អ្នកធ្វើយុទ្ធនាការគាំទ្រប្រជាធិបតេយ្យហុងកុងម្នាក់ ដែលបានភៀសខ្លួនចេញពីហុងកុង(Hong Kong) ត្រូវបានបដិសេធមិនឱ្យចូលទៅប្រទេសសិង្ហបុរី ដើម្បីចូលរួមសន្និសីទមួយ ទោះបីជាត្រូវបានផ្តល់ទិដ្ឋាការ ដោយបាននិយាយថាវត្តមាននេះមិនអាចផ្តល់ជាប្រយោជន៍ជាតិបាននោះទេ។
សារព័ត៌មានប៊ីប៊ីស៊ី(BBC) បានរាយការណ៍នៅថ្ងៃទី២៩ ខែកញ្ញា ឆ្នាំ២០២៥នេះថា លោក ណាថាន់ ឡ(Nathan Law) ដែលរស់នៅនិរទេសខ្លួនឯអង់គ្លេស បាននិយាយថា លោកបានមកដល់ប្រទេសសិង្ហបុរី កាលពីថ្ងៃសៅរ៍ ដើម្បីចូលរួមសន្និសីទ‘‘ឯកជនដែលអាចចូលរួមសម្រាប់តែអ្នកដែលត្រូវបានអញ្ជើញ’’ ប៉ុន្តែលោកត្រូវបានឃុំឃាំងនៅព្រំដែនរយៈពេល ៤ម៉ោង។
ក្រសួងមហាផ្ទៃប្រទេសសិង្ហបុរី បានកត់សម្គាល់ថា លោក ឡ(Law) ត្រូវបានអាជ្ញាធរហុងកុងស្វែងរកដោយចោទប្រកាន់លោកពីបទបង្កគ្រោះថ្នាក់ដល់សន្តិសុខជាតិ។
ប្រទេសសិង្ហបុរី ត្រូវបានគេដឹងថាមានការប្រុងប្រយ័ត្ន អំពីនយោបាយបរទេស ដែលនៅក្នុងសេចក្តីថ្លែងការណ៍មួយបានចេញផ្សាយកាលពីឆ្នាំមុន ដោយរដ្ឋាភិបាល បាននិយាយថា ‘‘ប្រទេសសិង្ហបុរីប្រកាន់ជំហច្បាស់លាស់និងម៉ឺងម៉ាត់ប្រឆាំងទៅនឹងការនាំចូល ឬធ្វើសមាហរណកម្មនយោបាយរបស់ប្រទេសផ្សេង ទៅក្នុងប្រទេសសិង្ហបុរី។
នៅក្នុងសេចក្តីថ្លែងការណ៍មួយ លោក ឡ បាននិយាយថា លោកជឿជាក់ថាការបដិសេធមិនឱ្យចូលនេះ គឺសម្រាប់ហេតុផល‘‘នយោបាយ’’។
លោកបានបន្ថែមថា៖ «ខ្ញុំមិនប្រាកដទេថាតើកងកម្លាំងខាងក្រៅ ដូចជា សាធារណៈរដ្ឋប្រជាមានិតចិន(People’s Republic of China)មានជាប់ពាក់ព័ន្ធដោយផ្ទាល់ ឬដោយប្រយោល ឬយ៉ាងណានោះទេ»។
លោក ឡ បាននិយាយថា លោកបានដាក់ពាក្យស្នើសុំទិដ្ឋការ ដែលនឹងអនុញ្ញាតឱ្យលោក‘‘ចូលម្តងសម្រាប់បីថ្ងៃ’’ ហើយលោកថាវាបានអនុម័តក្នុងពេល៣សប្តាហ៍ មុនពេលដែលលោកចាកចេញ។ លោកថា លោកមានឯកសារធ្វើដំណើរជនភៀសខ្លួនចក្រភពអង់គ្លេស។
លោក ឡ ដែលជាអតីតសមាជិកសភាហុងកុង គឺជាឥស្សរជនម្នាក់ក្នុងចំណោមឥស្សរជនដ៏លេចធ្លោ ក្នុងចលនាគាំទ្រប្រជាធិបតេយ្យរបស់ទីក្រុង បានភៀសខ្លួនពីទីក្រុងហុងកុងនៅឆ្នាំ២០២០ បន្ទាប់ពីប្រទេសចិនបានដាក់ច្បាប់សន្តិសុខជាតិដ៏ទូលំទូលាយមួយ ដែលកំណត់គោលដៅវិទ្ធង្សនា និងអំពើភេរវកម្មដោយដាក់ទោស ដាក់ពន្ធនាគារអស់មួយជីវិត៕
