មេដឹកនាំគណបក្សប្រជាជនកម្ពុជា ដែលកំពុងគ្រប់គ្រងអំណាច លោក ហ៊ុន សែន បានអះអាងនៅថ្ងៃចន្ទនេះថា ប្រាក់ខែអតីតយុទ្ធជន ប្រមាណជាជាង២០០ដុល្លារក្នុងមួយខែដូចបច្ចុប្បន្ន អាចដោះស្រាយជីវភាពបានគ្រប់គ្រាន់ សម្រាប់អ្នករស់នៅជនបទ បើពួកគេមិនមានបន្ទុកគ្រួសារ។
ការអះអាងនេះ ចំពេលមានការរិះគន់ថា កងទ័ពនៅព្រំដែនជួរមុខភាគច្រើន មានជីវភាពក្រីក្រ ប្រាក់ខែពួកគេ មិនអាចទ្រទ្រង់ជីវភាពក្រុមគ្រួសារបាន ពិសេសពេលគ្រួសារមានបញ្ហាសុខភាព និងខ្លះរួមរឹតដោយវិបត្តិបំណុល និងខ្លះទៀតគ្មានផ្ទះសម្បែងស្នាក់នៅ។
ក្នុងពិធីបិទមហាសន្និបាតវិសាមញ្ញ តំណាងសមាគមអតីតយុទ្ធជន ដែលធ្វើឡើងក្នុងប្រទេសកម្ពុជា នាព្រឹកថ្ងៃទី២៩ ខែកញ្ញានេះ លោក ហ៊ុន សែន បានផ្តល់អនុសាសន៍១៥ចំណុច ទៅក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងពាក់ព័ន្ធមួយចំនួនទៀត ក្រោមហេតុផលថា ដើម្បីចូលរួមលើកកម្ពស់សុខុមាលភាព អតីតយុទ្ធជន។
លោកថា ក្រសួងសង្គមកិច្ច ត្រូវបន្តពង្រឹងការបើកប្រាក់ របបសន្តិសុខសង្គម ជូនអតីតយុទ្ធជន និងអតីតមន្ត្រីរាជការស៊ីវិល ឱ្យបានទាន់ពេលវេលា តាមការកំណត់របស់រាជរដ្ឋាភិបាល។
រីឯក្រសួងការពារជាតិ និងក្រសួងមហាផ្ទៃ ត្រូវសហការជាមួយក្រសួងសង្គមកិច្ច ពិនិត្យផ្ទៀងផ្ទាត់ បញ្ជីឈ្មោះអតីតយុទ្ធជន និងគ្រួសារជនពលី មរណៈ ឱ្យបានពិតប្រាកដ មុននឹងផ្ទេរមកក្រសួងសង្គមកិច្ច អតីត គ្រប់គ្រងបន្ត។
លើសពីនេះ លោកថាក្រសួងសង្គមកិច្ច ត្រូវបន្តគម្រោងសង់ផ្ទះជូនអតីតយុទ្ធជន និងនិវត្តជន ដែលមានស្នាដៃ និងមានដី នៅតាមសហគមន៍។
ពាក់ព័ន្ធប្រាក់ខែវិញ លោកថា អតីតយុទ្ធជន ដែលរស់នៅតាមជនបទ អាចដោះស្រាយជីវភាពបាន បើទោះជាពេលនេះ ពួកគេទទួលបានប្រាក់ត្រឹមជាង៨០ម៉ឺនរៀល ឬស្មើជាង២០០ដុល្លារ ក្នុងមួយខែក្តី។
លោកថា៖ «ប្រាក់ខែទាបបំផុតរបស់យើង ៨៤ម៉ឺន ៨៥ម៉ឺននេះ វាស្មើនឹងជាង២០០ដុល្លារដែរក្នុងមួយខែ ។ អីចឹងរស់នៅទីជនបទជាមួយនឹងការធ្វើស្រែចម្ការបង្កបង្កើនផលបន្ថែម គឺគ្រប់គ្រាន់ៗ។ ប៉ុន្តែអ្វីដែលសំខាន់ដូចខ្ញុំចង្អុលបង្ហាញ ដោះស្រាយមុខរបរ បណ្តុះបណ្តាលកូនចៅរបស់ពួកគាត់កុំឱ្យជាបន្ទុកនៃការចំណាយទៅឱ្យកូន គាត់ចិញ្ចឹមខ្លួនឯងរស់ពេកៗ»។
គួររំឭកថា ក្រោយផ្ទុះអាវុធជាថៃរបស់ពេល៥ថ្ងៃ ចាប់ពីថ្ងៃទី២៤ ខែកក្កដា ឆ្នាំថ្ងៃទី២៨ខែកក្កដា រហូតមានបទឈប់បាញ់នេះ កងទ័ពជួរមុខជាច្រើនបានបង្ហោះវីដេអូ តាមបណ្តាញសង្គម សុំជំនួយពីសប្បុរសជន ដោយខ្លះអះអាងថាគ្មានផ្ទះសម្តែង និងខ្លះក្រីក្រតោកយ៉ាក គ្មានលុយព្យាបាលជំងឺ និងខ្លះសុំទិញអាវក្រោះដោយពាក់ការពារគ្រាប់នៅលើសមរភូមិប្រយុទ្ធជាដើម។
ដែលបញ្ហានេះ គណបក្សប្រឆាំង និងអ្នកតាមដាន បានរិះគន់ថា រដ្ឋាភិបាលគ្រួសារហ៊ុន មិនបានយកចិត្តទុកដាក់លើកកម្ពស់ជីវភាពយុទ្ធជននៅសមរភូមិជួរមុខទេ ខណៈក្រុមគ្រួសារអ្នកមានអំណាចមានទ្រព្យសម្បត្តិហូរហៀរ និងខ្លះទៀតរៀបការកូនម្តងៗ ចំណាយប្រាក់អស់រាប់រយលានដុល្លារ។
ប៉ុន្តែមិនព្រមពង្រីក ទំនើបកម្មវិស័យការពារជាតិ ដែលធ្វើឱ្យថៃចូលរាយបន្លាលួសយកដីខ្មែរតាមព្រំដែនតាមចិត្ត ក្នុងនោះមានភូមិជោគជ័យ ភូមិព្រៃចាន់ ក្នុងឃុំអូរបីជាន់ ខេត្តបន្ទាយមានជ័យជាដើម៕
