រដ្ឋាភិបាលកម្ពុជា តាមរយៈរដ្ឋបាលខេត្តបន្ទាយមានជ័យ បានចាត់ទុកសារគំរាមរបស់ភាគីថៃ ឱ្យពលរដ្ឋខ្មែររស់នៅភូមិព្រៃចាន់ និងភូមិជោគជ័យ ឃុំអូរបីជាន់ ចាកចេញពីលំនៅឋានដែលធ្លាប់រស់នៅច្រើនទសវត្សរ៍ទៅហើយជាកំហិតត្រឹម១៥ថ្ងៃទៀតនោះ ជាការរំលោភសិទ្ធិពលរដ្ឋខ្មែរយ៉ាងធ្ងន់ធ្ងរ ។
នេះបើតាមលិខិតមួយច្បាប់ ចុះថ្ងៃទី២៨ ខែកញ្ញា ឆ្នាំ២០២៥ ដែលអភិបាលខេត្តបន្ទាយមានជ័យ លោក អ៊ុំ រាត្រី ផ្ញើទៅកាន់អភិបាលខេត្តស្រះកែវរបស់ថៃ ។
បើតាមលិខិតតវ៉ានោះ លោក អ៊ុំ រាត្រី បានបញ្ជាក់ទៅកាន់អភិបាលខេត្តស្រះកែវ កាលពីថ្ងៃទី២៨ ខែកញ្ញា ឆ្នាំ២០២៥ ដោយចាត់ទុកការលើកបដា និងសារគំរាមរបស់ថៃ ជាការគំរាមកំហែងយ៉ាងធ្ងន់ធ្ងរ មកលើសិទ្ធិពលរដ្ឋស្លូតត្រង់កម្ពុជា ដែលបាននិងកំពុងរស់នៅអាស្រ័យផលក្នុងភូមិទាំងពីរនេះ តាំងពីយូរយារណាស់មកហើយ គឺមុនពេលអនុស្សរណៈនៃការយោគយល់គ្នាស្តីពីការវាស់វែង និងខណ្ឌសីមាព្រំដែនគោកកម្ពុជា-ថៃ (MOU 2000) ចូលជាធរមាន។
លោកបញ្ជាក់ថា រដ្ឋបាលខេត្តស្រះកែវថៃ មិនមានសមត្ថកិច្ចកំណត់ព្រំដែន និងអនុវត្តច្បាប់ក្នុងស្រុកថៃរបស់ខ្លួនមកលើសហគមន៍កម្ពុជាដែលបាននិងកំពុងរស់នៅ និងអាស្រ័យផលក្នុងតំបន់មិនទាន់មានការកំណត់ខណ្ឌសីមាព្រំដែនរួចរាល់នោះទេ ។
ការផ្ញើលិខិតតវ៉ារបស់ លោក អ៊ុំ រាត្រី ជាការឆ្លើយតបទៅនឹងអាជ្ញាធរថៃ នៅថ្ងៃទី២៨ ខែកញ្ញា បានចេញប្រកាសលើបដា ប្រាប់ពលរដ្ឋខ្មែររស់នៅភូមិជោគជ័យ និងភូមិព្រៃចាន់ ក្នុងស្រុកអូរជ្រៅ ខេត្តបន្ទាយមានជ័យ ឱ្យចាកចេញពីទីលំនៅឋានក្នុងរយៈពេល១៥ថ្ងៃ ក្រោមសារព្រមានថា អាជ្ញាធរថៃ នឹងចាប់ខ្លួនពលរដ្ឋខ្មែរដាក់ពន្ធនាគារ បើមិនព្រមចាកចេញ។
ជុំវិញបញ្ហានេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត និយាយថា ការតវ៉ារបស់ លោក អ៊ុំ រាត្រី ទៅអភិបាលខេត្តស្រះកែវ នៃរដ្ឋបាលស៊ីវិលរបស់ថៃថា ជារឿងត្រឹមត្រូវ នៅក្នុងបំណងចង់ឲ្យថៃឈប់បំពានមកលើពលរដ្ឋខ្មែរ និងបូរណភាពទឹកដីខ្មែរ ។
ប៉ុន្តែ លោកថា រដ្ឋអំណាចស៊ីវិល រដ្ឋបាលតំបន់របស់ថៃ គ្មានឥទ្ធិពលទេ ហើយក៏គ្មានអំណាចដោះស្រាយស្ថានការណ៍នៅតំបន់ព្រំដែនបានឡើយ។
លោកថា អំណាចបង្កជម្លោះឈ្លានពាននេះ គឺជារឿងរបស់ពួកយោធាថៃ ដែលមានអំណាចបំផុត នៅក្រោមការជ្រោមជ្រែងពីស្ថាប័នព្រះមហាក្សត្រថៃ។
សម្រាប់ លោក ម៉ែន ណាត ជម្រើសរបស់រដ្ឋាភិបាលកម្ពុជា គឺត្រូវតែធ្វើការសម្រេចចិត្តចេញទប់ទល់ការពារខ្លួន និងការពារដែនអធិបតេយ្យឲ្យបាន ស្របតាមស្មារតីធម្មនុញ្ញអង្គការសហប្រជាជាតិ (UN) មាត្រា៥១ និងស្របតាមស្មារតីកិច្ចព្រមព្រៀងទីក្រុងប៉ារីស ឆ្នាំ១៩៩១ ស្តីអំពីបូរាណភាពទឹកដី និងអធិបតេយ្យរបស់កម្ពុជា ដែលកាលនោះភាគីថៃ ក៏ជាម្ចាស់ហត្ថលេខីផងដែរ។
ជាមួយគ្នានេះ កម្ពុជាក៏ត្រូវប្រញាប់ដាក់ពាក្យបណ្តឹងប្តឹងថៃ ទៅតុលាការយុត្តិធម៌អន្តរជាតិ និងតុលាការឧក្រិដ្ឋកម្មអន្តរជាតិ ទីក្រុងឡាអេ ប្រទេសហូឡង់៕
