ការដែលអង្គភាពប្រឆាំងអំពើពុករលួយ (ACU) រកឃើញមេប៉ូលិសខេត្តបាត់ដំបង រត់ការបិទបាំងសំបុកឧក្រិដ្ឋជនឆបោកអនឡាញនោះ ជំរុញការលើកឡើងពីវិធានបោសសម្អាតជាប្រព័ន្ធ រួមទាំងវះកាត់ឧក្រិដ្ឋជនដែលមេដឹកនាំប្រមូលដាក់ក្បែរខ្លួន ទើបអាចបង្រ្កាបសំបុកឧក្រិដ្ឋជនដល់ឬសគល់បាន។
ការលើកឡើងនេះ ក្រោយ ACU រកឃើញថា អធិការរងនគរបាលស្រុកបវេល ខេត្តបាត់ដំបង លោក វ៉ន វាសនា បានប្រព្រឹត្តិអំពើពុករលួយទទួលប្រាក់ចំនួន ៧៧៤ ០០០ ដុល្លារអាមេរិក ពីថៅកែ Online Scams ជាជនជាតិថៃ។
បើតាមរបាយការណ៍របស់ACU ចុះថ្ងៃទី២៩ ខែកញ្ញា ឆ្នាំ២០២៥ ឱ្យដឹងថា លោក វ៉ន វាសនា យកលុយពីឧក្រិដ្ឋជនឆបោកតាមអនឡាញនេះ ជាថ្នូរនឹងការដោះលែងជនជាតិថៃ ៤៣នាក់ ដែលសមត្ថកិច្ចបង្រ្កាបបាននៅក្រុងប៉ោយប៉ែតថ្មីៗនេះ ជុំវិញការលាក់ខ្លួននៅកម្ពុជាប្រព្រឹត្តអំពើឆបោកតាមអនឡាញ។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ យល់ថា ដើម្បីបោសសម្អាតពួកឧក្រិដ្ឋជនឱ្យដល់ឬសគល់ ចាំបាច់ណាស់ត្រូវបង្រ្កាបជាប្រព័ន្ធក្នុងជួររដ្ឋាភិបាល មានទាំងមនុស្សជំនិតក្បែរលោក ហ៊ុន សែន ផង។
ក្នុងន័យនេះ លោកថា ការចាប់ខ្លួនមន្រ្តីថ្នាក់ក្រោមបែបនេះ គ្រាន់តែជារូបភាពឱ្យល្អមើលប៉ុណ្ណោះ វាគ្មានប្រសិទ្ធភាពទេ តែបើមេខ្លោងធំៗនៅក្បែរមេដឹកនាំនៅតែអាចរស់បានក្រៅសំណាញ់ច្បាប់នោះ។
លោកថា៖ «យើងចាប់តែអ្នកកំប៉ិកកំប៉ុកនៅតាមក្រោម មិនអាចធ្វើអ៊ីចឹងបានទេ! បើយើងចាប់ដើម្បីរកតាមសំបុក! ដើម្បីកម្ចាត់ឧក្រិដ្ឋកម្មអនឡាញបាន ត្រូវតែចាប់មេកំពូលសិន! មេធំ។ ឲ្យតែចាប់នេះធំបានហើយ គឺមកហើយ អាថ្នាក់បន្ទាប់ៗ ឃើញធ្លាក់មកឯងទាំងអស់ ឃើញដឹងទាំងអស់ អាចធ្លាយមក ឥលូវចាប់សាកមើល។ ឥឡូវនេះគេឃើញហើយ! អន្តរជាតិទាំងអស់គេមើលឃើញថា អ្នកណាៗគេប្រាប់អស់ប៉ុណ្ណឹងហើយតើ»។
សម្រាប់ លោក ម៉ែន សុថាវរិន្រ្ទ ការដែលរដ្ឋាភិបាលគ្រួសារហ៊ុន ហ៊ានចាប់ខ្លួនតែមន្រ្តីតូចតាច បែបនេះ តែមិនហ៊ានវះកាត់ឧក្រិដ្ឋជនក្បែរខ្លួននោះ គឺដោយសារតែទុកឱ្យពួកឧក្រិដ្ឋជនទាំងនោះ អាចរកលុយមកជួយទ្រទ្រង់អំណាចរបស់ខ្លួន។
លោកថា៖ «បើគាត់កម្ចាត់ពួកហ្នឹងចេញ! មានអ្នកណាមកជួយគាំទ្រពួកគាត់ ពួកគាត់ឥលូវនេះ មានបញ្ហាវិបត្តិសេដ្ឋកិច្ចខ្លាំងក្លាមែនទែន! បញ្ហាខ្លាំងមែនទែន ឃើញទេ! គាត់បង្កើតស្អី!ដំណាក់កាលនេះឃើញទេទៅបង្កើតសមាគមយុទ្ធជន ជនភៀសសឹកអីណាៗ។ រាប់សិបឆ្នាំ ៤០ឆ្នាំ អត់មាននឹកឃើញ! ស្រាប់តែ លើកកេណ្ឌយកតែឧកញ៉ាៗ! ហើយមកធ្វើអនុៗ(ប្រធាន)។ យកមកទាំងអស់ហើយ អត់មានចាប់ស៊ើបអង្កេតទេ! គេចង្អុលប្រាប់ប៉ុណ្ណឹងហើយ! បើប្រទេសមួយៗប្រទេសលោកសេរី គេសម្អាតភ្លាម ធ្វើម៉េចដើម្បីកុំឱ្យស្អុយឈ្មោះ »។
ជាការកត់សម្គាល់ មនុស្សជំនិតៗមួយចំនួន នៅជុំវិញប្រធានគណបក្សកាន់អំណាច លោក ហ៊ុន សែន ត្រូវបានអន្តរជាតិរកឃើញជាបន្តបន្ទាប់ថា ជាមេឧក្រិដ្ឋជនរកស៊ីចិញ្ចឹមអំណាចគ្រួសារហ៊ុន។
ក្នុងនោះឧកញ៉ា លី យ៉ុងផាត់ ដែលជាកាន់កាប់លុយឱ្យគណបក្សប្រជាជនកម្ពុជា និងជា ប្រធានសមាគមឧកញ៉ាកម្ពុជាផងនោះ ជាប់ឈ្មោះក្នុងបញ្ជីខ្មៅអាមេរិក ជុំវិញបទឧក្រិដ្ឋឆបោក និងការរំលោភសិទ្ធិមនុស្ស។
ដោយឡែក ក្មួយលោក ហ៊ុន សែន ឧកញ៉ា ហ៊ុន តូ ជាប់ឈ្មោះជាមេខ្លោងគ្រឿងញៀន និងលាងលុយកខ្វក់ រួមទាំង ឧកញ៉ា ចេន ហ្ស៊ី ទីប្រឹក្សាលោក ហ៊ុន សែន ត្រូវតុលាការចិនរកឃើញពាក់ព័ន្ធបទឧក្រិដ្ឋអនឡាញខុសច្បាប់ជាដើម។
ជាងនេះទៀត ក្រសួងរតនាគារអាមេរិក កាលពីថ្ងៃទី៨ ខែកញ្ញា ឆ្នាំ២០២៥ ប្រកាសដាក់ទណ្ឌកម្មឧកញ៉ា ទ្រី ភាព ទីប្រឹក្សាលោក ហ៊ុន សែន ក្រោយរកឃើញថា បណ្តាញបោកប្រាស់តាមអ៊ីនធឺណិតនៅកម្ពុជា មានជាប់ពាក់ព័ន្ធក្រុមហ៊ុនរបស់ឧកញ៉ា ទ្រី ភាព។
សម្រាប់ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ឯកភាពថា ការវះកាត់មន្រ្តីតូចតាចនៅមូលដ្ឋានដែលជាប់ពាក់ព័ន្ធបទឧក្រិដ្ឋឆបោកអនឡាញ វាមិនអាចធ្វើឱ្យកម្ពុជារួចផុតពីឧក្រិដ្ឋកម្មឆបោកក្នុងយុគសម័យបច្ចេកវិទ្យានេះបានទេ។
ក្នុងន័យនេះ លោកថា ដើម្បីបង្ហាញពីឆន្ទៈពិតបោសសម្អាតពួកឧក្រិដ្ឋជនឱ្យអស់ពីកម្ពុជា ទាមទារឱ្យរដ្ឋាភិបាលហ៊ានវះកាត់មនុស្សជំនិតៗ នៅជុំវិញខ្លួន ដែលអន្តរជាតិរកឃើញថា ជាមេខ្លោងធំៗ រួមមាន ឧកញ៉ា ទ្រី ភាព ឧកញ៉ា លី យ៉ុងផាត់ ឧកញ៉ា ហ៊ុន តូ រួមទាំង ឧកញ៉ា ចេន ហ្ស៊ី ជាដើម។
លោកថា៖ «រដ្ឋាភិបាលកម្ពុជាត្រូវតែចូលរួមយ៉ាងសស្រាក់ស្រាំ ជាមួយដៃគូអន្តរជាតិ ដូចជា អាមេរិក អង់គ្លេស អង្គការសហប្រជាជាតិ គេចង្អុលបង្ហាញ យើងត្រូវតែចូលរួមសហការជាមួយគេស៊ើបអង្កេត ហើយនាំគេមកស៊ើបអង្កេតដល់ផ្ទះ ដល់ប្រទេសកម្ពុជា! រួចចាប់ពួកអ្នកអស់ហ្នឹង ផ្តន្ទាទោសតាមផ្លូវច្បាប់។ រឿងអស់នេះ មិនមានមន្ត្រីតូចតែអីដឹងទេ សុទ្ធតែពាក់ព័ន្ធ មនុស្សជំនិតៗរបស់ លោក ហ៊ុន សែន ទៀត។ បើលោក ហ៊ុន សែន សហការណ៍ លោក ហ៊ុន ម៉ាណែត សហការណ៍ស៊ើបអង្កេត រឿងអ្នកដោះស្រាយចេញហើយ។ ដោះស្រាយចេញគឺលាងជម្រះភាពមន្ទិលសង្ស័យជាអន្តរជាតិបាន ធ្វើឲ្យកម្ពុជាមានកេរ្តិ៍ឈ្មោះល្អឡើងវិញនៅលើឆាកអន្តរជាតិ»។
របាយការណ៍ស្រាវជ្រាវជាង ៧០ទំព័រ របស់វិទ្យាស្ថាន Humanity Research Consultancy (HRC) ចេញផ្សាយថ្ងៃទី១៩ ខែឧសភា ឆ្នាំ២០២៥ បានបង្ហាញថា ប្រទេសកម្ពុជា នៅក្រោមអំណាចរដ្ឋាភិបាលគ្រួសារហ៊ុន គឺជាទីតាំងស្នូលនៃការប្រព្រឹត្តិឧក្រិដ្ឋកម្មឆ្លងដែន ជាពិសេស ឧក្រិដ្ឋកម្មអនឡាញ។
ប្រភពបន្តថា គ្រួសារហ៊ុន ដើរតួនាទីជាអ្នកការពារពួកអ្នកមានអំណាច ឱ្យគប់គិតជាមួយបណ្តាញឧក្រិដ្ឋកម្មបរទេសដើម្បីប្រមូលប្រាក់ យកទៅចិញ្ចឹមគណបក្សកាន់អំណាច ដោយពួកគេអាចរកចំណូលបានពីឧក្រិដ្ឋកម្មអនឡាញប្រមាណពី ១២,៥ពាន់លាន ទៅ ១៩ពាន់លានដុល្លារនៅក្នុង១ឆ្នាំ។
តាមរបាយការណ៍ដដែល បង្ហាញទៀតថា មានបុគ្គលដែលជាប់សង្ស័យពាក់ព័ន្ធនៅក្នុងបណ្តាញឧក្រិដ្ឋកម្មឆ្លងដែននៅកម្ពុជាសរុបចំនួន ២៨នាក់ ដែលភាគច្រើនជាមន្ត្រីជាន់ខ្ពស់ក្នុងជួររដ្ឋាភិបាល និងឧកញ៉ាគ្រាក់ៗ៕
