តុលាការតៃវ៉ាន់ បានកាត់ទោសអតីតជំនួយការប្រធានាធិបតី ពីបទ ធ្វើចារកម្មឱ្យសាធារណៈរដ្ឋប្រជាមានិតចិននិងមនុស្ស៣នាក់ទៀត ដែលត្រូវបានជួលដោយគណបក្សប្រជាធិបតេយ្យរីកចម្រើន(Democratic Progressive Party) ដែលកំពុងតែកាន់អំណាចផងដែរ។
សារព័ត៌មានប៊ីប៊ីស៊ី(BCC) បានរាយការណ៍នៅថ្ងៃទី២៦ ខែកញ្ញា ឆ្នាំ២០២៥នេះថា តុលាការបានកាត់ទោសបុរសទាំងនោះឱ្យជាប់ទោសចន្លោះពី ៤ឆ្នាំទៅ ១០ឆ្នាំ ពីបទ ធ្វើឱ្យបែកធ្លាយអាថ៌កំបាំងរដ្ឋ ហើយក្នុងសេចក្តីសម្រេចនៃការកាត់ទោសនោះ បានបញ្ជាក់ថា សកម្មភាពស៊ើបការណ៍នេះ បានអនុវត្តក្នុងរយៈពេលវែង ថែមទាំងពាក់ព័ន្ធនឹងការចែករំលែក‘‘ព័ត៌មានសម្ងាត់សំខាន់ផ្នែកការទូត’’ផងដែរ។
ទីក្រុងប៉េកាំង បានទាមទារកោះតៃវ៉ាន់ដែលមាននិន្នាការប្រជាធិបតេយ្យជាកម្មសិទ្ធរបស់ខ្លួន ហើយភាគីទាំងពីរនេះបានធ្វើការស៊ើបការណ៍សម្ងាត់ពីគ្នាទៅវិញទៅមក អស់រយៈពេលជាច្រើនទសវត្សរ៍មកហើយ។ ដោយឡែកទីក្រុងតៃប៉ិ បានអះអាងថា សកម្មភាពនៃការស៊ើបការណ៍សម្ងាត់របស់ប្រទេសចិន បានកើនឡើងយ៉ាងខ្លាំងក្នុងរយៈពេលបីឆ្នាំចុងក្រោយនេះ។
យ៉ាងណា ក្នុងចំណោមបុរសទាំង ៤នាក់ ដែលត្រូវបានកាត់ទោស កាលពីថ្ងៃព្រហស្បតិ៍នោះ មានលោក ហ័ង ជូចុង(Huang Chu-jung) ដែលជាអតីតជំនួយការក្រុមប្រឹក្សានៃទីក្រុងតៃប៉ិ បានទទួលទោសឱ្យជាប់ពន្ធនាគារអស់រយៈពេល១០ឆ្នាំ ដែលដំបូងឡើយព្រះរាជអាជ្ញាបានរកការផ្តន្ទាទោសរហូតដល់១៨ឆ្នាំ។
បើយោងតាមតុលាការ លោក ហ័ង បានបញ្ជាឱ្យបុគ្គលិកការិយាល័យបរទេស យកព័ត៌មានពី លោក យូសែប អ៊ូ(Joseph Wu) ដែលបច្ចុប្បន្នមានតួនាទីជាប្រធានសន្តិសុខជាតិ បន្ទាប់មកលោកបានសរសេររបាយការណ៍ព័ត៌មាននោះ ហើយផ្ញើទៅឱ្យអង្គភាពស៊ើបការណ៍របស់បក្សកុម្មុយនិសចិន តាមរយៈកម្មវិធីអ៊ិនគ្រីប។
លោក ហ័ង ក៏បានចោទពីបទធ្វើការជាមួយអតីតបុគ្គលិកគណបក្សប្រជាធិបតេយ្យរីកចម្រើន(DPP) គឺលោក ឈីវ ស៊ីយាន (Chiu Shih-yuan) ដើម្បីធ្វើការប្រមូលព័ត៌មានបន្ថែម ហើយតុលាការបានឮថា លោក ឈីវ ទទួលបានព័ត៌មានពី លោក អ៊ូ ស៊ាំងអ៊ី(Wu Shangyu) ដែលជាជំនួយការរបស់ លោក ឡាយ ឈីងតឺ(Lai Ching-te) ដែលជាប្រធានាធិបតីនាពេលបច្ចុប្បន្ន៕
