ក្រោយសំណុំរឿងឃាតកម្ម លោក លិម គិមយ៉ា តំណាងរាស្ត្រគណបក្សសង្គ្រោះជាតិ ត្រូវបានផ្អឹបទុកជិត៩ខែមកនេះ តុលាការព្រហ្មទណ្ឌថៃ នឹងបើកសវនាការជំនុំជម្រះលើខ្មាន់កាំភ្លើង និងអ្នកពាក់ព័ន្ធជនជាតិថៃមួយចំនួន នៅថ្ងៃទី៣០ ខែកញ្ញា ឆ្នាំ២០២៥នេះ។ នេះបើតាមការទម្លាយឱ្យដឹងពីគ្រួសារជនរងគ្រោះ។
ការណ៍នេះ ក្រុមអ្នកឃ្លាំមើលជំរុញឱ្យមេដឹកនាំគ្រួសារហ៊ុន ចាប់បញ្ជូនជនសង្ស័យខ្មែរ ២រូប មកកាត់ទោសផងដែរ គឺ លី រតនរស្មី ជាមនុស្សជំនិតមេដឹកនាំកម្ពុជា លោក ហ៊ុន សែន និងពេជ្រ គឹមស្រ៊ីន មកកាត់កាត់ទោសនៅតុលាការព្រហ្មទណ្ឌថៃ ដើម្បីបញ្ជាក់ថា មេដឹកនាំខ្មែរ មិនជាប់ពាក់ព័ន្ធទៅនឹងសំណុំរឿងឃាតកម្មដ៏សាហាវឃោរឃៅមួយនេះ។
លោក លិម តូម៉ាស់ ជាជនជាតិបារាំង និងជាកូនប្រុសរបស់លោក លិម គិមយ៉ា កាលពីថ្ងៃទី២៨ ខែកញ្ញានេះ បានបង្ហោះលិខិតមួយច្បាប់ បញ្ជាក់ថា នៅថ្ងៃទី៣០ ខែកញ្ញា ឆ្នាំ២០២៥នេះ តុលាការថៃ នឹងបើកសវនាការនៅទីក្រុងបាងកក លើឃាតកម្ម លោក លិម គិមយ៉ា អាយុ ៧៣ឆ្នាំ ជនជាតិបារាំង-កម្ពុជា និងជាអតីតបក្សប្រឆាំង។
លោក លិម គិមយ៉ា ត្រូវបានខ្មាន់កាំភ្លើងបាញ់សម្លាប់កាលពីថ្ងៃទី៧ ខែមករា ឆ្នាំ២០២៥ នៅកណ្តាលទីក្រុងបាងកក ខណៈគាត់បានចេញដំណើរពីទីក្រុងសៀមរាប(កម្ពុជា) មកប្រទេសថៃ ជាមួយប្រពន្ធ។
ប្រភពបន្តថា លោក លិម គិមយ៉ា ជាតំណាងរាស្រ្តគណបក្សសង្រ្គោះជាតិ ក្នុងចន្លោះឆ្នាំ២០១៣ ដល់ឆ្នាំ ២០១៧ បើទោះបីរដ្ឋាភិបាលកម្ពុជា លោក ហ៊ុន សែន រំលាយ តែលោកនៅតែសកម្មជួយជាតិមាតុភូមិកម្ពុជារហូត ហើយលោក លិម គិមយ៉ា មិនបានបោះបង់ការប្ដេជ្ញាចិត្ត ចង់ស្តារលទ្ធិប្រជាធិបតេយ្យ សិទ្ធិមនុស្ស និងយុត្តិធម៌សង្គមក្នុងប្រទេសកម្ពុជានោះឡើយ។
ប្រភពបញ្ជាក់ថា មួយថ្ងៃបន្ទាប់ពីការធ្វើឃាត ប៉ូលីសថៃបានបើកការស៊ើបអង្កេត និងកំណត់អត្តសញ្ញាណជនសង្ស័យចំនួន៤នាក់ មានជនជាតិខ្មែរ ២នាក់ ឈ្មោះ លី រតនៈរស្មី និង ពេជ្រ គីមស្រ៊ីន។
ប្រភពបន្តថា ជនសង្ស័យឈ្មោះ ពេជ្រ គីមស្រ៊ីន ជាអ្នកផ្តល់សញ្ញាឱ្យឃាតករជនជាតិថៃ តាមប្រហារលោក លិម គិមយ៉ា ដែលប៉ូលីសថៃបានសហការជាមួយប៉ូលីស Interpol កំពុងតាមចាប់ខ្លួនហើយ។
ប្រភពបន្តទៀតថា បច្ចុប្បន្នជនសង្ស័យទាំងពីរគឺ លី រតនៈរស្មី និងពេជ្រ គីមស្រ៊ីន ត្រូវបានគេដឹងថា កំពុងសំងំលាក់ខ្លួននៅក្នុងប្រទេសកម្ពុជា។
ចំណែក ជនសង្ស័យពីរនាក់ទៀតដែលជាជនជាតិថៃ នឹងបើកសវនាការកាត់ទោស នៅថ្ងៃទី៣០ ខែកញ្ញានេះ គឺឈ្មោះ ឯកកាឡាក់ ភេណូយ និងម្នាក់ទៀតឈ្មោះ ឆាគ្រីត ដែលគេជឿថាជាអ្នកបើករថយន្តជូន ភេណូយ រត់ទៅព្រំដែនកម្ពុជា។
ការណ៍នេះ មេធាវីគ្រួសារលោក លិម គិមយ៉ា សង្ឃឹមថា តុលាការថៃនឹងស្វែងរកយុត្តិធម៌ជូនជនរងគ្រោះ ដែលក្រុមឃាតករបានសហការ ឬគប់គិតគ្នាសម្លាប់មនុស្សឆ្លងដែនដ៏សាហាវឃោរឃៅមួយនេះ។
បន្ថែមលើនេះ លោក លិម តូម៉ាស់ ប្រាប់VODនៅថ្ងៃទី២៩ខែកញ្ញានេះថា តុលាការថៃ នឹងបើកសវនការសំណុំរឿងឃាតកម្មឳពុកលោក នៅថ្ងៃទី៣០ខែកញ្ញា វេលាម៉ោងប្រមាណ៣រសៀល នៅទីក្រុងបាងកក។
លោកសង្ឃឹមថា តុលាការថៃនឹងផ្តល់យុត្តិធម៌ដល់គ្រួសារលោក ដោយផ្តន្ទាទោសជនសង្ស័យ ដើម្បីដាក់សម្ពាធឱ្យជនសង្ស័យទាំងនោះសារភាពបន្ថែមថា នរណាជាអ្នកបញ្ជាបាញ់សម្លាប់ឳពុកលោក។
លោកបន្តថា ការបើកសវនការនេះជាជំហានបឋម ដោយលោកទទូចឱ្យមេដឹកនាំកម្ពុជាសហការជាមួយតុលាការថៃនិងបារាំង ត្រូវចាប់បញ្ជូនខ្លួន លី រតនៈរស្មី និងពេជ្រ គីមស្រ៊ីន ដើម្បីផ្តន្ទាទោសផងដែរ។
លោកនិយាយថា៖ «ថ្ងៃស្អែកនេះ ខ្ញុំមិនសូវមានសង្ឃឹមពីយុត្តិធម៌ទេ ប៉ុន្តែវាជាការចាប់ផ្តើមប៉ុណ្ណោះ បើមេដឹកនាំកម្ពុជាមិនចាប់ខ្លួន លី រតនៈរស្មី និងពេជ្រ គីមស្រ៊ីន ទេយុត្តិធម៌ឳពុកខ្ញុំមិនទទួលបានទេ ខ្ញុំសង្ស័យថារឿងនេះ ប្រាកដជាមានជាប់ពាក់ព័ន្ធមេដឹកនាំកម្ពុជា ទើបមិនចាប់ខ្លួន លី រតនរស្មី និងពេជ្រ គីមស្រ៊ីន ផ្តន្ទាទោស ខ្ញុំដឹងថា មានគ្រួសារតែមួយគត់ដែលឪពុកខ្ញុំមានបញ្ហាជាមួយ ហើយអ្នកដែលមានលទ្ធភាពរៀបចំការធ្វើឃាតនៅប្រទេសថៃ ដោយមិនខ្លាចផលវិបាកនោះ គឺគ្រួសារត្រកូលហ៊ុន»។
តំណាងរាស្រ្តបក្សសង្រ្គោះជាតិ លោក អ៊ុំ សំអាន ប្រាប់VODនៅថ្ងៃទី២៩ ខែកញ្ញានេះថា សំណុំរឿងលោក លិម គិមយ៉ា នឹងមិនទទួលបានយុត្តិធម៌ទេ បើគ្រួសារហ៊ុនមិនបញ្ជូន លី រតនៈរស្មី និងពេជ្រ គីមស្រ៊ីន ទៅកាត់ទោស។
លោកអះអាងថា ឃាតកម្មលោក លិម គិមយ៉ា ជារឿងនយោបាយដែលមានជាប់ពាក់ព័ន្ធនឹងមេដឹកនាំគ្រួសារហ៊ុន ហេតុដូច្នេះហើយទើបមេដឹកនាំគ្រួសារហ៊ុន ព្យាយាមលាក់ជនសង្ស័យទាំង២នាក់នោះទុក។
លោកបន្តថា ដរាបណាមេដឹកនាំគ្រួសារហ៊ុនមិនចាប់បញ្ជូន លី រតនៈរស្មី និងពេជ្រ គីមស្រ៊ីន ទៅឱ្យតុលាការថៃកាត់ទោស នោះមហាជនជឿថាគ្រួសារហ៊ុនជាអ្នកនៅពីខាងក្រោយខ្នងឃាតកម្មនេះ។
សម្រាប់ លោក អ៊ុំ សំអាន យល់ថា បើមេដឹកនាំគ្រួសារហ៊ុនចិត្តស៊ើង ថាខ្លួនមិនជាប់ពាក់ព័ន្ធនឹងសំណុំរឿងឃាតកម្មបាញ់សម្លាប់ លោក លិម គិមយ៉ា ទេ ត្រូវហ៊ានបញ្ជូនជនសង្ស័យទាំង២នាក់នោះទៅកាត់ទោស។
ផ្ទុយពីនេះ លោកថា បើមេដឹកនាំគ្រួសារហ៊ុន បន្តលាក់ទុកជនសង្ស័យ លី រតនៈរស្មី និងពេជ្រ គីមស្រ៊ីន ឆ្លុះបញ្ចាំងថា គ្រួសារហ៊ុនជាអ្នកនៅពីខាងក្រោយនៃការបញ្ជាឱ្យបាញ់សម្លាប់លោក លិម គិមយ៉ា។
លោកថា៖ «យើងជឿជាក់ថា រឿងនេះមានពាក់ព័ន្ធទៅនឹងមេដឹកនាំកម្ពុជានៅពីក្រោយខ្នងនៃឃាតកម្មហ្នឹង ព្រោះយើងដឹងហើយនៅថៃហ្នឹង លោក លិម គិមយ៉ា អត់មានទំនាស់ជាលក្ខណៈបុគ្គលជាមួយអ្នកណារឿងនយោបាយនោះទេ ហើយលោក លិម គិមយ៉ា គាត់ជាអ្នកនយោបាយរបស់តំណាងរាស្ត្រគណបក្សសង្គ្រោះជាតិ ហើយគាត់បានរិះគន់ លោក ហ៊ុន ម៉ានី ដែលធ្វើឲ្យឆេះឆាយាល័ក្ខណ៍របស់ព្រះមហាក្សត្រនៅមុខព្រះបរមរាជវាំង ដែលគេគុំគួនគាត់»។
ជុំវិញបញ្ហានេះ VOD មិនទាន់អាចទាក់ទង អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បាននៅឡើយទេ គិតត្រឹមម៉ោងផ្សាយនេះ។
យ៉ាងណា អ្នកច្បាប់ និងជាអ្នកវិភាគឯករាជ្យ លោក វ៉ន ចាន់ឡូត អះអាងថា យុត្តិធម៌មានសម្រាប់គ្រួសារលោក លិម គិមយ៉ា លុះត្រាតែមេដឹកនាំកម្ពុជាហ៊ានសហការចាប់ខ្លួនជនសង្ស័យទាំង២នាក់នោះ។
លោកបន្តថា ករណីតុលាការថៃបើកសវនាការសំណុំរឿងឃាតកម្ម លោក លិម គិមយ៉ា វាជារឿងល្អ ដើម្បីបង្ហាញថា ថៃមិនជាប់ពាក់ព័ន្ធរឿងនេះទេ គឺមានអ្នករៀបចំជួលលក្ខណៈជាប្រព័ន្ធពីភាគីកម្ពុជា។
លោកយល់ថា កាលៈទេសៈនេះ ដើម្បីបង្ហាញភាពស្អាតស្អំថា ខ្លួនមិនជាប់ពាក់ព័ន្ធឃាតកម្មសម្លាប់លោកលិម គិមយ៉ា មេដឹកនាំកម្ពុជាត្រូវសហការជាមួយតុលាការថៃ កាត់ទោសជនសង្ស័យទាំង២នាក់នោះ។
លោកបន្តថា បើមេដឹកនាំកម្ពុជាមិនសហការជាមួយតុលាការថៃ ឬប៉ូលីសអន្តរជាតិ ដើម្បីចាប់ខ្លួនជនសង្ស័យ លី រតនៈរស្មី និងពេជ្រ គីមស្រ៊ីន ទេ មហាជនជឿថាមេដឹកនាំកម្ពុជាមានជាប់ពាក់ព័ន្ធរឿងនេះ។
លោកថា៖ «ដើម្បីស្វែករកការពិត ហើយនិងបានផ្ដល់យុត្តិធម៌ជូនចំពោះជនរងគ្រោះ ការដែលកម្ពុជាធ្វើការសហការដោយពេញដៃពេញជើងនេះ កម្ពុជានឹងអាច អាជ្ញាធរកម្ពុជានឹងអាចគេចផុតពីភាពអាសោចនៃការពាក់ព័ន្ធទៅនឹងអំពើឃាតកម្មនយោបាយមួយនេះ ប៉ុន្តែផ្ទុយមកវិញ បើមិនមានការសហការទេប្រាកដណាស់ មហាជននឹងដាក់ការសង្ស័យថា អ្នកនៅពីក្រោយនៃឃាតកម្មគឺក្រុមមេដឹកនាំកម្ពុជា»។
លោក លិម គិមយ៉ា អាយុ៧៣ឆ្នាំ ត្រូវបានគេបាញ់សម្លាប់ ខណៈលោកនិងភរិយាជាជនជាតិបារំាងធ្វើដំណើរចេញពីខេត្តសៀមរាប ឆ្លងកាត់ប្រទេសថៃ ក្នុងដំណើរវិលទៅប្រទេសបារំាងវិញ។
ឃាតកម្មនេះ ក្រោយលោក លិម គិមយ៉ា រិះគន់គ្រួសារហ៊ុន ធ្វើឱ្យឆេះព្រះឆាយាល័ក្ខណ៍ព្រះមហាក្សត្រ ក្នុងព្រឹត្តិការណ៍ «សាទរកម្ពុជា» ដែលរៀបចំក្នុងថ្ងៃឆ្លងឆ្នាំសាកល២០២៥។
ក្រោយឃាតកម្មកើតឡើង ឃាតករជនជាតិថៃ ឈ្មោះ Akkalak peanoi ត្រូវបានចាប់ខ្លួនបាននៅក្នុងទឹកដីកម្ពុជា ក្នុងខេត្តបាត់ដំបង។
ក្រោយមក តុលាការថៃ បានចេញដីកាឱ្យចាប់ខ្លួន លី រតនៈរស្មី ជាទីប្រឹក្សា លោក ហ៊ុន សែន។ ដោយឡែក ប៉ូលិសអន្តរជាតិអាំងទែប៉ូល (Interpol) បានចេញនិវេទន៍ក្រហម (Red notice) ឱ្យស្វែងរកចាប់ខ្លួនអ្នកផ្តល់តម្រុយឱ្យបាញ់សម្លាប់ លោក លិម គិមយ៉ា គឺជនសង្ស័យឈ្មោះ ពេជ្រ គឹមស៊្រីន ។
ពេជ្រ គឹមស៊្រីន ត្រូវគេស្គាល់ថា ជាមនុស្សស្និទ្ធនឹងលោក ឃួង ស្រេង អភិបាលរាជធានីភ្នំពេញ ដែលញឹកញាប់ លោក ឃួង ស្រេង តែងតែបង្ហាញកាយវិការលូនក្រាបគ្រួសារហ៊ុន។
កាលពីថ្ងៃទី២៤ ខែមករា បារាំងតាមរយៈឯកអគ្គរដ្ឋទូតបារាំងប្រចាំនៅកម្ពុជា ធ្លាប់លើកឡើងពីយុត្តិធម៌ លោក លិម គិមយ៉ា នៅចំពោះមុខ លោក ប្រាក់ សុខុន រដ្ឋមន្រ្តីក្រសួងការបរទេសកម្ពុជាផងដែរ។
បន្ទាប់មកទៀត ភាគីបារាំងក៏បានជួប លោក ឌី វិជ្ជា ជាប្រធាននាយកកណ្ដាលសន្តិសុខ អគ្គស្នងការរងនគរបាលជាតិនៃក្រសួងមហាផ្ទៃ ជុំវិញវិធានចាប់ខ្លួនជនសង្ស័យក្នុងសំណុំរឿងឃាតកម្មនេះ ។
យ៉ាងណា ជិត១០ខែទៅនេះ ជនសង្ស័យ លី រតនៈរស្មី និងពេជ្រ គឹមស៊្រិន ត្រូវបានគេដឹងថា នៅបន្តលាក់ខ្លួនក្នុងប្រទេសកម្ពុជា ក្រោមអំណាចរបស់គ្រួសារហ៊ុន។
ការលាក់ទុក និងជួយការពារជនសង្ស័យទាំងពីរនាក់នេះ ដែលមេដឹកនាំកម្ពុជាមិនព្រមសហការប្រគល់ជនសង្ស័យ ឱ្យទៅប៉ូលីសអន្តរជាតិ អាំងទែប៉ូល និងតុលាការថៃ ដើម្បីកាត់ទោស និងរកអ្នកពាក់ព័ន្ធផ្សេងទៀតជុំវិញឃាតកម្មដ៏ឃោរឃៅនេះ រដ្ឋាភិបាលគ្រួសារហ៊ុនរងការចោទថា ជាអ្នកនៅពីក្រោយឃាតកម្មលើតំណាងរាស្ត្រគណបក្សប្រឆាំងរូបនេះដ៏ពិតប្រាកដ ដែលជាដើមហេតុបង្កើតឱ្យមានវប្បធម៌និទណ្ឌភាពនៅកម្ពុជា។
អង្គការគម្រោងយុត្តិធម៌ពិភពលោក បានចេញផ្សាយរបាយការណ៍ស្ដីពីនីតិរដ្ឋ កាលពីថ្ងៃទី២៤ ខែតុលា ឆ្នាំ២០២៤ ដាក់ឱ្យប្រទេសកម្ពុជាជាប់ចំណាត់ថ្នាក់លេខរៀងទី១៤១ ជាចំណាត់ថ្នាក់ទាបជិតបាតតារាងដូចឆ្នាំកន្លងទៅដែរ ក្នុងចំណោមប្រទេសទាំង១៤២ ។
ការកំណត់នីតិរដ្ឋនៃអង្គការគម្រោងយុត្តិធម៌ពិភពលោក គឺផ្អែកលើមូលដ្ឋាននៃការប្រើអំណាចរបស់មេដឹកនាំប្រទេសនីមួយៗ ជុំវិញការធានានូវការអនុវត្តរដ្ឋធម្មនុញ្ញ ការអនុវត្តច្បាប់ផ្សេងៗ រួមទាំងការធានានូវសេរីភាពសារព័ត៌មានផងដែរ។
បន្ថែមលើនេះ ក៏វាស់វែងលើការប្រព្រឹត្តអំពើពុករលួយ ការបើកចំហសេរីភាពពីរដ្ឋាភិបាល ការបើកចំហសិទ្ធិជាមូលដ្ឋានរបស់ពលរដ្ឋ និងកត្តាមួយចំនួនទៀត៕
