នាយករដ្ឋមន្ត្រីប្រទេសម៉ារ៉ុក លោក អាស៊ីស អាខាន់ណុច បាននិយាយកាលពីថ្ងៃព្រហស្បតិ៍ថា លោកបានបើកកិច្ចពិភាក្សាដើម្បីបញ្ចប់ការតវ៉ារបស់យុវជន ខណៈដែលកងកម្លាំងសន្តិសុខបានរៀបចំបាតុកម្មសម្រាប់យប់ទី៦ ដែលបានបង្កើតទៅជាកុបកម្មទូទាំងប្រទេស។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី០៣ ខែតុលា ឆ្នាំ២០២៥នេះថា មនុស្សរាប់រយនាក់ ត្រូវបានចាប់ខ្លួន និងរងរបួស និងអគារជាច្រើនត្រូវបានរុះរើ រថយន្តត្រូវបានដុតបំផ្លាញតាំងពីការតវ៉ាបានចាប់ផ្តើមកាលពីថ្ងៃសៅរ៍ ដែលដំបូងឡើយជាការទាមទារឱ្យការអប់រំ និងការថែទាំសុខភាពកាន់តែប្រសើរ។
យ៉ាងណា ទោះបីជាមានហ្វូងមនុស្សមិនច្រើនក៏ដោយ ប៉ុន្តែការតវ៉ាដ៏ហិង្សានោះ កាន់តែខ្លាំងឡើង ដែលនាំឱ្យមានភាពចលាចលតាមដងផ្លូវដែលកាន់តែអាក្រក់នៅប្រទេសម៉ារ៉ុក(Morocco)។ បន្ថែមពីនេះ យប់ទី៥ នៃការតវ៉ា កាលពីថ្ងៃពុធ បាននាំឱ្យមានការស្លាប់ដែលត្រូវបានរាយការណ៍ដោយអាជ្ញាធរថា កងកម្លាំងសន្តិសុខបានបាញ់សម្លាប់យុវជន ៣នាក់ ដែលប្រដាប់ដោយអាវុធជាមួយនឹងកាំបិទ ព្យាយាមលួចអាវុធនៅទីក្រុងលីកលា(Lqliaa)។
ហេតុការណ៍នេះ បានកើតឡើងនៅពេលដែលមនុស្សប្រហែល ២០០នាក់បានវាយប្រហារលើស្ថានីយកងកម្លាំងសន្តិសុខ និងធ្វើឱ្យកងកម្លាំងសន្តិសុខរងរបួស ដោយកងកម្លាំងបានទប់ស្កាត់ជាលើកដំបូង ដោយការបាញ់ឧស្ម័នបង្ហូរទឹកភ្នែក និងការបាញ់ព្រមាន។
លោក អាខាន់ណុច(Akhannouch) បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលរបស់លោកបាន‘‘ចូលរួមជាមួយការទាមទារដែលបង្ហាញដោយចលនារបស់យុវជន’’ ហើយនិងបានត្រៀមខ្លួនរួចរាល់សម្រាប់‘‘ការសន្ទនានិងកិច្ចពិភាក្សា’’។
ការតវ៉ាដំបូងឡើយ បានចាប់ផ្តើមជាមួយការទាមទារឱ្យការអប់រំ និងការថែទាំសុខភាពកាន់តែប្រសើរ ដែលរៀបចំដោយយុវជនអនាមិកមួយក្រុម ដែលហៅខ្លួនឯងថា ជែនស្ស៊ី ២១២(GenZ 212) ដោយប្រើវេទិការអនឡាញដូចជា តិកតុក(TikTok) អ៊ីនស្តាក្រាម(Instagram)ជាដើម។
អ្នកនាំពាក្យក្រសួងមហាផ្ទៃ បាននិយាយថា ៧០%នៃអ្នកចូលរួមបំផ្លាញ និងប៉ះទង្គិចជាមួយកងសន្តិសុខទូទាំងប្រទេសម៉ារ៉ុក គឺជា អនីតិជន។ ក្រសួងបានបន្ថែមថា គិតត្រឹមថ្ងៃព្រហស្បតិ៍ ចំនួនអ្នករងរបួសបានកើនឡើងដល់ ៦៤០នាក់ រួមមាន ៥៨៩នាក់នៃកងសន្តិសុខ ថែមទាំងរថយន្តឯកជនចំនួន ១៩៥គ្រឿង រងការខូចខាតផងដែរ៕
