ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី(Volodymyr Zelenskiy) បាននិយាយកាលពីថ្ងៃអង្គារថា លោកជឿជាក់ថា ប្រធានាធិបតីសហរដ្ឋអាមេរិក លោក ដូណាល់ ត្រាំ(Donald Trump) អាចជួយផ្លាស់ប្តូរជំហរប្រធានាធិបតីចិនលោក ស៊ី ជីនពីង(Xi Jinping)ចំពោះសង្គ្រាមរុស្ស៊ីនៅអ៊ុយក្រែន។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍កាលពីថ្ងៃទី២៤ ខែកញ្ញា ឆ្នាំ២០២៥នេះថា លោក ហ្សេលេនស្គី បានប្រាប់ទៅកាន់សារព័ត៌មានហ្វក្ស ញូ(Fox News)ថា ‘‘ខ្ញុំគិតថា លោកប្រធានាធិបតី ដូណាល់ ត្រាំ អាចផ្លាស់ប្តូរឥរិយាបថ លោក ស៊ី ជីនពីង ចំពោះសង្គ្រាមរុស្ស៊ីនៅអ៊ុយក្រែននេះ ព្រោះថា យើងយល់ថាប្រទេសចិនហាក់បីមិនចង់បញ្ចប់សង្រ្គាមនេះទេ’’។
សហរដ្ឋអាមេរិក បានគូសបញ្ជាក់ថា ចិននិងឥណ្ឌា ជាអ្នកចូលរួមចំណែកក្នុងសង្រ្គាមរុស្ស៊ីនៅក្នុងអ៊ុយក្រែន ដោយសារតែការបន្តទិញប្រេងពីទីក្រុងមូស្គូ(Moscow)។ បន្ថែមពីនេះប្រភពបានប្រាប់រ៉យទ័រ កាលពីសប្តាហ៍មុន(Reuters)ថា លោក ត្រាំ បានជំរុញមន្រ្តីសហភាពអឺរ៉ុបឱ្យដាក់ពន្ធ១០០%ទៅលើប្រទេសចិនដើម្បីជាការរារាំងដល់ការទិញប្រេងពីរុស្ស៊ី។ យ៉ាងណា លោក ត្រាំ ក៏បានអំពាវនាវស្រដៀងគ្នាក្នុងការបន្ថែមពន្ធទៅលើប្រទេសឥណ្ឌាផងដែរ។
សំណើររបស់សហរដ្ឋអាមេរិក បើត្រូវបានអនុវត្តដោយយកចិត្តទុកដាក់នឹងនាំឱ្យមានការផ្លាស់ប្តូរយុទ្ធសាស្រ្តរបស់សហភាពអឺរ៉ុប ដែលពីមុនធ្លាប់បានដាក់ឱ្យរុស្ស៊ីនៅឯកោ ជាជាងការដាក់ទណ្ឌកម្មពន្ធ។
ជាមួយគ្នានេះ អ្នកនាំពាក្យស្ថានទូតចិន បានបដិសេធកាលពីថ្ងៃអង្គារ ដែលថាទីក្រុងប៉េកាំងគឺជាភាគីនៃជម្លោះកំពុងបន្តនោះ ហើយប្រទេសចិនបានបញ្ជាក់ថា ‘‘ប្រទេសចិនមិនបានកេងប្រវ័ញ្ចស្ថានភាពនេះ ដើម្បីផលប្រយោជន៍នោះទេ’’។
ប្រភពរ៉យទ័រថា លោក ត្រាំ មានការខកចិត្តដែលលោកមិនអាចបញ្ចុះបញ្ចូលរុស្ស៊ី និងអ៊ុយក្រែន ឱ្យឈានដល់ការបញ្ចប់សង្រ្គាមជាងបីឆ្នាំ បន្ទាប់ពីកងកម្លាំងរុស្ស៊ីបានឈ្លានពានអ៊ុយក្រែន៕
