កម្មករជិត ៨០នាក់ ធ្វើការនៅរោងចក្រកាត់ដេរ បូវឃើរ ហ្គាមេន ហ្វេកធើរី ក្នុងឃុំបែកចាន ស្រុកអង្គស្នួល ខេត្តកណ្តាល ក្នុងនោះមានទាំងកម្មការិនីមានផ្ទៃពោះផងនោះ បាននាំគ្នាប្រមូលផ្តុំតវ៉ានៅមុខរោងចក្រ ក្រោយថៅកែរោងចក្របញ្ឈប់ពួកគេពីការងារ និងមិនបានបើកប្រាក់ឈ្នួលខែកញ្ញា ដោយខុសនឹងនីតិវិធីច្បាប់។
កម្មការិនី អុន ស៊ីណា ធ្វើការនៅរោងចក្របូវឃើរ ហ្គាមេន បានឱ្យដឹងនៅថ្ងៃទី២៩ ខែកញ្ញានេះថា ការដែលពួកគាត់នាំគ្នាតវ៉ានេះ ដោយសារតែខាងរោងចក្រ កាលពីថ្ងៃទី២៦ ខែកញ្ញាបានបញ្ឈប់កម្មករផ្នែកប៉ាក់ចំនួន ៧៥នាក់ ពីការងារទាំងអយុត្តិធម៌ ដោយប្រាប់ថាមិនមានការងារឱ្យកម្មករផ្នែកនេះធ្វើទៀត និងបានដូរឈ្មោះពួកគេទៅផ្នែកដេរដោយមិនមានការយល់ព្រមពីកម្មករ ខណៈប្រាក់ឈ្នួលក្នុងខែកញ្ញានេះ ក៏ខាងរោងចក្រមិនទាន់បើកឱ្យផងដែរ។
កម្មការិនីរូបនេះ និយាយថា៖ «គាត់ចោទថាពួកខ្ញុំហ្នឹងបោះបង់ការងារ ទាំងពួកខ្ញុំស្កេនមេដៃចូលធ្វើការរាល់ថ្ងៃ ដល់ពេលមកពីភ្ជុំវិញ គាត់ថាពួកខ្ញុំហ្នឹងបោះបង់ការងារ ហើយគាត់ថតរូបថតកាតអីបិទតាមជញ្ជាំងគ្រប់កន្លែងតាំងពីបន្ទប់ទឹកអីទៅ ហើយឱ្យអត់ឱ្យពួកខ្ញុំចូលធ្វើការទេ ទាំងដែលពួកគាត់ព្យួរក៏អត់ អាបញ្ចប់ក៏មិនបញ្ចប់ អត់ឱ្យចូលតែម្តង»។
កម្មការិនីរោងចក្របូវឃើរ ហ្គាមេនមួយរូបទៀត ដែលមានផ្ទៃពោះ៥ខែ អ្នកស្រី សា រ៉ុកស្រីម៉ើ បានឱ្យដឹងដែរថា កាលពីថ្ងៃទី០៤ ខែកញ្ញា ខាងរោងចក្រប្រាប់ពួកគាត់ថាមិនមានការងារផ្នែកប៉ាក់ឱ្យពួកគាត់ធ្វើទេ ហើយឱ្យពួកគាត់ទៅធ្វើការនៅផ្នែកដេរសិន ដូច្នេះពួកគាត់ក៏បានដូរទៅខាងដេររហូតដល់ថ្ងៃឈប់សម្រាកថ្ងៃបុណ្យភ្ជុំបិណ្ឌ លុះមកវិញស្រាប់តែឃើញខាងរោងចក្របិទឈ្មោះពួកគាត់នៅមុខរោងចក្រ បញ្ឈប់ពីការងារតែម្តង។
ស្រ្តីរូបនេះ ចាត់ទុកការបញ្ឈប់កម្មករកម្មការិនីទាំង ៧៥នាក់នេះ ថាជារឿងអយុត្តិធម៌ និងជាការរំលោភទៅលើសិទ្ធិការងារ និងច្បាប់ស្តីពីការងារ ដែលការណ៍នេះ ពួកគាត់បានទាមទារឱ្យក្រសួងពាក់ព័ន្ធ និងភាគីរោងចក្រ ដោះស្រាយសំណើរ៥ចំណុចនៅតាមច្បាប់ការងារ ក្នុងនោះ រួមមាន ប្រាក់ខែចុងក្រោយ ប្រាក់បំណាច់ឆ្នាំ ប្រាក់អតីតភាពការងារ ប្រាក់ជំងឺចិត្ត និងប្រាក់ជូនដំណឹង។
អ្នកស្រីថា៖ «ពួកខ្ញុំចង់បាន ៥ចំណុច ព្រោះអី៣ចំណុច ពួកខ្ញុំអត់ព្រមទេ ពួកខ្ញុំបន្តទៅមុខទៀត បើឱ្យខ្ញុំតែ៣ចំនុច ពួកខ្ញុំអត់ព្រមទេ។ ខ្ញុំសំណូមពរឱ្យបងខាងក្រសួងចុះមកជួយដោះស្រាយរកយុត្តិធម៌ឱ្យពួកខ្ញុំផង ពួកខ្ញុំអត់មានបានធ្វើខុសអីទេ ពួកគាត់អ្នកកាត់ឈ្មោះពួកខ្ញុំចេញមក»។
តំណាងរោងចក្រកាត់ដេរ បូវឃើរ ហ្គាមេន ហ្វេកធើរី (ខេមបូឌា) ខមភេនី លីមីធីត (Bowker Garment Factory (Cambodia) Co.,Ltd.) ដែលមិនប្រាប់ឈ្មោះ បានបដិសេធឆ្លើយតប ដោយថា បញ្ហាវិវាទការងារនេះ ខាងក្រសួងកំពុងសម្របសម្រួលដោះស្រាយ។
យ៉ាងណា ស្ត្រីរូបនេះបញ្ជាក់ថា៖ «ហើយគួរបញ្ជាក់ផងដែរ ដោយសារតែពួកគាត់អត់យល់ស្រប ទៅតាមការអនុវត្តលក្ខខណ្ឌផ្លូវច្បាប់របស់ខាងក្រុមហ៊ុនហ្នឹងហើយ បានជាគាត់ប្រើប្រាស់បណ្តាញសង្គមជាលក្ខខណ្ឌ ហើយគាត់ព្យាយាមប្រើប្រាស់រូបភាពស្រ្តីមានផ្ទៃពោះ ឬក៏ស្ត្រីដែលត្រឡប់មកពីសម្រាល ជារូបភាពដែលមើលមកបង្ហាញថា ក្រុមហ៊ុនអនុវត្តផ្ទុយពីស្មារតីច្បាប់អីផ្សេងៗចឹងណា ទាំងដែលក្រុមហ៊ុនគឺបានបញ្ជាក់ហើយ ហើយនៅក្នុងស្មារតីប្រកាសរបស់ខាងក្រុមហ៊ុនគឺបានប្រកាសហើយ បញ្ជាក់យ៉ាងច្បាស់ថាក្រុមហ៊ុនផ្តល់អាទិភាពចរចាពិសេស ក៏ដូចជាផ្តល់លក្ខខណ្ឌចំពោះបុគ្គលពិសេស ដែលមានដូចជា ស្ត្រីកំពុងមានផ្ទៃពោះ ឬក៏និយោជិតទើបត្រឡប់មកពីសម្រាល គ្រប់ជំនួបរបស់ក្រុមហ៊ុន ឬការចរចាលើកឡើងអីផ្សេងៗ គឺក្រុមហ៊ុនបានបញ្ជាក់ហើយ គឺក្រុមហ៊ុនផ្តល់លទ្ធភាពនៅក្នុងការចរចាចូលធ្វើការ ឱ្យតែពួកគាត់គោរពតាមសិទ្ធិចាត់ចែងរបស់ខាងក្រុមហ៊ុន»។
លិខិតជូនដំណឹងរបស់រោងចក្រ បូវឃើរ ហ្គាមេន ចុះថ្ងៃទី២៦ ខែកញ្ញា ឆ្នាំ២០២៥ បានប្រើពាក្យថា ជូនដំណឹងដល់និយោជិតចំនួន ៧៥នាក់ ដែលបោះបង់ចោលការងារ ហើយមិនទាន់បានបើកប្រាក់ឈ្នួលចុងក្រោយ អាចអញ្ជើញទៅទទួលបើកប្រាក់ឈ្នួលដែលសេសសល់(ប្រាក់ខែចុងក្រោយ) ចាប់ពីថ្ងៃជូនដំណឹងនេះតទៅ រៀងរាល់ម៉ោងធ្វើការ។ ចំពោះនិយោជិតជាស្ត្រីមានផ្ទៃពោះ និយោជិតក្នុងស្ថានភាពបំបៅដោះកូន ក្រុមហ៊ុនរក្សាសិទ្ធិចរចាចូលធ្វើការវិញក្នុងករណីពួកគាត់សហការធ្វើតាមការចាត់ចែងរបស់ក្រុមហ៊ុន។
ចំណែក សេចក្តីជូនដំណឹងមួយទៀតរបស់រោងចក្របូវឃើរ ចុះថ្ងៃទី១៦ ខែកញ្ញា បានគូសបញ្ជាក់ថា ស្ថិតក្នុងកាលៈទេសៈដែលក្រុមហ៊ុនកំពុងមិនមានការបញ្ជាទិញដូចមុន និងមានការតម្រូវការចាំបាច់ក្នុងការរៀបចំរចនាសម្ព័ន្ធការងារឡើងវិញ ដើម្បីឱ្យស្របទៅនឹងស្ថានភាពអាជីវកម្មរបស់ក្រុមហ៊ុន។ ក្រុមហ៊ុនមានភាពចាំបាច់កែសម្រួលការងាររបស់កម្មករនិយោជិតចំនួន ៩៧នាក់ ដែលកំពុងបម្រើការងារផ្នែកប៉ាក់ ប៉ុន្តែខាងកម្មករនិយោជិតចំនួន ៧៨នាក់ ដែលកំពុងបម្រើការផ្នែកនេះ មិនយល់ព្រម ដូច្នេះខាងក្រុមហ៊ុនសេចក្តីជូនដំណឹងជាផ្លូវការ ដើម្បីឱ្យពួកគេត្រូវតែផ្លាស់ប្តូរការងារទៅតាមការចាត់ចែងរបស់ក្រុមហ៊ុន ចាប់ពីថ្ងៃទី១៧ ខែកញ្ញាតទៅ។
សេចក្តីជូនដំណឹងដដែលនោះ បានគូសបញ្ជាក់ថា ក្នុងករណីកម្មករនិយោជិតផ្នែកប៉ាក់ មិនសហការណ៍ និងមិនអនុវត្តតាមសិទ្ធិចាត់ចែងរបស់ក្រុមហ៊ុន ខាងក្រុមហ៊ុនរក្សាសិទ្ធមិនទូទាត់ប្រាក់ឈ្នួលចំពោះថ្ងៃដែលកម្មករនិយោជិតមិនធ្វើការ ចាប់ពីថ្ងៃទី០៣ រហូតដល់ថ្ងៃទី១៩ ខែកញ្ញា ឆ្នាំ២០២៥ និងចាត់ទុកថា កម្មករនិយោជិតបោះបង់ការងារដោយខ្លួនឯង ហើយក្រុមហ៊ុននឹងទូទាត់ស្របតាមច្បាប់។
វីអូឌី មិនអាចសុំការបញ្ជាក់ជុំវិញបញ្ហានេះ ពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានទេ នៅរសៀលថ្ងៃចន្ទនេះ។
យ៉ាងណា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកណ្តាល លោក ធុល នាង បានប្រាប់យ៉ាងខ្លីថា ក្រុមការងារ បាននិងកំពុងដោះស្រាយបញ្ហាវិវាទការងារនៅរោងចក្រកាត់ដេរបូវឃើរនេះហើយ តែលទ្ធផលយ៉ាងណានោះ នៅមិនទាន់ដឹងនៅឡើយ។
ប្រធានសហជីពកម្ពុជាប្រចាំនៅរោងចក្របូវឃើរ លោក សុខ ចន្ធី បានអំពាវនាវដល់ក្រសួងការងារ និងស្ថាប័នពាក់ព័ន្ធ ជួយសម្របសម្រួលរកដំណោះស្រាយជូនកម្មករកម្មការិនី ឱ្យបានចូលធ្វើការវិញ ហើយបើខាងរោងចក្រនៅតែប្រកាន់ជំហរបញ្ឈប់ពួកគាត់ពីការងារ ដោយសារមិនមានការងារផ្នែកប៉ាក់ឱ្យពួកគាត់ធ្វើ ខាងរោងចក្រត្រូវទូទាត់ប្រាក់អត្ថប្រយោជន៍ផ្សេងៗទៅតាមច្បាប់ការងារ។
បើតាមក្រុមកម្មករ អំឡុងពេលពួកគាត់ប្រមូលផ្តុំគ្នានៅមុខរោងចក្រនោះ ខាងមន្ត្រីក្រសួងការងារ បានចុះទៅសម្របសម្រួលរកដំណោះស្រាយដែរ ប៉ុន្តែមិនទាន់សះជា ដោយសារតែខាងរោងចក្រផ្តល់ឱ្យតែ ៣ចំណុច ដើម្បីបញ្ចប់កិច្ចសន្យាការងារ គឺប្រាក់ខែចុងក្រោយ ប្រាក់បំណាច់ឆ្នាំ និងប្រាក់អតីតភាពការងារ ខណៈកម្មករទាមទារ ៥ចំណុច ទៅតាមច្បាប់ស្តីពីការងារ គឺទាមទារបន្ថែមនូវប្រាក់ជំងឺចិត្ត និងប្រាក់ជូនដំណឹង។
ក្រុមកម្មករបានគូសបញ្ជាក់ថា ពួកគេនឹងបន្តការតវ៉ា និងទាមទារកិច្ចអន្តរាគមន៍ពីថ្នាក់ដឹកនាំ រហូតដល់មានដំណោះស្រាយ៕
