អន្តរជាតិ

តាលីបង់ហាមឃាត់សៀវភៅនិពន្ធដោយស្រ្តីទំនងជាប្រឆាំងនឹងគោលការណ៍សាសនា

កញ្ញា ឃុន ចន្ទដារ៉ារ័ត្ន
| ១៩ កញ្ញា ២០២៥
ម៉ោង ២១:២៥

រដ្ឋាភិបាលតាលីបង់ បានដកសៀវភៅដែលសរសេរដោយស្រ្តីចេញពីប្រព័ន្ធការបង្រៀននៅសកលវិទ្យាល័យក្នុងប្រទេសអាហ្គានីស្ថាន វាគឺជាផ្នែកនៃបម្រាមថ្មីមួយដែលបានហាមឃាត់ អំពីការបង្រៀនដែលទាក់ទងទៅនឹងសិទ្ធិមនុស្ស និងការបៀតបៀនផ្លូវភេទដែលទំនងមានការប្រឆាំងទៅនឹងគោលការណ៍នៃហ្សារៀ។

សារព័ត៌មាន ប៊ីប៊ីស៊ី(BBC) បានរាយការណ៍នៅថ្ងៃទី១៩ ខែកញ្ញា ឆ្នាំ២០២៥នេះថា មានសៀវភៅចំនួន ១៤០ក្បាលសរសេរដោយស្រ្តី រួមទាំងចំណងជើងដូចជា ‘‘សុវត្ថិភាពនៅក្នុងមន្ទីរពិសោធន៍គីមី’’ ដែលស្ថិតនៅក្នុងចំណោមសៀវភៅចំនួន ៦៨០ក្បាល ដែលបានរកឃើញថា មានការ‘‘ព្រួយបារម្ភ’’ ព្រោះតែគោលការណ៍ហ្សារៀ(Sharia) និងតាលីបង់។

ហ្សារៀ(Sharia) គឺជាច្បាប់នៅក្នុងសាសនាឥស្លាមដែលផ្អែកទៅលើគម្ពីកូរ៉ាន(Qu’ran) និងហាឌីស(Hadith)។

សកលវិទ្យាល័យបានប្រាប់ថា ពួកគេមិនត្រូវបានអនុញ្ញាតឱ្យបង្រៀនមុខវិជ្ជាចំនួន ១៨ទៀតទេ ដោយសារតែមន្ត្រីតាលីបង់ បាននិយាយថា ‘‘វាប្រឆាំងទៅនឹងគោលការណ៍របស់ហ្សារៀ(Sharia) និងគោលការណ៍នៃប្រព័ន្ធ’’។

ក្រឹត្យនេះដែរ គឺជាការឹតត្បិតបន្តរបន្ទាប់ដែលក្រុមតាលីបង់ បាននាំយកមកតាំងពីការវិលត្រឡប់មកកាន់អំណាចកាលពី៤ឆ្នាំមុន។

យ៉ាងណា សមាជិកម្នាក់នៃគណៈកម្មាធិការត្រួតពិនិត្យសៀវភៅ បានបញ្ជាក់ពីការហាមប្រាមសៀវភៅដែលសរសេរដោយស្រ្តីទៅកាន់ប៊ីប៊ីស៊ី(BBC) នៅអាហ្គានីស្ថានថា ‘‘រាល់សៀវភៅដែលនិពន្ធដោយស្រ្តីមិនត្រូវបានអនុញ្ញាតឱ្យបង្រៀននោះទេ’’។

លោក ស្សីអូ រ៉ាម៉ាន់ អាយូប៊ី(Ziaur Rahman Aryubi) នាយករងផ្នែកសិក្សានៃក្រសួងឧត្តមសិក្សារបស់រដ្ឋាភិបាលតាលីបង់ បាននិយាយនៅក្នុងលិខិតមួយទៅកាន់សកលវិទ្យាល័យថា ការសម្រេចនេះ ត្រូវបានធ្វើឡើងដោយក្រុមបញ្ញវ័ននិងអ្នកជំនាញសាសនា៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។