ប្រធានាធិបតីម៉ាដាហ្គាស្កា លោក អ៊ែនឌ្រី រ៉ាចូលីណា បាននិយាយកាលពីថ្ងៃចន្ទថា លោកកំពុងរំលាយរដ្ឋាភិបាល បន្ទាប់ពីមានការតវ៉ាដែលដឹកនាំដោយក្រុមយុវជន ជុំវិញការផ្តាច់ទឹក និងកាត់ផ្តាច់ចរន្តអគ្គិសនីដែលអង្គការសហប្រជាជាតិ និយាយថា យ៉ាងហោចណាស់ មានមនុស្ស ២២នាក់ បានស្លាប់ និងជាង១០០នាក់ បានរងរបួស។
ម៉ាដាហ្គាស្កា(Madagascar) គឺជាកោះធំមួយនៅមហាសមុទ្រឥណ្ឌា ដែលស្ថិតនៅខាងកើតនៃទ្វីបអាហ្វ្រិកដែលជាកោះឯករាជ្យ មិនមែនជាផ្នែកនៃប្រទេសផ្សេងនោះទេ។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី៣០ ខែកញ្ញា ឆ្នាំ២០២៥នេះថា ការបំផុសគំនិតដែលទទួលបានឥទ្ធិពលការតវ៉ាពី ហ្សែនហ្ស៊ី(Gen Z)នៅក្នុងប្រទេសកេនយ៉ា និងនេប៉ាល់ ដែលការតវ៉ាបីថ្ងៃនេះ គឺធំជាងគេបំផុតនៃកោះនៅមហាសមុទ្រឥណ្ឌា ត្រូវបានឃើញក្នុងរយៈពេលច្រើនឆ្នាំមកនេះ ការតវ៉ានេះបានក្លាយជាបញ្ហាប្រឈមធ្ងន់ធ្ងរបំផុត ចំពោះប្រធានាធិបតី រ៉ាចូលីណា ចាប់តាំងពីលោកឈ្នះការបោះឆ្នោតឡើងវិញនៅឆ្នាំ២០២៣។
ប្រធានាធិបតីរូបនេះ បាននិយាយថា លោកចង់បង្កើតចន្លោះសម្រាប់កិច្ចសន្ទនាជាមួយយុវជនវ័យក្មេង ហើយបានសន្យាថានឹងចាត់វិធានដើម្បីជួយដល់អាជីវកម្មដែលរងផលប៉ះពាល់ដោយការលួច។
ឧត្តមស្នងការអង្គការសហប្រជាជាតិ ដែលទទួលបន្ទុកខាងផ្នែកសិទ្ធិមនុស្ស បាននិយាយថា អ្នកស្លាប់បាត់បង់ជីវិត រួមមាន អ្នកតវ៉ា និងអ្នកដែលនៅជិតកន្លែងព្រឹត្តិការណ៍ ត្រូវបានសម្លាប់ដោយសមាជិកនៃកងកម្លាំងសន្តិសុខ ប៉ុន្តែក៏មានអ្នកផ្សេងទៀតដែលត្រូវបានសម្លាប់ ដោយការរីករាលដាលនៃអំពើហិង្សាជាបន្តបន្ទាប់ និងការលួចប្លន់ដោយបុគ្គល និងក្មេងទំនើង ដែលមិនជាប់ពាក់ព័ន្ធជាមួយក្រុមអ្នកតវ៉ា។
យ៉ាងណា ក្រសួងការបរទេសរបស់កោះម៉ាដាហ្គាស្កា(Madagascar) បានច្រានចោលតួរលេខជនរងគ្រោះដែលរាយការណ៍ដោយអង្គការសហប្រជាជាតិ ដោយនិយាយថា ទិន្នន័យនេះមិនមែនចេញមកពីអាជ្ញាធរជាតិដែលមានសមត្ថកិច្ច ហើយជា‘‘ផ្អែកលើពាក្យចចាមអារាម និងព័ត៌មានមិនពិត’’។
ក្រុមអ្នកតវ៉ា បានយកសញ្ញាលំនាំនៃការតវ៉ាក្នុងប្រទេសនេប៉ាល់ មកប្រើប្រាស់ដែលបង្ខំឱ្យនាយករដ្ឋមន្ត្រីចុះចេញពីតំណែង ហើយថែមទាំងប្រើយុទ្ធសាស្រ្តរៀបចំតាមអ៊ីនធឺណែត ស្រដៀងទៅនឹងប្រទេសកេនយ៉ា កាលពីឆ្នាំមុនដែលចុងក្រោយនាំឱ្យរដ្ឋាភិបាលលុបចោលច្បាប់ពន្ធដែលបានស្នើ។
លោក រ៉ាចូលីណា (Rajoelina) បានឡើងកាន់អំណាចជាលើកដំបូង ដោយរដ្ឋប្រហារនៅក្នុងឆ្នាំ២០០៩ ហើយលោកបានលាលែងពីតំណែងនៅឆ្នាំ២០១៤ ប៉ុន្តែបានក្លាយជាប្រធានាធិបតីម្តងទៀត បន្ទាប់ពីឈ្នះការបោះឆ្នោតនៅឆ្នាំ២០១៨ ហើយទទួលបានអាណត្តិលើកទីបី ក្នុងឆ្នាំ២០២៣៕
