មនុស្សរាប់ពាន់នាក់ បានចូលរួមតវ៉ាក្នុងការទប់ស្កាត់ទៅនឹងឧក្រិដ្ឋកម្មសម្លាប់នៅទីក្រុងប៊ុយណូ អាយវ៉េ ដើម្បីទាមទាររកយុត្តិធម៌សម្រាប់ក្មេងស្រី និងស្រ្តីវ័យក្មេងពីរនាក់ ដែលត្រូវបានដាក់ទោសទារុណកម្ម និងសម្លាប់ក្នុងឧក្រិដ្ឋកម្មដែលបានធ្វើឱ្យប្រទេសអាហ្សង់ទីនមានការភ្ញាក់ផ្អើល។
សារព័ត៌មានប៊ីប៊ីស៊ី(BBC) បានរាយការណ៍នៅថ្ងៃទី២៨ ខែកញ្ញា ឆ្នាំ២០២៥នេះថា ការសម្លាប់ដ៏សាហាវឃោឃៅទៅលើក្មេងស្រីអាយុ១៥ឆ្នាំ ឈ្មោះ ឡារ៉ា ហ្កាត់តេរើស(Lara Gutierrez) និងស្រ្តីវ័យក្មេង២រូបទៀតអាយុ ២០ឆ្នាំ ឈ្មោះ មូរ៉េ វ័រឌី(Morena Verdi) និង ប្រ៊ែនដា ឌែល ខាសស្រ្តូ(Brenda del Castillo) នោះបានផ្សាយបន្តផ្ទាល់នៅលើប្រព័ន្ធផ្សព្វផ្សាយសង្គម។
ប៉ូលីសអះអាងថា ក្រុមជួញដូរគ្រឿងញៀនត្រូវទទួលខុសត្រូវទៅលើរឿងនេះ ហើយថាឧក្រិដ្ឋកម្មនេះត្រូវបានផ្សាយបន្តផ្ទាល់ដើម្បីជាការព្រមានទៅអ្នកដទៃទៀត។
យោងតាមរដ្ឋមន្ត្រីសន្តិសុខជាតិ បានឱ្យដឹងថា ពួកគេបានចាប់ជនសង្ស័យចំនួន ៥នាក់ ក្នុងនោះរួមមាន បុរស ៣នាក់ និងស្រ្តី២នាក់ គិតត្រឹមថ្ងៃសុក្រកាលពីសប្តាហ៍មុននេះ។
យ៉ាងណា យោងតាមអ្នកស៊ើបអង្កេត ជនរងគ្រោះត្រូវបានបោកបញ្ឆោតឱ្យចូលទៅក្នុងឡានដឹកទំនិញមួយដោយពួកគេជឿជាក់ថា ពួកគេបានធ្វើដំណើរទៅកាន់កម្មវិធីជប់លៀងមួយនៅថ្ងៃទី១៩ ខែកញ្ញា។ ដោយឡែកអាជ្ញាធរបាននិយាយថា នេះគឺជាផ្នែកមួយនៃផែនការ‘‘ដាក់ទោស’’ទៅលើក្មេងស្រីនិងស្រ្តីវ័យក្មេង ពីបទបំពានទៅលើក្មេងទំនើង ទុកជាការព្រមានចំពោះអ្នកដ៏ទៃទៀត។
ជាមួយគ្នានេះ ប្រភពប៊ីប៊ីស៊ី(BBC)ដដែលថា សាកសពជនរងគ្រោះទាំងបី ត្រូវបានរកឃើញកប់នៅជាយខាងត្បូងនៃទីក្រុងប៊រនូស អេរីស កាលពីថ្ងៃពុធ នៅប្រាំថ្ងៃបន្ទាប់ពីពួកគេបានបាត់ខ្លួន។ បន្ថែមពីនេះ សាច់ញាតិជនរងគ្រោះបានចូលរួមក្នុងក្បួនដង្ហែរទៅកាន់សភា កាលពីថ្ងៃសៅរ៍ ដើម្បីទាមទារយុត្តិធម៌សម្រាប់ស្រ្តីនិងក្មេងស្រីថែមទាំងបានប្រាប់ទៅកាន់សារព័ត៌មាន ខណៈនៃការតវ៉ាថា ‘‘ស្រ្តី្តត្រូវតែទទួលបានការការពារជាអាទិភាព’’៕
