ការពារដល់ឆ្នាំងបាយពលរដ្ឋ ខណៈការតវ៉ាប្រឆាំងនឹងការរើសអើងសហជីព បានអូសបន្លាយជាង៣ឆ្នាំ។
កញ្ញា ឈឹម ស៊ីថរ មេដឹកនាំសហជីពក្រុមហ៊ុនកាស៊ីណូណាហ្កាវើលដ៍ បានថ្លែងនៅបរិវេណវត្តចាស់ ជាទីអារ៉ាមដែលធ្លាប់តម្កល់សពលោកបណ្ឌិត កែម ឡី ថា ក្នុងឱកាសថ្ងៃកាន់បិណ្ឌទី១២នេះ ក្រុមកូដករណាហ្គាវើលដ៍ ជួបជុំគ្នាធ្វើបុណ្យឧទ្ទិសកុសលដល់បុព្វការីជន ក៏ដូចជាឧទ្ទិសកុសលសុំឱ្យមានដំណោះស្រាយ និងយុត្តិធម៌នៅកន្លែងការងារ ក្រោយពីពួកគាត់បានធ្វើកូដកម្មអស់រយៈពេល ១៣៧១ថ្ងៃហើយ ប៉ុន្តែនៅតែមិនទាន់មានដំណោះស្រាយនៅឡើយ។
កញ្ញាបន្តថា ការបន្តអូសបន្លាយទុកឱ្យវិវាទការងារនៅណាហ្គាវើលដ៍ ហើយបន្តឱ្យនិយោជកណាហ្គាវើលដ៍រំលោភសិទ្ធិការងារ និងសហជីពនេះ នឹងធ្វើឱ្យមានគំរូអាក្រក់សម្រាប់កន្លែងការងារផ្សេងទៀត និងប៉ះពាល់ដល់មុខមាត់កម្ពុជាលើឆាកអន្តរជាតិ។
កញ្ញា ឈឹម ស៊ីថរ ថ្លែងថា៖ «ដំណោះស្រាយរឿងណាហ្គាវើលដ៍នេះគឺសំខាន់ណាស់ គឺយើងមិនអាចបណ្តោយមិនដោះស្រាយ ហើយឱ្យថៅកែបញ្ឈប់តំណាងសហជីពតាមអំពើចិត្តបែបនេះទេ វានឹងបង្កើតគំរូអាក្រក់ទៅកន្លែងផ្សេង ហើយទាំងអស់គ្នា ក៏មិនបណ្តោយឱ្យនិយោជកទាំងអស់ មិនថានៅណាហ្គាវើលដ៍ឬនៅកន្លែងផ្សេងទេ យកគំរូអាក្រក់តាមក្រុមហ៊ុនមួយនេះ»។
ការណ៍នេះ មេដឹកនាំសហជីពរូបនេះ បានជំរុញឱ្យរដ្ឋាភិបាល ក៏ដូចជាអ្នកពាក់ព័ន្ធពន្លឿនការដោះស្រាយវិវាទការងារដ៏រ៉ាំរ៉ៃនេះ ដើម្បីបង្ហាញថាកម្ពុជាមានភាពស្អាតស្អំ និងអាចលាងខ្លួនចេញពីការរិះគន់រឿងរំលោភសិទ្ធិការងារ ព្រមទាំងអាចទាក់ទាញអ្នកវិនិយោគបន្ថែមទៀត។
កញ្ញាថា៖ «អីចឹងយើងគិតថា ការដោះស្រាយវិវាទនេះគឺនឹងធ្វើឱ្យប្រទេសកម្ពុជារបស់យើង នឹងមានភាពស្អាតស្អំ អាចលាងខ្លួនចេញពីការដែលត្រូវកំណត់ដោយអង្គការពលកម្មអន្តរជាតិ ថាជាប្រទេសដែលមានការរំលោភសិទ្ធិកម្មករ ហើយក៏ជាហេតុផលនៅក្នុងការដែលយើងអាចបន្តទាក់ទាញវិនិយោគិន នៅក្នុងប្រទេសកម្ពុជារបស់យើង ជាពិសេសគឺខាងម្ចាស់យីហាប្រេនទាំងឡាយ ដែលពួកគាត់មករកស៊ីនៅស្រុកខ្មែររបស់យើង គឺពួកគាត់មានកាតព្វកិច្ចមួយនៅក្នុងការដែលត្រូវតែរកស៊ី ឬក៏វិនិយោគនៅប្រទេសណាដែលគោរពសិទ្ធិកម្មករ។ ចឹងបើសិនជារឿងនៅណាហ្គាវើលដ៍នេះមិនត្រូវបានដោះស្រាយ យើងបារម្ភខ្លាចវាខុសគោលការណ៍របស់ក្រុមហ៊ុនបញ្ជាទិញទាំងអស់ហ្នឹង ក្រុមហ៊ុនម៉ាកយីហោល្បីៗទាំងអស់ហ្នឹង គឺវាធ្វើឱ្យប៉ះពាល់ទៅដល់ការសម្រេចចិត្ត ក្នុងការបន្តរកស៊ីនៅស្រុកខ្មែរទៀត»។
វីអូឌី មិនអាចសុំការបញ្ជាក់ជុំវិញករណីនេះ ពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានទេនៅថ្ងៃសុក្រនេះ។
កន្លងមក អ្នកនាំពាក្យក្រសួងការងារចាស់ លោក កត្តា អ៊ន ធ្លាប់ការពារថា ករណីវិវាទការងារនៅក្រុមហ៊ុនណាហ្គា ក្រសួងបានដោះស្រាយមកជាហូរហែ។ មួយវិញទៀត លោកថា ក្រុមហ៊ុនក៏បានផ្ទេរប្រាក់បំណាច់ និងសំណងបញ្ចប់កិច្ចសន្យាការងារ ចូលគណនីធនាគារអតីតបុគ្គលិក ដែលក្រុមហ៊ុនបានបញ្ចប់កិច្ចសន្យាការងារចំនួន ៣៧៣នាក់ រួចមកហើយដែរ។
វិវាទនៅក្រុមហ៊ុនណាហ្គាវើលដ៏ ផ្តើមចេញពីថៅកែក្រុមហ៊ុនបានបញ្ឈប់បុគ្គលិកប្រមាណ ១ ៣០០នាក់ កាលពីខែមេសា ឆ្នាំ២០២១ ដែលភាគច្រើនជាប្រធាននិងសមាជិកសហជីព អំឡុងពេលផ្ទុះជំងឺកូវីត-១៩ ដែលថៅកែអះអាងពីមូលហេតុជួបវិបត្តិហិរញ្ញវត្ថុ។
ប៉ុន្តែភាគីបុគ្គលិកដែលបានបញ្ឈប់ អះអាងថា ជាចេតនារបស់ថៅកែ ដើម្បីបំបាត់សហជីពឯករាជ្យ ក្នុងក្រុមហ៊ុនដែលតែងតែជំរុញលក្ខខណ្ឌការងារ ការពារសិទ្ធិបុគ្គលិក។
ការជំរុញលក្ខខណ្ឌការងារនៅក្រុមហ៊ុននេះ ត្រូវបានគេមើលឃើញថា ជាការតស៊ូមតិធំជាងគេក្នុងប្រទេសកម្ពុជា ដែលបានអះអាងបន្លាយរហូតជាង៣ឆ្នាំ ទោះប្រធានសហជីព កញ្ញា ឈឹម ស៊ីថរ ត្រូវបានចាប់ដាក់ពន្ធនាគាររហូតដល់ទៅពីរលើក។
ភាពជាប់គាំងនៃការរកដំណោះសា្រយនេះ ជំរុញឱ្យមានការព្រួយបារម្ភថា កម្មករនិងបុគ្គលិកច្រើនកន្លែងទៀត នឹងត្រូវបានគេរំលោភសិទ្ធិការងារ ដោយយកគំរូមិនល្អចេញពីក្រុមហ៊ុនណាហ្គាវើលដ៍នេះ បើក្រសួងពាក់ព័ន្ធរបស់រដ្ឋាភិបាល មិនអាចចាប់បង្ខំឱ្យថៅកែបរទេស គោរពច្បាប់របស់កម្ពុជាបាន។
សម្រាប់ លោក ឃុន ថារ៉ូ មន្ត្រីកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ ក៏ធ្លាប់និយាយថា ដើម្បីបញ្ចប់វិវាទការងារនេះបាន វាទាល់តែភាគីក្រុមហ៊ុន និងក្រសួងការងារ មានឆន្ទៈផ្សះផ្សាបញ្ចប់វិវាទ ពាក់ព័ន្ធនឹងការទទួលយកកូដករឱ្យចូលធ្វើការងារវិញ និងការទទួលស្គាល់សហជីព៕
