អស់រយៈពេលជាច្រើនខែមកហើយ ដែលពលរដ្ឋខ្មែររស់នៅតាមបណ្ដោយព្រំដែន បានវេចកូនជញ្ជូនចៅ និងសម្ពាយ ភៀសខ្លួនចាកចោលផ្ទះសម្បែង ដោយសារមានការគំរាមកំហែងខាងផ្នែកយោធា ពីសំណាក់ប្រទេសថៃ ទោះបីកម្ពុជាបានប្រកាន់ខ្ជាប់បទឈប់បាញ់យ៉ាងណាក្ដី។
ពលរដ្ឋរស់នៅជាប់ព្រំដែនថៃ ស្ថិតក្នុងភូមិអូរត្រាវ សង្កាត់ទន្សាយរាក់ ក្រុងសំរោង ខេត្តឧត្តរមានជ័យ លោក ងឿន វីឡា បានបង្ហោះវីដេអូនៅលើបណ្ដាញសង្គម កាលពីថ្ងៃទី២៥ ខែកញ្ញាថា លោកបានភៀសខ្លួនពីតំបន់ព្រំដែនតាំងពីយប់មកម្ល៉េះ បន្ទាប់ពីបានឮសំឡេងផ្ទុះអាវុធចេញពីតំបន់ព្រំដែននៅមួយថ្ងៃមុនជម្លៀស ហើយលោក និងអ្នកភូមិផ្សេងទៀត បានរៀបចំរបស់របរ ដូចជា កន្ទេល មុង ភួយ ខ្នើយ ដាក់លើទ្រុងគោយន្ត ដើម្បីត្រៀមភៀសខ្លួនជាស្រេច។
លោកបន្តថា ការជម្លៀសដ៏ទាន់ហន់បែបនេះ គឺដោយសារលោកខ្វះខាតមធ្យោបាយធ្វើដំណើរ និងដឹកជញ្ជូនដែលលឿន បូករួមជាមួយនឹងផ្លូវពិបាក នៅក្នុងរដូវវស្សា។
លោក ងឿន វីឡា និយាយថា៖ «អ្នកខ្លះថា មិនទាន់ផ្ទុះអាវុធ ពេលឃើញយើងរត់អ៊ីចឹង គេថាយើងបំពុលសង្គម ប៉ុន្តែបងប្អូនគួរយល់ហើយថា ផ្លូវគ្រួសក្រហមយើងក្នុងខែនេះ វាខូច វាពិបាកក្នុងការធ្វើដំណើរ។ មានអ្នកខ្លះប្រើប្រាស់ម៉ូតូអូសរទេះ ហើយអ្នកខ្លះបរគោយន្ត និងត្រាក់ទ័រ មិនអាចបើកបរលឿនបានដូចឡានទេ។ ត្រូវយល់ផង មិនអាចចាំទាល់តែផ្ទុះអាវុធហើយ ចាំយើងរត់នោះទេ»។
ប្រភពពីប្រជាពលរដ្ឋមួយចំនួន បានអះអាងថា ក្រោយសំឡេងផ្ទុះអាវុធទាំងពាក់កណ្ដាលអធ្រាត្រនោះ អាជ្ញាធរមូលដ្ឋាន បានប្រកាសឱ្យប្រជាពលរដ្ឋជម្លៀសពីលំនៅឋានទៅរកទីកន្លែងសុវត្ថិភាពទាំងយប់ នៅវេលាប្រហែលម៉ោង៣ទៀបភ្លឺ។ ក្នុងហេតុការណ៍នោះ ប្រជាពលរដ្ឋដែលបានត្រៀមរៀបជើងព្រួលពីល្ងាចមកហើយនោះ បានបរគោយន្តកន្ត្រៃរត់ទាំងយប់ ខណៈពលរដ្ឋមួយចំនួន ដែលមិនបានត្រៀមបានជម្លៀសគ្រួសារតាមម៉ូតូ ដោយយកទៅតែសម្លៀកបំពាក់ និងរបស់ប្រើប្រាស់ប្រចាំថ្ងៃមួយចំនួនប៉ុណ្ណោះ។
ជុំវិញសំឡេងផ្ទុះអាវុធ កាលពីថ្ងៃទី២៤ និងយប់ថ្ងៃទី២៥នេះ គេហទំព័រផ្លូវការរបស់កងទ័ពជើងគោកថៃ និងសារព័ត៌មានរបស់ថៃមួយចំនួន ចុះផ្សាយដោយចោទប្រកាន់មកលើកម្ពុជា ថាជាអ្នកបង្កហេតុពេញមួយយប់ នៅតំបន់យោធភូមិភាគ២ ដោយសំឡេងកាំភ្លើង និងសំឡេងផ្ទុះគ្រាប់បែក នៅក្បែរទីតាំងបន្លាលួស ហើយការបាញ់នេះ គឺដើម្បីពិនិត្យមើលរយៈចម្ងាយ។
ក៏ប៉ុន្តែ អ្នកនាំពាក្យក្រសួងការពារជាតិកម្ពុជា លោកស្រី ម៉ាលី សុជាតា តាមរយៈសេចក្តីប្រកាសព័ត៌មាន ចេញផ្សាយនៅរសៀលថ្ងៃទី២៦ ខែកញ្ញានេះ បានច្រានចោលការចោទប្រកាន់របស់ភាគីថៃ ដោយលោកស្រីបានអះអាងថា ការផ្ទុះការបាញ់កាំភ្លើងនោះ គឺកើតនៅខាងថៃ ដោយមានផ្ទុះការបាញ់កាំភ្លើង៤គ្រាប់។ លោកស្រីបន្តថា ហេតុការណ៍នេះកើតឡើងនៅម៉ោង២ និង៥៧នាទីយប់ ចំនួន១គ្រាប់, នៅម៉ោង៥ព្រឹក មួយគ្រាប់, នៅម៉ោង៦ព្រឹក មួយគ្រាប់ និងនៅម៉ោង៧ព្រឹក មានផ្ទុះមួយគ្រាប់ទៀត។
លោកស្រី ម៉ាលី សុជាតា អះអាងទៀតថា កងកម្លាំងរបស់កម្ពុជាមិនបានបង្កហេតុ ឬធ្វើសកម្មភាពណាមួយ ដែលរំលោភបំពានលើកិច្ចព្រមព្រៀងបទឈប់បាញ់ ដូចការលើកឡើងរបស់ភាគីថៃឡើយ ហើយកម្ពុជាបានប្តេជ្ញាចិត្តគោរពយ៉ាងពេញលេញ ចំពោះការគោរព និងអនុវត្តនូវកិច្ចព្រមព្រៀងនៃបទឈប់បាញ់រវាងយោធាកម្ពុជា និងយោធាថៃ។
ក្នុងករណីពលរដ្ឋខ្មែរ កំពុងភៀសខ្លួននេះដែរ ត្រូវបានសារព័ត៌មានថៃមួយចំនួន បានចុះផ្សាយ ដោយមួលបង្កាច់ថា កម្ពុជាកំពុងជម្លៀសប្រជាពលរដ្ឋ ដើម្បីត្រៀមវាយប្រហារមកលើកងទ័ពថៃ ខណៈអាវុធធន់ធ្ងន់គ្រប់ប្រភេទ ត្រូវបានបញ្ជូនមកកាន់តំបន់ព្រំដែនស្ងាត់ៗ។
ពាក់ព័ន្ធរឿងនេះ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា CHRAC លោក រស់ សុដ្ឋា ចាត់ទុកសកម្មភាពរបស់ថៃថាកំពុងបំពានធ្ងន់ធ្ងរដល់សិទ្ធិពលរដ្ឋខ្មែរ តាមរយៈការបង្កភាពភ័យខ្លាចតាមបណ្ដោយព្រំដែន ធ្វើឱ្យពលរដ្ឋបង្ខំចិត្តភៀសខ្លួនជាច្រើនលើកច្រើនសារ ដែលប៉ះពាល់ដល់ជីវភាព និងផ្លូវចិត្តរបស់ពួកគាត់។ លោកបន្តថា ក្នុងស្ថានភាពនេះ រដ្ឋាភិបាល ជាពិសេសអាជ្ញាធរដែនដី ត្រូវធានាសុវត្ថិភាព និងបង្កភាពងាយស្រួលដល់ជីវភាពក្នុងជំរុំ ពិសេសត្រូវធានាថាគ្មានការបៀតបៀនណាមួយកើតឡើងទៅលើស្ត្រី និងក្មេងស្រីនៅទីនោះ។
លោក រស់ សុដ្ឋា ថ្លែងថា៖ «អ៊ីចឹងទាំងអាជ្ញាធរ ទាំងប្រជាពលរដ្ឋខ្មែរទាំងអស់ ត្រូវរួមចំណែកគ្នាក្នុងការចូលរួមកាត់បន្ថយនូវទុក្ខលំបាករបស់ពួកគាត់នៅក្នុងជំរុំ ហើយជួយសម្រួលឱ្យការរស់នៅរបស់ពួកគាត់បានសមស្រប ជាការលួងចិត្តដល់ការបាត់បង់របស់ពួកគាត់»។
ទាក់ទងនឹងភាពតានតឹងនៅតំបន់ព្រំដែនកម្ពុជា-ថៃនេះដែរ ស្ថានភាពនៅទីតាំងដែលយោធាថៃរាយបន្លាលួសព័ទ្ធយកដី និងផ្ទះរបស់ពលរដ្ឋខ្មែរ នៅភូមិព្រៃចាន់ និងភូមិជោគជ័យ ស្ថិតក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នោះមានសភាពការណ៍ស្ងប់ស្ងាត់ដដែល។ ក៏ប៉ុន្តែ ទន្ទឹមនឹងសភាពការណ៍នៅនឹងថ្កល់នៅខាងកម្ពុជានេះ ក្រុមយោធាថៃ បានចល័តក្រុមទាហានកាម៉ង់ដូពិសេស ក្រុមបាញ់ឆ្មក់ពីចម្ងាយ(Sniper) និងអាវុធធុនធ្ងន់ ជាច្រើនទៀត ទៅកាន់តំបន់ព្រំដែនកម្ពុជា។
យ៉ាងណាមិញ មន្ត្រីជាន់ខ្ពស់របស់ទាហានថៃ បានព្រមានថា នឹងបណ្ដេញពលរដ្ឋខ្មែរចេញពីផ្ទះសម្បែងនៅភូមិព្រៃចាន់ និងភូមិជោគជ័យ នៅថ្ងៃទី២៦ ខែកញ្ញានេះបន្ថែមទៀត ដែលពួកគេអះអាងថា ជាទឹកដីរបស់ខ្លួនស្ថិតនៅក្នុងខេត្តស្រះកែវ ក្នុងនោះមេទ័ពជើងទឹកថៃ លោក ជីរ៉ាក់ផុន វង្សវីដ បានគំរាមបំផ្លាញសំណង់ខ្មែរនៅ ១៧ទីតាំង ចាប់ពីខេត្តពោធិ៍សាត់ដល់ខេត្តកោះកុង។
កាន់តែធ្ងន់ធ្ងរជាងនេះ សារព័ត៌មានថៃ បានចុះផ្សាយថា ក្រុមប៉ូលិសបង្ក្រាបបាតុកម្មប្រហែល ១៤០០នាក់ ត្រូវបានដាក់ពង្រាយទៅកាន់ខេត្តស្រះកែវ ដើម្បីត្រៀមបង្ក្រាបលើពលរដ្ឋខ្មែរណា ដែលនាំគ្នាតវ៉ានឹងក្រុមកងកម្លាំងថៃ នៅភូមិជោគជ័យ និងភូមិព្រៃចាន់ ក្នុងប្រតិបត្តិការរាយបន្លាលួស ហើយកងទ័ពថៃក៏បានព្រមានដាក់ទោសក្នុងពន្ធនាគារអស់មួយជីវិត ឬទោសប្រហារជីវិត ចំពោះពលរដ្ឋខ្មែរដែលក្រុមយោធាថៃចោទថា បានបំពានទឹកដីរបស់ថៃទៀតផង។
យ៉ាងណាក៏ដោយចុះ ប្រជាពលរដ្ឋ និងអ្នកតាមដាននយោបាយ ស្នើឱ្យរដ្ឋាភិបាលកម្ពុជា ឈប់អែអង់ និងប្រញាប់ប្ដឹងថៃទៅកាន់តុលាការយុត្តិធម៌អន្តរជាតិ ICJ បន្ថែមពីលើការប្ដឹងទៅអង្គការសហប្រជាជាតិ និងប្រទេសទីបី ដើម្បីដាក់សម្ពាធមកលើយោធាថៃ បញ្ឈប់ការឈ្លានពានមកលើកម្ពុជាបន្តទៀត៕
