ប្រធានាធិបតី ដូណាល់ ត្រាំ បានធានាគាំទ្រនាយករដ្ឋមន្ត្រីអ៊ីស្រាអ៊ែល លោក ប៊ែនចាមីន នេតាន់យ៉ាហ៊ូ កាលពីថ្ងៃចន្ទចំពោះសំណើរសន្តិភាពដែលឧបត្ថម្ភដោយសហរដ្ឋអាមេរិក ដើម្បីបញ្ចប់សង្រ្គាមជិតពីរឆ្នាំនៅតំបន់ហ្គាហ្សា ប៉ុន្តែសំណួរបានលេចឡើងថាតើក្រុមហាម៉ាស នឹងព្រមទទួលផែនការនេះដែរឬទេ។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី៣០ ខែកញ្ញា ឆ្នាំ២០២៥នេះថា ថ្លែងនៅក្នុងសន្និសីទសារព័ត៌មានរួមគ្នាមួយនៅសេតវិមាន បន្ទាប់ពីកិច្ចប្រជុំជាមួយ លោក នេតាន់ យ៉ាហូ(Netanyahu) ក្នុងនោះ លោក ត្រាំ បាននិយាយថា ‘‘ពួកគេលើសពីភាពស្និទ្ធស្នាល’’ ចំពោះកិច្ចព្រមព្រៀងសន្តិភាពដ៏កម្រមួយសម្រាប់ក្រុមប៉ាលេស្ទីន។ ដោយឡែក លោកបានព្រមានក្រុមឥស្លាមហាម៉ាសថា អ៊ីស្រាអ៊ែលនឹងមានការគាំទ្រពេញលេញពីសហរដ្ឋអាមេរិក ក្នុងការចាត់វិធានការណាមួយដែលខ្លួនយល់ថា ជាការចាំបាច់ប្រសិនបើពួកសកម្មប្រយុទ្ធហាម៉ាសបដិសេធនូវអ្វីដែលលោកបានផ្តល់ឱ្យ។
សេតវិមាន បានចេញឯកសារ២០ចំណុចដែលអំពាវនាវឱ្យមានបទឈប់បាញ់បន្ទាន់មួយ ក្នុងការផ្លាស់ប្តូរចំណាប់ខ្មាំងដែលឃុំឃាំងដោយក្រុមហាម៉ាស និងអ្នកទោសប៉ាឡេស្ទីនដែលឃុំឃាំងដោយអ៊ីស្រាអ៊ែល និងការដកទ័ពអ៊ីស្រាអ៊ែលពីតំបន់ហ្គាស្សា ការបន្ថយអាវុធ និងរដ្ឋាភិបាលអន្តរកាលដែលដឹកនាំដោយស្ថាប័នអន្តរជាតិ។
លោក ត្រាំ បានចូលរួមក្នុងកិច្ចប្រជុំ កាលពីថ្ងៃចន្ទ ដើម្បីយកឈ្នះលើការសង្ស័យរបស់លោក នេតាន់យ៉ាហ៊ូ(Netanyahu) ជុំវិញផ្នែកខ្លះនៃផែនការនេះ។ ប៉ុន្តែប្រភពថា វាមិនច្បាស់ភ្លាមៗទេថាតើរដ្ឋបាល លោក ត្រាំ និងអ៊ីស្រាអ៊ែល បានដោះស្រាយរាល់ភាពខុសគ្នារបស់ពួកគេ រួមទាំងលទ្ធភាពនៃរដ្ឋប៉ាឡេស្ទីននាពេលអនាគត ដែលលោក នេតាន់ យ៉ាហ៊ូ(Netanyahu) បានបដិសេធដោយបង្ខំ និងតួនាទីណាមួយសម្រាប់អាជ្ញាធរប៉ាឡេស្ទីនក្នុងការគ្រប់គ្រងក្រោយសង្រ្គាមនេះ។
យ៉ាងណា លោក ត្រាំ (Trump) បានថ្លែងអំណរគុណដល់ លោក នេតាន់យ៉ាហ៊ូ(Netanyahu) ‘‘សម្រាប់ការយល់ព្រមចំពោះផែនការនេះ និងភាពជឿទុកចិត្តថា ប្រសិនបើយើងធ្វើការជាមួយគ្នា យើងអាចនាំមកការបញ្ចប់នូវការបំផ្លិចបំផ្លាញដែលយើងបានឃើញអស់រយៈពេលជាច្រើនឆ្នាំ និងរាប់ទសវត្សរ៍មកនេះ’’៕
