បន្ទាប់ពីធ្វើយុទ្ធនាការបោសសម្អាតឧក្រិដ្ឋកម្មឆបោកតាមអ៊ីនធឺណិត ដែលមានលក្ខណៈទ្រង់ទ្រាយធំ ពេលនេះ កម្ពុជាហាក់មិនទាន់ទៅណាឆ្ងាយពីការចោទប្រកាន់ដែលថា ជាសម្បុករបស់ក្រុមឧក្រិដ្ឋជននោះ នៅឡើយទេ។
នៅក្នុងបណ្ដាញសង្គមដែលមានឈ្មោះជាភាសាចិន បកប្រែជាភាសាខ្មែរថា «ការឃ្លាំមើលកម្ពុជា-ចិន» បានបង្ហោះសារជាច្រើនលើកភ្ជាប់ជាមួយឯកសារ និងរូបថតជាច្រើនសន្លឹក បានសរសេររៀបរាប់ កាលពីថ្ងៃទី១២ ខែកញ្ញាថា អគ្គនាយករង អគ្គនាយកដ្ឋានសម្ភារបច្ចេកទេស ក្រសួងការពារជាតិ ពាក់ផ្កាយ៣ និងជាពាណិជ្ជករជនជាតិចិន ដែលបានចូលសញ្ជាតិកម្ពុជា គឺលោក ឈួន យូ បានរៀបចំផែនការ ដើម្បីបោកប្រាស់សហគ្រាសរដ្ឋរបស់ចិន និងជាមេខ្លោងក្រុមឆបោកតាមអ៊ីនធឺណិត ដ៏មានឥទ្ធិពលម្នាក់។
ប្រភពអនាមិកខាងលើ បានអះអាងថា លោក ឈួន យូ បានជាប់ពាក់ព័ន្ធក្នុងករណីបោកប្រាស់សហគ្រាសរដ្ឋ និងឯកជន របស់ចិនមួយចំនួន តាមរយៈការបង្កើតគម្រោងវិនិយោគរ៉ែដែកក្លែងក្លាយ ដោយ លោក ឈួន យូ និងក្រុមហ៊ុន China Railway Major Bridge Engineering Group Co., Ltd. ដែលហៅកាត់ថា CRMB បានរួមគ្នាបង្កើតក្រុមហ៊ុនមួយ ឈ្មោះ យ៉ុងឡុង អ៊ីនធើណេសិនណល គ្រុប និងកាន់កាប់ភាគហ៊ុនចំនួន ៥១ភាគរយ ក្រុមហ៊ុន យ៉ុង ឡុង កាន់កាប់ ៤៩ភាគរយ។
ប្រភពដដែល អះអាងទៀតថា ក្នុងអំឡុងពេលរាតត្បាតនៃជំងឺកូវីដ-១៩ លោក ឈួន យូ បានក្លែងបន្លំហត្ថលេខាមេដឹកនាំចិន ដើម្បីយកភាគហ៊ុន ៤៩ភាគរយ របស់ក្រុមហ៊ុន យ៉ុងឡុង ដែលជាចំណែករបស់ក្រុមហ៊ុន CRMB យកធ្វើជារបស់លោកផ្ដាច់មុខ ហើយក្រុមហ៊ុន CRMB បានដាក់ពាក្យបណ្ដឹង និងបានចេញដីកាចាប់ខ្លួន លោក ឈួន យូ ហើយដែរ ប៉ុន្តែលោកនៅតែមានសេរីភាពក្រៅសំណាញ់ច្បាប់ ដោយសារតែមានការជ្រៀតជ្រែកពីបុគ្គលមិនស្គាល់អត្តសញ្ញាណជួយការពារ លោក ឈួន យូ។
ក្រៅពីករណីឆបោក ប្រភពអនាមិកដដែល បានអះអាងថា លោក ឈួន យូ បានផ្តល់ទីជម្រក ដោយបានសាងសង់អគារការិយាល័យនៅលើដីផ្ទាល់ខ្លួននៅមហាវិថីសហព័ន្ធរុស្សី ក្នុងរាជធានីភ្នំពេញ ដោយជួលកន្លែងរយៈពេលវែង និងបានធ្វើជាខ្នងបង្អែកដល់ក្រុមឆបោកតាមប្រព័ន្ធអ៊ីនធឺណិតនៅប្រទេសកម្ពុជា សម្រាប់ធ្វើប្រតិបត្តិការឆបោកទូទាំងពិភពលោក ដែលមានទឹកប្រាក់រាប់រយលានដុល្លារ។
ទោះជាយ៉ាងណា មតិមួយចំនួន បានលើកឡើងថា ការបង្ហោះរបស់ប្រភពខាងលើនេះ គឺជាល្បិចរបស់ប្រទេសជិតខាងកម្ពុជា ដែលមានចេតនាលាបពណ៌ ឬប្រឌិតរឿង ដើម្បីបំបែកបំបាក់ផ្ទៃក្នុងនៅក្នុងវិស័យកងទ័ពកម្ពុជា។
ក្នុងនោះ គណនីហ្វេសប៊ុកមួយ ឈ្មោះ ចូលី ជូ ដែលស្គាល់ថា ជាប្រពន្ធ លោក ឈួន យូ តាមរយៈរូបថតដំណើរកម្សាន្តលក្ខណៈគ្រួសារ ដែលបង្ហោះក្នុងគណនីហ្វេសប៊ុក បានប្រតិកម្មនៅក្រោមការបង្ហោះនោះថា លោកស្រីបានប្តឹងទៅនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ មជ្ឈត្តការនៃប្រទេសចិន និងសាលាឧទ្ធរណ៍ភ្នំពេញ ចំពោះការចោទប្រកាន់នេះ និងបានបដិសេធថា ការបង្ហោះ និងចែកចាយព័ត៌មានទាំងនេះ គឺជារឿងមិនពិត។
ក្រោយមានប្រតិកម្មខ្លាំងពីអ្នកលេងបណ្ដាញសង្គម និងការគំរាមប្រើវិធានការច្បាប់ គណនីហ្វេសប៊ុក «ការឃ្លាំមើលកម្ពុជា-ចិន» បានបិទដំណើរគណនីរបស់ខ្លួននៅពាក់កណ្ដាលខែកញ្ញា។
ក៏ប៉ុន្តែ វីអូឌី បានរកឃើញប្រភពមួយចំនួន លាតត្រដាងពីមុខមាត់របស់ លោក ឈួន យូ ឧត្តមសេនីយ៍ឯក ពាក់ផ្កាយបី សញ្ជាតិដើមចិនរូបនេះ។
អតីតអ្នកសារព័ត៌មានឯករាជ្យម្នាក់ ធ្លាប់តាមដានករណីលោក ឈួន យូ កាលពីឆ្នាំ២០២៤ ថ្លែងក្នុងលក្ខខណ្ឌមិនបញ្ចេញឈ្មោះ បានអះអាងប្រាប់ វីអូឌី ថា មន្ត្រីយោធាជាន់ខ្ពស់ និងជាពាណិជ្ជករចិន ដែលទទួលបានសញ្ជាតិកម្ពុជា លោក ឈួន យូ គឺជាអ្នកគ្រប់គ្រងបណ្ដាញឧក្រិដ្ឋជនធំៗនៅកម្ពុជា ដែលសម្របសម្រួលលើការបញ្ជូនប្រតិបត្តិករមកពីបណ្ដាប្រទេសមួយចំនួន ទៅកាន់ទីតាំងប្រតិបត្តិការឆបោកតាមអ៊ីនធឺណិតធំៗ ដែលមានមូលដ្ឋាននៅតាមព្រំដែនប្រទេសមីយ៉ាន់ម៉ា ឬភូមា ប្រទេសឡាវ ដោយឆ្លងកាត់ប្រទេសតាមដងទន្លេមេគង្គ។
អតីតអ្នកសារព័ត៌មានឯករាជ្យ៖ «មិនបាច់ឆ្ងល់ទេថា នៅពេលកងកម្លាំងចុះទៅបង្ក្រាបទីតាំងឆបោកធំៗ ហេតុអីបានចាប់មេខ្លោង ឬមេបោះដុំ របស់ប្រតិបត្តិករនេះបាន។ លោក ឈួន យូ មិនមានអ្នកស្គាល់គាត់ច្រើននោះទេ គាត់អាថ៌កំបាំងណាស់ សូម្បីតែពិធីមង្គលការរបស់កូនលោក កាលពីឆ្នាំ២០១៩ហ្នឹង ក៏មិនបានធ្វើជាលក្ខណៈបើកចំហ ដូចពិធីមង្គលការរបស់កូនសេដ្ឋី ឬអ្នកធំនៅក្នុងស្រុកខ្មែរផ្សេងទៀតនោះទេ។ បើចង់ដឹងរឿង លោក ឈួន យូ ច្បាស់ ទាល់តែសម្ភាសន៍លោក ទៀ បាញ់»។
អតីតអ្នកសារព័ត៌មានបែបស៊ើបអង្កេតរូបនេះ អះអាងថា នេះមិនមែនជារឿងថ្មីនោះទេ ដែលមេដឹកនាំកម្ពុជា មានទំនាក់ទំនងជាមួយក្រុមឧក្រិដ្ឋជនអន្តរជាតិ ដែលពួកគេបានពឹងពាក់ និងផ្ដល់ផលប្រយោជន៍ឱ្យគ្នាទៅវិញទៅមក ខណៈមេឧក្រិដ្ឋជនទាំងនោះ អ្នកខ្លះត្រូវបានតែងតាំងជាទីប្រឹក្សាលោក ហ៊ុន សែន និងអ្នកខ្លះ ជាឯកឧត្តម និងកាន់តួនាទីកន្លែងសំខាន់ៗ ក្នុងជួររដ្ឋាភិបាល។
លោកបន្តថា ដោយសារតែមានសាវតាអាក្រក់បែបនេះហើយនោះ ប្រសិនបើរដ្ឋាភិបាលកម្ពុជា ចង់លាងសម្អាតខ្លួន លុះត្រាតែមេដឹកនាំកម្ពុជា ហ៊ានកាត់សាច់ស្អុយនេះចេញ។
លោក ឈួន យូ មានឈ្មោះជាភាសាចិនថា ឈួន អ៊ី (Chon You) ត្រូវបានគេស្គាល់ថា ជាសហគ្រិនម្នាក់ដែលចូលចិត្តរកស៊ីតាមរបៀបលោតឆ័ត្រ ឬលក់ខ្យល់។ ក្រៅតែពីរកស៊ីក្នុងសង្គមងងឹត លោក ឈួន យូ មានក្រុមហ៊ុនមួយទៀត ឈ្មោះ ជី.ស៊ី.ស៊ី (GCC) ដែលរកស៊ីវិនិយោគលើវិស័យអចនលទ្រព្យ និងផ្សារទំនើប ជីស៊ីអូរឫស្សី និងកំពុងរងបណ្ដឹងរបស់អាជីវករ ដោយសារការខកខានមិនសាងសង់ផ្សារតាមកិច្ចសន្យា បន្ទាប់ពីប្រមូលលុយពីពលរដ្ឋបានរាប់លានដុល្លារ ហើយចុងក្រោយត្រូវអាជ្ញាធរប្រកាសថា អត់មានអាជ្ញាប័ណ្ណ។
ទោះយ៉ាងណា បច្ចុប្បន្នគម្រោងអភិវឌ្ឍន៍ផ្សារ ជី.ស៊ី អូរឫស្សី នៅតែមានសកម្មភាពនៅឡើយ ដោយក្រុមហ៊ុននៅតែបន្តការឃោសនា ខណៈករណីទាមទារប្រាក់សំណងរបស់ពលរដ្ឋ ដែលបានទិញតូបខ្យល់នោះ មិនត្រូវបានដោះស្រាយនោះឡើយ ហើយដើម្បីគេចវេះ និងបិទបាំងរឿងនេះ គណនីហ្វេសប៊ុករបស់ផ្សារ ជី.ស៊ី អូរឫស្សី បានបិទការបញ្ចេញមតិ ឬComment។
ក្រៅពីរកស៊ីវិនិយោគលើគម្រោងផ្សារទំនើបខ្យល់ លោក ឈួន យូ មានភាគហ៊ុនមួយចំណែកទៀត នៅក្នុងក្រុមហ៊ុន ហួយវ័ន គ្រុប (Huione Group) ដែលមានមូលដ្ឋាននៅក្នុងប្រទេសកម្ពុជា និងជាក្រុមហ៊ុនមេនៃក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ ដែលត្រូវជាក្មួយបង្កើតរបស់ប្រធានព្រឹទ្ធសភា លោក ហ៊ុន សែន ដែលក្រុមហ៊ុននេះ ត្រូវបានក្រសួងរតនាគារអាមេរិក រកឃើញថា ជាបណ្ដាញលាងលុយកខ្វក់ដ៏ធំ ឱ្យក្រុមឧក្រិដ្ឋជន រួមទាំងក្រុមចោរបច្ចេកវិទ្យារបស់ប្រទេសកូរ៉េខាងជើង និងក្រុមឆបោកនៅតំបន់អាស៊ីអាគ្នេយ៍ផ្សេងទៀត។
មកទល់ពេលនេះ វីអូឌី នៅមិនទាន់រកឃើញពីប្រភពណាមួយ បញ្ជាក់ពីការផ្ដល់សញ្ជាតិ និងប្រវត្តិនៃការកាន់តួនាទីកន្លឹះ ដ៏សំខាន់នៅក្នុងក្របខណ្ឌក្រសួងការពារជាតិកម្ពុជា របស់លោក ឈួន យូ ក្នុងរយៈពេលដ៏ខ្លីបែបនេះឡើយ ដោយកាលពីដំបូង លោក ឈួន យូ ត្រូវបានគេស្គាល់ថា ជាប្រធានក្រុមហ៊ុនរុករករ៉ែ ឈ្មោះ យ៉ុងឡុង ប៉ុន្តែក្រោយមកលោកបានឡើងជាឧត្តមសេនីយ៍ ពាក់ផ្កាយបី ដូចព្រះឥន្ទប្រទានឱ្យ ហើយគ្មាននរណាម្នាក់ បានដឹងពីស្នាដៃ និងប្រវត្តិអតីតភាពការងាររបស់លោកនោះឡើយ។
ជាការកត់សម្គាល់ ជោគជតារាសីរបស់លោក ឈួន យូ បានឡើងខ្ពស់មួយរំពេចបែបនេះ គឺបន្ទាប់ពីក្រុមហ៊ុនយ៉ុងឡុង ដែលទទួលរងការចោទប្រកាន់ពីបទឆបោកសហគ្រាសរដ្ឋចិន ក្នុងគម្រោងវិនិយោគរ៉ែដែកនោះ បានបង្កើតកិច្ចសហប្រតិបត្តិការជាមួយសមាគមគ្រូពេទ្យស្ម័គ្រចិត្ត ធីតា (TYDA) របស់លោក ហ៊ុន ម៉ាណែត នៅពីឆ្នាំ២០១៧ ហើយលោកបានបង្កើនទំនាក់ទំនងជិតស្និទ្ធជាមួយមន្ត្រីធំៗ ក្នុងជួររដ្ឋាភិបាលថែមទៀត។
មិនខុសពីមន្ត្រីខ្មែរមួយចំនួនឡើយ ក្រៅតែពីតួនាទីនៅក្នុងក្របខ័ណ្ឌក្រសួងការពារជាតិហើយនោះ លោក ឈួន យូ នៅមានតួនាទីច្រើនសន្ធឹកទៀត នៅក្នុងស្ថាប័នតាមក្រសួងមួយចំនួន រួមមាន ជាទីប្រឹក្សាក្រសួងឧស្សាហកម្ម និងក្រុមការងាររបស់រដ្ឋាភិបាលចុះមូលដ្ឋានតាមបណ្ដាខេត្តជាដើម។
តែយ៉ាងណា គេសង្កេតឃើញថា លោក ឈួន យូ ដែលមានឋានន្តរស័ក្ដិឧត្តមសេនីយ៍ឯក និងកាន់តួនាទីជាអគ្គនាយករង អគ្គនាយកដ្ឋានសម្ភារបច្ចេកទេសនៃក្រសួងការពារជាតិ មានទំនាក់ទំនងយ៉ាងជិតស្និទ្ធជាមួយអតីតរដ្ឋមន្ត្រីក្រសួងការពារជាតិ និងបច្ចុប្បន្នជាឧត្តមប្រឹក្សាផ្ទាល់ព្រះមហាក្សត្រ គឺលោក ទៀ បាញ់ និងលោកនាយករដ្ឋមន្ត្រី ហ៊ុន ម៉ាណែត ទៀតផង។
ជាក់ស្ដែង កាលពីឆ្នាំ២០១៩ លោក ទៀ បាញ់ ត្រូវបានអញ្ជើញជាភ្ញៀវកិត្តិយសសំខាន់ជាងគេ នៅក្នុងពិធីរៀបអាពាហ៍ពិពាហ៍កូនប្រុសរបស់លោក ឈួន យូ។
ជាងនោះទៅទៀត នាយឧត្តមសេនីយ៍ផ្កាយបី សញ្ជាតិដើមចិនរូបនេះ បានបរិច្ចាគលុយដល់កាកបាទក្រហមកម្ពុជា ស្ថិតក្រោមការគ្រប់គ្រងរបស់ប្រពន្ធប្រធានព្រឹទ្ធសភា លោក ហ៊ុន សែន គឺលោកស្រី ប៊ុន រ៉ានី ចំនួនរាប់ម៉ឺនដុល្លារជាច្រើនលើកទៀតផង ដោយពេលខ្លះប្រើឈ្មោះលោកជាអ្នកបរិច្ចាគ និងពេលខ្លះទៀតប្រើឈ្មោះក្រុមហ៊ុន Cambodian K88 Industry ជាអ្នកបរិច្ចាគ។
ក្រុមហ៊ុន Cambodian K88 Industry ចុះបញ្ជីនៅក្រសួងពាណិជ្ជកម្ម កាលពីឆ្នាំ២០១៨ ក្រោមឈ្មោះលោក ឈួន យូ ផ្ទាល់ ជាប្រធាន កំពុងធ្វើសកម្មភាពជាមួយក្រុមហ៊ុន លេត ឆេង ម៉ាញនីង (Late Cheng Mining Development Co. Ltd.) ជីកយករ៉ែនៅក្នុងដែនជម្រកសត្វព្រៃព្រៃឡង់ ខេត្តកំពង់ធំ។ នេះបើតាមការលើកឡើងរបស់លោក មិញ នី សមាជិកបណ្តាញសហគមន៍ព្រៃឡង់ ប្រាប់ទៅកាន់បណ្ដាញសារព័ត៌មានកាលពីឆ្នាំ២០២៤។
នៅក្នុងឆ្នាំ២០១៩ ដដែលនោះ លោក ឈួន យូ ត្រូវបានស៊ើបអង្កេតរកឃើញ មានជាប់ពាក់ព័ន្ធនឹងករណីរក្សាទុកសារធាតុផ្ទុះរាប់សិបតោន ដែលលាក់ទុកនៅកណ្តាលព្រៃមួយកន្លែង ក្នុងភូមិសាស្ត្រស្រុកសណ្ដាន់ ខេត្តកំពង់ធំ។ កាលនោះ ក្រសួងការពារជាតិ បានចេញមកបញ្ជាក់ថា សារធាតុផ្ទុះទាំងនេះ គឺជារបស់ក្រុមហ៊ុនចិនមួយ ទុកប្រើសម្រាប់បំផ្ទុះយករ៉ែ ប៉ុន្តែក្រសួងមិនបានបញ្ចេញឈ្មោះក្រុមហ៊ុន និងម្ចាស់កម្មសិទ្ធិនោះឡើយ។ (មានរូបភាព File num. 26-31)
ជុំវិញរឿងនេះ ប្រធានក្រុមឃ្លាំមើលកម្ពុជា លោក ម៉ែន ណាត យល់ឃើញថា ការលើកឡើងរបស់ប្រភពអនាមិកខាងលើ អាចជាការពិត ព្រោះមានភស្តុតាង និងរបាយការណ៍ស៊ើបអង្កេតជាច្រើន បានលាតត្រដាង ពីក្រុមឧក្រិដ្ឋជនឆបោកតាមអនឡាញ មានវត្តមានជាមួយមេដឹកនាំកម្ពុជាដែរ។ លោកបន្តថា ដើម្បីលាងជម្រះខ្លួន ពីការចោទប្រកាន់ជុំវិញប្រតិបត្តិការខ្មៅមួយនេះ រដ្ឋាភិបាលកម្ពុជា ត្រូវតែទទួលស្គាល់របាយការណ៍របស់អន្តរជាតិ និងបើកការស៊ើបអង្កេត ជាជាងការប្រកែក ឬច្រានចោល។
លោក ម៉ែន ណាត ថ្លែងថា៖«ជាពិសេសក្រុមឧកញ៉ា ដែលល្បីៗ ក្នុងឧក្រិដ្ឋកម្មហ្នឹង មានដូចជា លោក លី យ៉ុងផាត់ លោក ហ៊ុន តូ លោក ទ្រី ភាព និងលោក កុក អាន ជាដើមហ្នឹង គួរណាស់តែត្រូវបានដកងារជាឧកញ៉ាចេញ ហើយបញ្ជូនឱ្យតុលាការផ្ដន្ទាទោសតាមផ្លូវច្បាប់។ ត្រូវចាត់វិធានការតាមផ្លូវច្បាប់ ដើម្បីចូលរួមជាមួយដៃគូអន្តរជាតិនានា រួមជាមួយសហរដ្ឋអាមេរិកហ្នឹង បង្ក្រាបឧក្រិដ្ឋកម្មអនឡាញ ដែលកំពុងតែល្បីខ្ទ័រខ្ទា អាសោចនៅលើឆាកអន្តរជាតិ»។
ដោយឡែក ចំពោះទីប្រឹក្សាផ្នែកធុរកិច្ច និងអភិបាលកិច្ច លោក ប៉ិច ពិសី វិញ បានប្រាប់វីអូឌីជាសំណេរតាមរយៈបណ្ដាញទំនាក់ទំនងតេឡេក្រាមថា បណ្តាញឧក្រិដ្ឋកម្មបានធ្វើឱ្យមានការបំផ្លិចបំផ្លាញជាយូរយារណាស់មកហើយនៅក្នុងប្រទេសកម្ពុជា និងទូទាំងតំបន់ ដោយធ្វើឱ្យកម្ពុជា និងប្រទេសអាស៊ាន ខាតបង់ប្រាក់រាប់ពាន់លានដុល្លារក្នុងមួយឆ្នាំៗ។
លោកបន្តថា ក្រុមឧក្រិដ្ឋជនទាំងនេះ បន្តប្រតិបត្តិការដោយនិទណ្ឌភាព ដែលត្រូវបានចោទថា មានការការពារដោយមន្ត្រីពុករលួយតាមរយៈការសូកប៉ាន់ ការជំរិតទារប្រាក់ និងការគំរាមកំហែង។ លោកបញ្ជាក់បន្ថែមថា ប្រទេសកម្ពុជា និងប្រទេសជិតខាង ត្រូវតែចាត់វិធានការជាបន្ទាន់ ដើម្បីរុះរើបណ្តាញទាំងនេះ មុនពេលពួកគេពង្រឹងខ្លួនបន្ថែមទៀតនៅក្នុងប្រព័ន្ធនយោបាយ និងសេដ្ឋកិច្ច។
យ៉ាងណាក៏ដោយចុះ ប្រភពគណនីហ្វេសប៊ុកអនាមិកខាងលើ បានអះអាងថា សហគ្រាសចិន ដែលរងផលប៉ះពាល់ កំពុងធ្វើដំណើរការផ្លូវច្បាប់ និងស៊ើបអង្កេតឆ្លងដែន ខណៈស្ថានទូតចិនប្រចាំប្រទេសកម្ពុជា បានចេញសេចក្តីជូនដំណឹង ណែនាំឱ្យសហគ្រាសចិនប្រុងប្រយ័ត្ន ដោយជំរុញឱ្យក្រុមហ៊ុនចិននៅកម្ពុជា ពិនិត្យឱ្យបានហ្មត់ចត់ នូវសាវតាដៃគូរកស៊ីរបស់ខ្លួននៅកម្ពុជា កុំឱ្យកើតមានឧក្រិដ្ឋកម្មសេដ្ឋកិច្ចឆ្លងដែនបែបនេះទៀត។
អ្នកឃ្លាំមើលកម្ពុជាថា រឿងអាស្រូវនេះមិនមែនគ្រាន់តែជាទោសឧក្រិដ្ឋកម្មរបស់លោក ឈួន យូ ប៉ុណ្ណោះទេ ប៉ុន្តែវាបានធ្វើឱ្យប៉ះពាល់ដល់សេដ្ឋកិច្ច និងកេរ្តិ៍ឈ្មោះរបស់ប្រទេសកម្ពុជា នៅពេលដែលឧត្តមសេនីយជាន់ខ្ពស់ម្នាក់ បានគប់គិតជាមួយក្រុមឆបោកនោះ និងជំនួញទុច្ចរិត។ ពួកគាត់ថា សកម្មភាពនេះមិនត្រឹមតែធ្វើឱ្យប្រទេសកម្ពុជាក្លាយជាសំបុកនៃការឆបោកតាមប្រព័ន្ធអ៊ីនធឺណិតប៉ុណ្ណោះទេ ប៉ុន្តែវាថែមទាំងបណ្តាលឱ្យមានការប៉ះពាល់ធ្ងន់ធ្ងរដល់សណ្តាប់ធ្នាប់សេដ្ឋកិច្ច និងទំនុកចិត្តមកលើប្រទសកម្ពុជា នៅលើកិច្ចសហប្រតិបត្តិការអន្តរជាតិទៀតផង៕
