ក្រុមប្រឹក្សាសន្តិសុខរបស់អង្គការសហប្រជាជាតិ នៅថ្ងៃសុក្រនេះ នឹងបោះឆ្នោតលើសេចក្តីសម្រេចមួយ ដែលស្នើឡើងដោយរុស្ស៊ី និងប្រទេសចិន ដើម្បីពន្យាពេលការដាក់ទណ្ឌកម្មលើប្រទេសអ៊ីរ៉ង់ រយៈពេល ៦ខែ ដែលអ្នកការទូត និយាយថា វាហាក់បីមិនទំនងក្នុងការអនុម័តឡើយ។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី២៦ ខែកញ្ញា ឆ្នាំ២០២៥នេះថា រាល់ទណ្ឌកម្មនៃអង្គការសហប្រជាជាតិ ទៅលើប្រទេសអ៊ីរ៉ង់ ដែលគេរំពឹងថា នឹងត្រូវដាក់ឡើងវិញនៅថ្ងៃសុក្រ វេលាម៉ោង ៨យប់ ។
ជុំវិញបញ្ហានេះ អង់គ្លេស បារាំង និងអាល្លឺម៉ង់ ធ្លាប់ចាប់ផ្តើមដំណើរការរយៈពេល ៣០ថ្ងៃ ដោយចោទប្រកាន់ទីក្រុងតេរ៉ង់(Tehran)ថា បានរំលោភលើកិច្ចព្រមព្រៀងនៅឆ្នាំ២០១៥ ជាមួយប្រទេសមហាអំណាច ដែលមានបំណងទប់ស្កាត់មិនឱ្យអ៊ីរ៉ង់អភិវឌ្ឍន៍អាវុធនុយក្លេអ៊ែរ។
សេចក្តីសម្រេចនៅក្នុងក្រុមប្រឹក្សាសន្តិសុខអង្គការសហប្រជាជាតិ ដែលមានសមាជិក ១៥ប្រទេស ត្រូវការសំឡេងយ៉ាងហោចណាស់ ៩សំឡេងគាំទ្រ ហើយមិនអាចមានសិទ្ធិអនុប្បវាទឬវេតូ(veto)ពីអង់គ្លេស បារាំង ឬសហរដ្ឋអាមេរិកនោះទេ។
ដោយឡែក អ្នកការទូត បាននិយាយថា ទំនងជាមានការអនុបវាទច្រើន ពីការបោះឆ្នោត ហើយសេចក្តីសម្រេចនេះក៏មិនទំនងនឹងត្រូវអនុម័តផងដែរ។
អ៊ីរ៉ង់ និងមហាអំណាចអឺរ៉ុប នៅសប្តាហ៍នេះ កំពុងធ្វើកិច្ចព្រមព្រៀងចុងក្រោយ ដើម្បីពន្យាពេលនៃការដាក់ទណ្ឌកម្មឡើងវិញ និងទុកចន្លោះពេលសម្រាប់ការចរចារយៈពេលវែង លើកម្មវិធីនុយក្លេអ៊ែរទីក្រុងតេរ៉ង់(Tehran)។
អង់គ្លេស បារាំង និងអាល្លឺម៉ង់ បានផ្តល់ការពន្យារយៈពេល ៦ខែ ដើម្បីផ្តល់ចន្លោះសម្រាប់ការចរចាលើកិច្ចព្រមព្រៀងរយៈពេលវែងស្តីអំពីកម្មវិធីនុយក្លេអ៊ែរក្រុងតេរ៉ង់ ប្រសិនបើអ៊ីរ៉ង់យល់ព្រមអនុញ្ញាតឱ្យអ្នកត្រួតពិនិត្យអង្គការសហប្រជាជាតិចូលដំណើរការឡើងវិញ ដោះស្រាយអំពីភាពព្រួយបារម្ភអំពីការស្តុកសារធាតុអ៊ុយរ៉ាញ៉ូម និងចូលរួមពិភាក្សាជាមួយសហរដ្ឋអាមេរិក។
យ៉ាងណា ប្រធានាធិបតីអ៊ីរ៉ង់ លោក ម៉ាស្យូត ពែហ្សេស្គៀន(Masoud Pezeshkian) បាននិយាយកាលពីថ្ងៃព្រហស្បតិ៍ថា ទីក្រុងតេរ៉ង់ បានត្រៀមខ្លួនរួចរាល់ក្នុងការប្រឈមមុខនឹងសេណារីយូណាមួយ និងកែសម្រួលគោលនយោបាយរបស់ខ្លួន ប្រសិនបើទណ្ឌកម្មរបស់អង្គការសហប្រជាជាតិត្រូវបានស្តារឡើងវិញ៕
