ថៃ​ឆ្មក់ចុះ​វាស់វែ​ង​រំលោភ​យក​ដី​ខ្មែរ​នៅ​ឃុំ​អូរ​បី​ជាន់​ក្រោម​ភាព​ស្ងៀម​ស្ងាត់​របស់​កម្ពុជា

ក្រុមយោធា​ថៃ នៅ​ថ្ងៃ​អង្គារ​នេះ បាន​ពង្រាយ​កម្លាំង​ឆ្មក់​ចុះវា​ស់​វែង​រំលោភ​យក​ដី​ខ្មែរ នៅ​ភូមិ​អូរ​បី​ជាន់ ស្រុក​អូរ​ជ្រៅ ខេត្ត​បន្ទាយ​មាន​ជ័​យ ជិត​បង្គោល​ព្រំដែន​លេខ​៤៦និ​ង៤​៧ ខណៈ​មេដឹកនាំ​កម្ពុជា​នៅ​បន្ត​រក្សា​ភាព​ស្ងៀម​ស្ងាត់ តែ​ត្រូវ​បាន​ពលរដ្ឋ​នៅ​តំបន់​នោះទ​ប់​ស្កាត់​ទាន់​ពេល ។

ការណ៍នេះ ជំរុ​ញ​ឱ្យអ្នក​ឃ្លាំមើល​លើក​ឡើង​ថា យោធា​ថៃ កំពុង​ដាក់​សម្ពាធ​ឱ្យ​កម្ពុជា​ទទួល​យក​ខ្សែ​បន្ទាត់​ព្រំដែន​តាម​​ផែន​ទី​ខ្នាត​១លើ​៥០​ពាន់ ដែល​ថៃ​គូរ​ដោយ​ខ្លួន​ឯង ដើម្បី​លេប​ទឹក​ដី​ខ្មែរ បើ​មេដឹក​នាំ​ខ្មែរ មិន​បង្ហាញ​ឆន្ទៈ​ទប់​ទល់ ក្នុង​បុព្វ​ហេតុ​ការ​ពារ​បូរណភាព​ទឹក​ដី​ទេ​នោះ។

សេចក្តីរាយការណ៍​នានា​ពី​ព្រំដែន​ រួម​ទាំង​ការ​ចុះ​ផ្សាយ​របស់​អង្គ​​ភាព​ព័ត៌​មាន​ប្រតិ​កម្មរ​ហ័ស​របស់​ទីស្តី​កា​រ​គណៈរដ្ឋ​មន្ត្រី​កម្ពុជា​ផង​នោះ បាន​ឱ្យដឹ​ង​ថា នៅ​ព្រឹក​ថ្ងៃ​ទី​៣០​ខែ​កញ្ញា​នេះ ទាហា​ន​ថៃ​មួយ​ក្រុម ត្រូវ​បាន​គេ​ពង្រាយ​ឆ្មក់​ចូល​មក​រំ​លោ​ភ​​បំពាន​ទឹក​ដី​កម្ពុជា ស្ថិត​ក្នុង​ឃុំ​អូរបី​ជាន់។ ប៉ុន្តែ​ថា ត្រូវ​បាន​ប្រជា​ពលរដ្ឋ​ខ្មែរ​ រារាំង​បាន​ទាន់​ពេល។

ទាហាន​ថៃទាំ​ង​នោះ បាន​នាំគ្នា​មក​វាស់​ដី​ចូល​មក​ជិត​បង្គោល​ព្រំដែន​លេខ​៤៦​ នៅចំ​ការ​អំពៅ​ខ្មែរ នៅ​ភូមិ​ជោគ​ជ័យ ឃុំ​អូរ​បីជា​ន់ ស្រុក​អូរជ្រៅ ខេត្ត​បន្ទាយ​មាន​ជ័យ។ យ៉ាង​ណា ក្រោយ​ពលរដ្ឋ​ខ្មែរ​រារាំង​ ទាហាន​ថៃក៏​​បាន​ដក​ថយ​ទៅ​វិញ។

ជុំវិញ​បញ្ហា​នេះ មេដឹកនាំ​កម្ពុជា លោក ហ៊ុន ម៉ាណែត ធ្លាប់​អំពាវនាវ​​រ​ក​ការ​​អន្តរាគមន៍​​​ពី​​អង្គ​​ការ​​សហ​​ប្រជា​ជាតិ រួម​ទាំង​​សហរដ្ឋ​​អាមេរិក និង​​បារាំង​​ជាដើម ដើម្បី​​ជួយ​ដាក់​​សម្ពាធថៃ  ​ឱ្យ​​គោរព​​បទ​​ឈប់​​បាញ់​ដែល​ការ​អំ​ពាវ​នាវ​ពេល​នោះ មាន​​ពលរ​ដ្ឋ​​ខ្មែរ​​២៨​​នាក់ បាន​​រង​​របួស​ដោយសា​រ​កង​កម្លាំង​ថៃ បាន​បាញ់​ផ្សែង​ពុល​​ ស្រោ​ច​មក​លើជ​ន​ស៊ីវិល​ខ្មែរ រួម​ទាំង​ព្រះ​សង្ឃ ​ដែល​បាន​ប្រឈម​មុខ ទប់​ទល់​ទៅ​នឹង​កង​​កម្លាំង​ចម្រុះ​រប​ស់ថៃ ចូល​មក​រាយ​​បន្លា​លួស​ព័ទ្ធ​យក​ដី​ខ្មែរ​នៅភូ​មិ​ព្រៃ​ចាន់ ​​ឃុំអូ​របីជាន់​នេះ។

ប៉ុន្តែមកដល់ពេលនេះ គ្មានប្រទេសណាមួយ ថ្កោល​ទោស​ប្រទេស​ថៃ ដែល​ឈ្លាន​ពាន​ទឹក​ដី​ខ្មែរ រំលោភ​លើ​បទ​ឈប់​បាញ់ តាម​ការ​អំពាវ​នាវ​របស់​មេដឹក​នាំ​កម្ពុជា​ លោក ហ៊ុន ម៉ាណែត ទេ។

កម្តៅព្រំដែននេះ កងទ័ពកម្ពុជា និងថៃ បានប៉ះទង្គិចគ្នា​ដោយ​អាវុធ​ទ្រង់​ទ្រាយ​ធំ រយៈ​ពេល​៥ថ្ងៃ គឺ​ចាប់​ពី​ថ្ងៃ​ទី​២៤​ខែ​កក្កដា រហូត​ដល់​ថ្ងៃ​ទី​២៨ខែ​កក្កដា ទើប​មាន​បទ​ឈប់​បាញ់ ខណៈ​បទ​ឈប់​បាញ់ កើត​ឡើង​ក្រោម​ការ​សម្រប​សម្រួល​​ពី​យន្ត​ការ​អាស៊ាន ផ្តួច​ផ្តើម​គំនិត ដោយ​ប្រធានាធិបតី​អាមេរិក លោក ដូណាល់ ត្រាំ។

ជាការ​កត់​សំគាល់ ថៃមិ​ន​បាន​គោរព​បទ​ឈប់​បាញ់​នេះ​ទេ ពោល​គឺ​ក្រោយ​បទ​ឈប់​បាញ់​បាន​៨​ម៉ោង ថៃបាន​ចល័ត​​ទ័ព​​​ចូល​មក​ចាប់​ទាហាន​ខ្មែរ​២០​នាក់ រហូ​តម​ក​ដល់​ពេល​នេះ ជាង​​២ខែ​ហើយ ថៃ​មិន​ទាន់​ប្រគល់​ទាហាន​ខ្មែរ​១៨​នាក់​ទៀត មក​ឱ្យ​កម្ពុជា​វិញ​នៅ​ឡើយ​ទេ ទោះ​កម្ពុជា​អំពាវ​នាវ​ឱ្យថៃ​គោរព​បទ​ឈប់​បាញ់ និង​អំពាវ​នាវ​ជា​ច្រើន​ដង រក​សហគមន៍​អន្តរ​ជាតិ​ជួយ។

លើសពីនេះ ថៃបានចូលរាយ​បន្លា​លួស​ព័ទ្ធ​យក​ប្រាសាទ​តាមាន់​ធំ ស្ថិត​ក្នុង​ខេត្ត​ឧត្តរ​មាន​ជ័យ ព័ទ្ធ​យក​តំបន់​អាន​សេះ ក្នុង​ខេត្ត​ព្រះ​វិ​ហារ និង​គំរាម​វាយ​យក​១៧​ទីតាំង​ទៀត​នៅ​ខេត្ត​ពោធិ៍​សាត់ និង​ខេត្ត​កោះ​កុង រួម​ទាំង​ព័ទ្ធ​យក​ភូមិ​ព្រៃ​ចាន់ និង​ភូ​មិ​ជោគ​ជ័យ ស្រុក​អូរជ្រៅ ខេត្ត​បន្ទាយ​មាន​ជ័យ​ជាដើម។

ទង្វើឈ្លា​នពា​ន​របស់​ថៃ ចំ​ពេល​ដែល​មេដឹកនាំ​ខ្មែរ ប្រកាស​ជំហរ​ក្រោយ​មាន​បទ​ឈប់​បាញ់​ថា ខ្លួន​បោះ​​បង់ការ​ប្រឈម​​មុខ​ដាក់​គ្នាខា​ង​យោធា ប្រឆាំង​នឹង​ការ​ឈ្លាន​ពាន​របស់​ថៃ ហើយ​ថា​កម្ពុជា​ងាក​មក​ចាប់​យក​វប្បធម៌​សន្ទនា ដើម្បី​ដោះស្រា​យ​បញ្ហា ក្រោម​ហេតុ​ផល​ថា ដើម្បី​រក្សា​សន្តិ​ភាព និង​ស្តារ​ទំនាក់​ទំនង​ឡើង​វិញ​ នៃ​ប្រទេស​ទាំង​ពីរ ក្រោម​ក្រសែ​ភ្នែក​អន្ត​រ​ជាតិ។

ការប្តូរ​ជំហររបស់​មេដឹ​កនាំ​កម្ពុជា​នេះ ធ្វើ​ឱ្យ​ថៃ​ពង្រីក​ការ​ឈ្លាន​ពាន​កម្ពុជា ជា​ចំហរ ដោយ​រំលោភ​យក​ដី​ខ្មែរ​តាម​ព្រំ​ដែន​តាម​ចិត្ត ។

ការណ៍នេះ ធ្វើឱ្យ​មេដឹកនាំបក្សកាន់អំណាច រង​ការ​រិះ​គន់​ពី​អ្នក​តាម​ដាន​បញ្ហា​សង្គម ដែល​មិន​ចំណុះ​ឱ្យ​រដ្ឋា​ភិបាល ដែល​ពួក​គេ​ថា ជំហរ​របស់​មេដឹក​នាំកម្ពុជា ជា​កង្វះ​ឆន្ទៈ​ការ​ពារ​ទឹក​ដី ហើយ​ខ្លាំង​បាន​តែ​ការ​បង្ក្រាប​ខ្មែរ​គ្នាឯ​ង ដើម្បី​ការ​ពារ​អំណាច​តពូជ។

តំណាង​រាស្ត្រគណបក្សសង្គ្រោះជា​តិ​ លោក អ៊ុំ សំអាន បាន​និយាយ​ថា នៅ​ខេត្ត​ពោធិ៍​សាត់​ឯណោះ​វិញ​យោធាជើ​ង​ទឹក​ថៃ បាន​កម្ទេច​រចនា​សម្ព័ន្ធ និង​វាយ​កម្ទេច​ផ្ទះចំ​នួន​៣ខ្នង ដោយ​ថៃ​ចោទ​ថា កម្ពុជា​រំលោភ​ចូល​ដី​ថៃ ​ក្នុ​ង​ខេត្ត​ត្រាត។

លោកគូសបញ្ជាក់ថា អ្នកនាំពាក្យ​រងនៃ​ក​ងទ័​ព​ជើង​ទឹក​ថៃ បាន​បង្ហើប​​នៅ​ថ្ងៃ​ទី​​២៨ ខែ​កញ្ញា ឆ្នាំ​២០២៥​ថា កង​ទ័ព​ជើង​ទឹក​ភូមិន្ទ​ថៃ តាម​រយៈ​បញ្ជាការ​ដ្ឋាន​ការ​ពារ​ព្រំដែន​ចន្ទ័​ថា​បុរី និង​ត្រាត បាន​រុញ​ច្រាន​កង​កម្លាំង​កម្ពុជា និង​វាយ​កម្ទេច​រចនា​សម្ព័ន្ធ ជា​ពិសេស​វាយ​កម្ទេចផ្ទះ​ចំនួន​៣ ទល់​មុខ​ស្រុក​បាន​លុង ស្រុក Ban Muang ខេត្ត​​ត្រាត ជាប់​​ខេត្ត​ពោធិ៍​សាត់។

លើស​ពីនេះ លោក​ថា មេទ័ព​ភូមិ​ភាគ​២ថៃ លោក​ ប៊ុន​ស៊ីន ផាត់​ក្លាំង បាន​ឡើង​ទៅ​លើ​កំពូល​ភ្នំ​ទ្រព្យ ដើម្បីគោរព​លាមុន​នឹងគាត់​ចូល​និវត្តន៍​ថ្ងៃ​ទី​៣០ ខែ​កញ្ញា​នេះ។

ចំណែក​ តំណាង​រាស្ត្រគ​ណបក្ស​ប្រឆាំង​មួយ​រូប​ទៀត គឺ​លោក សួន សូរីដា បាន​និយាយ​ថា គោល​ការណ៍​ជា​អាទិភាព​របស់​អង្គ​ការ​សហ​ប្រជា​ជាតិ និង​សហរដ្ឋ​អាមេរិក គឺ​ការ​ពារ​ជីវិត​មនុស្ស និង​សិទ្ធិ​មនុស្ស មិន​មែន​ការ​ពារ​អំណាច​មេដឹក​នាំ​ប្រទេស​ណាមួ​យ​ទេ។

លោក​យល់​ថា ដូច្នេះ​អ្វីដែ​ល​កម្ពុជាបា​នស្នើ​អ​ង្គកា​រ​សហ​ប្រជា​ជាតិ និង​សហរដ្ឋ​អាមេរិក​ឱ្យ​ជួយ​នៅ​ក្នុង​ជំលោះ​ព្រំដែន​កម្ពុជា-ថៃ ចាំបាច់​ណាស់ កម្ពុជា​ត្រូវ​ធ្វើ​ខ្លួន​បង្ហាញ​ឱ្យ​ពួក​គេ​ឃើញ​ថា «កម្ពុ​ជា​ជា​ប្រទេស​គោរព​​សិទ្ធិ​មនុស្ស និង​ប្រជា​​ធិប​តេយ្យ តាម​រយៈ​ដោះ​លែង​អ្នក​ទោស​នយោ​បាយ សង្គម បរិស្ថាន ដើម្បី​នាំ​មក​នូវ​ការ​ផ្សះ​ផ្សា​ជាតិ​ខ្មែរ​ឡើង​វិញ ទើប​ខ្មែ​រ​ខ្លាំង​បាន។ លោក​លើក​ជា​ចម្ងល់​ថា តើការ​ផ្សះ​ផ្សា​ជាតិ​ខ្មែរ​ពិបាក​ធ្វើ​ទៅ ឬ​បាន​ជា​មិន​ព្រម​ធ្វើ?

សម្រាប់​ លោក សួន សូរីដា ទោះបីកម្ពុជាត្រូវ​បាន​បំពាន​យ៉ាង​កំរោល​ពី​ទាហាន​ថៃ​យ៉ាង​ណាក៏​ដោ​យ នៅ​លើ​ឆាក​អន្តរ​ជាតិ​ជាក់​ស្តែង​វេទិការ​អង្គ​ការ​សហ​ប្រជាជាតិ​ថ្មីៗ​នេះ អត់​មាន​ប្រទេស​ណា​ជួយ​ឈឺ​ឆ្អាល​ដល់កម្ពុជា ឬ​ថ្កោល​ទោស​ថៃ​ឡើយ សូម្បី​វៀត​ណាម និង​ចិន​ក៏​គ្មាន​ដែរ។

ចំណែក​ មេដឹកនាំ​កម្ពុជា បន្ត​អត់​ធ្មត់​និង​ចាស់​ទុំរ​ហូត​ទាល់​តែ​អស់​ទឹក​ដី ហើយ​ថា រដ្ឋាភិបាល​បន្ត​លាក់​បាំង​ព័ត៌​មាន​ពីកា​របា​ត់​បង់​ភ្នំ​ទ្រព្យ ដើម្បីងា​យ​ស្រួល​ក្នុង​ការ​កាត់​ភ្នំ​ទ្រព្យ​ឱ្យ​ថៃ ដើម្បី​ដូរ​យក​សន្តិភាព​និង​អំណាច​។

យ៉ាងណា នាយករដ្ឋមន្ត្រីកម្ពុជា លោក ហ៊ុន ម៉ាណែត បាននិយាយ​លើហ្វេ​ស​ប៊ុក​កាល​ពី​ថ្ងៃ​ទី​២៦ខែ​កញ្ញា​ថា ការ​កំណត់​​បន្ទាត់​ព្រំដែន​គួរ​ទុក​លទ្ធ​ភាព​ឱ្យ​មន្ត្រី​ជំនាញ​កិច្ច​ការ​ព្រំដែន​ទាំង​ពីរ ដោះ​ស្រាយ​ការ​ខ្វែង​គំនិត​គ្នា យោង​តាម​MO​U​ឆ្នាំ​២០០០ ដែល​ភាគី​ទាំង​​ពីរ​បាន​ព្រម​ព្រៀង​គ្នា។

ក្នុង​ន័យ​នេះ លោ​ក​គូស​បញ្ជាក់​ថា ខណៈ​ពេល​ដែល​ប្រទេស​ទាំង​ពីរ​ មិន​ទាន់​កំណត់​ព្រំដែន​រួម​គ្នា ប្រជា​ជនទាំង​សង​ខាង​បាន​រស់​នៅ និង​ដាំ​ដុះ​​ដី​អស់​ជា​ច្រើន​ទស្សវត្សរ៍ នៅ​ក្នុង​តំបន់​ដែល​មិន​ទាន់​បាន​កំណត់​ព្រំ​ដែន​។ ប្រកា​រ​នេះ បាន​​នាំ​ឱ្យ​មាន​ជម្លោះ ឬកា​រ​ខ្វែង​គំនិត​គ្នា ដែល​ភាគី​ទាំង​ពីរ​អាច​ដោះ​ស្រាយ​ដោយ​មិត្ត​ភាព​តាម​រយៈ​គណៈ​កម្មា​ធិការ​ព្រំដែន​ទូទៅ (GBC) ហើយ​បាន​យល់​ព្រម​បញ្ជូន​បញ្ហា​ព្រំដែន​ដ៏​ស្មុគ​ស្មាញ​ទៅ​គណៈ​​កម្ម​ការ​ចម្រុះ​សម្រាប់​ការ​បោះ​បង្គោល​ព្រំដែន​គោក​(JBC) ដើម្បី​ដោះ​ស្រាយ​ ដោយ​អនុ​លោម​តាម​អនុ​ស្សរណៈ​នៃកា​រ​យោគ​យល់​គ្នា​ រវាង​រដ្ឋាភិបាល​នៃ​ព្រះរា​ជា​ណាច​ក្រ​កម្ពុជា និង​រដ្ឋាភិបាល​នៃ​ព្រះ​រាជា​ណា​ចក្រ​ថៃ និង​ចុះហ​ត្ថលេខា​លើ (MOU 2000) ។

លើសពីនេះ លោកថា ការ​បក​ស្រាយ​បំភ្លឺ​របស់​ក្រសួង​ការ​ពារ​ជាតិ​កម្ពុជា ពាក់​ព័ន្ធ​ករណី​តំបន់​ភូមិ​ជោគ​ជ័យ​ ឃុំ​អូរ​បី​ជាន់ ស្រុក​អូរ​ជ្រៅ ខេត្ត​បន្ទាយ​មាន​ជ័យ «បើ​ទោះជា​យើ​ង​ផ្អែក​លើផែ​ន​ទី​ក្រៅ​ផ្លូវ​ការ​ដែល​ប្រើ​ប្រាស់​ដោយ​ភាគី​ថៃ​ និង​ការ​ចុះ​ផ្ទៀង​ផ្ទាត់​ជាក់​ស្តែង​ជា​បឋម​នៅ​លើ​ដី​ គឺ​ឃើញ​ថា​មាន​ប្រជាពលរដ្ឋ​ថៃ​បាន​គ្រប់​គ្រង​ដី​ហួស​បន្ទាត់​ព្រំដែន​​ចូល​មក​ក្នុង​ដី​ខ្មែរ​ផង​ដែរ»។

ជុំវិញបញ្ហានេះ អ្នកច្បាប់និងជាអ្នកវិភាគឯករាជ្យ លោក វ៉ន​ ចាន់​ឡូត ចោទ​ជា​សំណួរ​ថា ​ដី​ផ្ទះ​លោក ហេង សំរិន អតី​តប្រ​ធាន​រដ្ឋសភា នៅមេ​ដឹក​នាំ​បក្ស​កាន់​អំណាច អា​កាត់​ថា ធ្វើ​ចូល​ដី​វៀត​ណាម ចុះ​ទម្រាំ​ភូមិ​ឋាន​ពលរដ្ឋ​ខ្មែរ?។ លោក​ថា ស្ងៀម​ស្ងាត់​មាន​ពីរ រក​មធ្យោបាយ​ការ​ពារ ឬ​រក​មធ្យោបាយ​ដោះ​សារ។

លើស​ពីនេះ​ លោក​សង្កត់​ធ្ងន់​ថា យោធា​ថៃ​នឹង​ដាក់​សម្ពាធ​ឱ្យ​មេដឹក​នាំ​ខ្មែរ ទទួល​ស្គាល់​ផែន​ទី​១​លើ​៥០ពាន់ ដែល​ថៃ​គូរ​ដោយ​ឯកតោភា​គី។ លោក​យ​ល់​ថា «ទាំង​កម្លាំង​ទ័ព និង​កម្លាំង​ទូត​កម្ពុជា កំពុង​ចាញ់​ប្រៀប​ថៃ។ ជម្រើស​មាន​តែ​មួយ​ទេ​សម្រាប់​កម្ពុជា គឺ​ប្រយុទ្ធ»៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ