ជំនន់ទឹកភ្លៀងនៅស្រុកចំនួន២ ក្នុងខេត្តរតនគិរី បានបង្កផលប៉ះពាល់ដល់ប្រជាពលរដ្ឋជាង ៤៤០០គ្រួសារ និងហេដ្ឋារចនាសម្ព័ន្ធមួយចំនួន ខណៈអាជ្ញាធរមានសមត្ថកិច្ច បាននិងកំពុងតាមដានស្ថានភាពទឹកជំនន់ និងជម្លៀសពលរដ្ឋដែលងាយរងគ្រោះ ទៅកាន់ទីទួលសុវត្ថិភាព។
រដ្ឋបាលខេត្តរតនគិរី បានឱ្យដឹងតាមរយៈទំព័រហ្វេសប៊ុករបស់ខ្លួនថា គិតត្រឹមព្រឹកថ្ងៃទី២៦ ខែកញ្ញា ឆ្នាំ២០២៥នេះ ស្ថានភាពទឹកជំនន់ទឹកភ្លៀង បានបង្កឱ្យរងផលប៉ះពាល់ស្រុកចំនួន២ ក្នុងខេត្តនេះ ក្នុងនោះមានស្រុកលំផាត់ ប៉ះពាល់ចំនួន ៣ឃុំ ដែលមានប្រជាពលរដ្ឋចំនួន ៣ ៤៦៧ គ្រួសាររងគ្រោះ និងស្រុកកូនមុំ ប៉ះពាល់ចំនួន ៥ឃុំ មានប្រជាពលរដ្ឋចំនួន ៩៨៣គ្រួសាររងគ្រោះ។
ប្រភពដដែលបន្តថា បច្ចុប្បន្ន អាជ្ញាធរ ក៏ដូចជាគណៈកម្មាធិការគ្រប់គ្រងគ្រោះមហន្តរាយខេត្ត បាននិងកំពុងបន្តតាមដានស្ថានភាពទឹកជំនន់យ៉ាងយកចិត្តទុកដាក់ និងបានសម្របសម្រួលជម្លៀសប្រជាពលរដ្ឋដែលងាយរងគ្រោះចំនួន ១៧៥គ្រួសារ ទៅកាន់ទីទួលសុវត្ថិភាព។
តែយ៉ាងណា រដ្ឋបាលខេត្តបានគូសបញ្ជាក់ថា គ្រោះមហន្តរាយជំនន់ទឹកភ្លៀងនេះ ពុំបានបង្កឱ្យប្រជាពលរដ្ឋរងគ្រោះថ្នាក់ដល់អាយុជីវិតនោះទេ។
ចំណែក ក្រសួងសាធារណការ និងដឹកជញ្ជូន ក៏បានជូនដំណឹងពីការផ្អាកចរាចរណ៍បណ្តោះអាសន្នរថយន្តដឹកទំនិញធុនធ្ងន់គ្រប់ប្រភេទ នៅលើផ្លូវជាតិលេខ៧៦ ចន្លោះបង្គោលគីឡូម៉ែត្រលេខ២៧០ ដល់២៧៣ ក្នុងភូមិសាស្ត្រស្រុកលំផាត់ ខេត្តរតនគិរី ផងដែរ ដោយសារទឹកជន់លិចផ្លូវដោយកន្លែងពិបាកធ្វើចរាចរណ៍ និងដើម្បីសុវត្ថិភាពប្រជាពលរដ្ឋ។
បើតាមអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមន្នី ដែលប្រាប់កាសែតភ្នំពេញប៉ុស្តិ៍ គិតត្រឹមថ្ងៃទី២៥ ខែកញ្ញា ជំនន់ទឹកភ្លៀង បាននិងកំពុងបង្កផលប៉ះពាល់ដល់តំបន់មួយចំនួន ក្នុងខេត្តចំនួន៨ នៃប្រទេសកម្ពុជា បណ្តាលឱ្យប៉ះពាល់ដល់ប្រជាពលរដ្ឋប្រមាណ ៧ ៥០០គ្រួសារ, ដំណាំស្រូវជាង៥ពាន់ហិកតា, ដំណាំរួមផ្សំជាង១ ៨០០ហិកតា និងបាក់ច្រាំង២កន្លែង ប្រវែងជាង៨០០ម៉ែត្រ។
ប្រភពដដែលបន្តថា ខេត្តទាំង៨ ដែលជួបបញ្ហាជំនន់ទឹកភ្លៀង រួមមាន ខេត្តកំពង់ធំ ព្រៃវែងបន្ទាយមានជ័យ រតនៈគិរី មណ្ឌលគិរី ស្ទឹងត្រែង សៀមរាប និងក្រចេះ៕
