តុលាការព្រហ្មទណ្ឌថៃ សម្រេចផ្តន្ទាទោស លោក អេកាឡាក់ ផែណយ ឱ្យជាប់ទោសអស់មួយជីវិត ពីបទបាញ់សម្លាប់អតីតតំណាងរាស្រ្តបក្សប្រឆាំងកម្ពុជា លោក លិម គិមយ៉ា លើទឹកដីថៃ ការណ៍នេះ អ្នកតាមដានទាញភ្ជាប់ទៅនឹងគ្រួសារហ៊ុន ដោយសំអាងលើការជួយលាក់ជនសង្ស័យជាង៩ខែទៅនេះ។
ករណីដ៏រន្ធត់មួយនៅកណ្តាលទីក្រុងបាងកក ដែលជនជាតិថៃ ឈ្មោះ អេកាឡាក់ ផែណយ អតីតមន្ត្រីកងទ័ពជើងទឹកថៃ បានបាញ់សម្លាប់លោក លិម គិមយ៉ា អាយុ ៧៤ឆ្នាំ អតីតសមាជិកសភាគណបក្សសង្រ្គោះជាតិ។ ហេតុការណ៍នេះ បានកើតឡើងនៅចំណុចរង្វង់មូលផ្សារទំនើប១៣ ក្នុងសង្កាត់ខៅសាន ផ្លូវលេខ២ កាលពីថ្ងៃទី៧ ខែមករា ឆ្នាំ២០២៥។
សារព័ត៌មានថៃ ខាវសុត នៅថ្ងៃសុក្រនេះ បានរាយការណ៍ថា តាមការស្រាវជ្រាវរបស់ប៉ូលិសថៃ តាមរយៈភស្តុតាងវីដេអូ CCTV បានរកឃើញថា លោក ផែណយ បានប្រើប្រាស់អាវុធបាញ់សម្លាប់ លោក លិម គិមយ៉ា ពិតប្រាដកមែន គឺបទឃាតកម្មគិតទុកជាមុន និងការប្រើប្រាស់អាវុធក្នុងទីសាធារណៈ។
តាមភស្តុតាងខាងលើ លោក លិម គិមយ៉ា ត្រូវជនល្មើសជនជាតិថៃ បាញ់ចំនួន៣គ្រាប់ ចំខ្នង និងកណ្តាលដៃ ចំទ្រូងខាងឆ្វេង បណ្តាលឱ្យស្លាប់ភ្លាមៗនៅកណ្តាលទីក្រុងបាងកក ប្រទេសថៃ។
ការណ៍នេះ នៅថ្ងៃទី០៣ ខែតុលា ឆ្នាំ២០២៥នេះ តុលាការព្រហ្មទណ្ឌថៃ បានសម្រេចកាត់ទោស អេកាឡាក់ ផែណយ ឱ្យជាប់ពន្ធនាគារអស់មួយជីវិត ពីបទបាញ់សម្លាប់អតីតសមាជិកសភាគណបក្សសង្រ្គោះជាតិ លោក លិម គិមយ៉ា វ័យ៧៤ឆ្នាំ។
តុលាការនិយាយថា លោក អេកាឡាក់ ផែណយ ពិតជាបានបាញ់សម្លាប់ លោក លិម គិមយ៉ា គឺជាបទល្មើសឃាតកម្មគិតទុកជាមុន មានការរៀបចំជាប្រព័ន្ធ និងប្រើប្រាស់អាវុធនៅទីសាធារណៈ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលតាមដានរឿងនេះ បាននិយាយថា តុលាការថៃបានកាត់ទោសពលទាហានថៃម្នាក់ឲ្យជាប់ពន្ធនាគារអស់មួយជីវិត ពីបទបាញ់សម្លាប់ លោក លិម គិមយ៉ា អតីតតំណាងរាស្ត្រគណបក្សប្រឆាំង។
លោកគូសបញ្ជាក់ថា៖«គេសង្ស័យថា លោក ហ៊ុន សែន នៅពីក្រោយខ្នងឃាតកម្មលើលោក លិម គិមយ៉ា ដែលមូលហេតុនេះហើយ ទើបអាជ្ញាធរខ្មែរមិនព្រមចាប់ខ្លួន លី រតនៈរស្មី និង ពេជ្រ គឹមស្រ៊ីន ទៅឱ្យតុលាការថៃដើម្បីកាត់ទោស។ លី រតនៈរស្មី ជាទីប្រឹក្សារបស់លោក ហ៊ុន សែន »។
លើសពីនេះ អតីតមេដឹកនាំគណបក្សប្រឆាំង លោក សម រង្ស៊ី ក៏ធ្លាប់ដាក់ការសង្ស័យករណីឃាតកម្មសម្លាប់លោក លិម គិមយ៉ា លើទឹកដីថៃកាលពីជាង៩ខែមុននោះថា គ្រួសារហ៊ុននៅពីក្រោយឃាតកម្មនេះដូចគ្នា ខណៈក្រោយហេតុការណ៍បាញ់សម្លាប់ ខ្មាន់កាំភ្លើងជនជាតិថៃរូបនេះ បានរត់គេចចូលទឹកដីកម្ពុជាដោរលូន តែត្រូវបានចាប់បញ្ជូនត្រឡប់មកប្រទេសថៃវិញ។
តែយ៉ាងណា នាយករដ្ឋមន្ត្រីកម្ពុជា លោក ហ៊ុន ម៉ាណែត ធ្លាប់ចេញមុខបដិសេធ និងវាយបកវិញថា គណបក្សប្រឆាំងយកហេតុការណ៍នេះធ្វើជារបៀបវារៈនយោបាយ។
បើតាម លោក ហ៊ុន ម៉ាណែត បាននិយាយពីខេត្តពោធិ៍សាត់ កាលពីថ្ងៃទី២០ ខែមករា ឆ្នាំ២០២៥ថា បើរដ្ឋាភិបាលកម្ពុជានៅពីក្រោយឃាតកម្មនេះ កម្ពុជាមិនចាំបាច់បញ្ជូនឃាតករទៅឲ្យថៃនោះទេ។ លោក ទាមទាររកយុត្តិធម៌ជូនឪពុករបស់លោក គឺលោក ហ៊ុន សែន ដែលលោក សម រង្ស៊ី និងអ្នកនយោបាយប្រឆាំងឯទៀតបានចោទថាជាអ្នកនៅពីក្រោយខ្នងឃាតកម្មលើ លោក លិម គិមយ៉ា។
បន្ថែមពីនេះ លោកថា អ្នកនយោបាយប្រឆាំង បានយករឿងឃាតកម្ម លោក លិម គិមយ៉ា ជាអាជីវកម្មនយោបាយរួចទៅហើយ។
យ៉ាងណា ជាង៩ខែទៅនេះ ជនសង្ស័យ លី រតនៈរស្មី និងពេជ្រ គីមស្រ៊ីន ដែលតុលាការថៃ និងប៉ូលិសអន្តរជាតិ(អាំងទែប៉ូល)បានចេញនិវេទន៍ក្រហម និងដីកាឱ្យតាមចាប់ខ្លួន បញ្ជូនមកកាត់ទោសនៅប្រទេសថៃ សមត្ថកិច្ចកម្ពុជាមិនទាន់បានបញ្ចូនមកវិញនៅឡើយទេ។
ភាពចម្រូងចម្រាសនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត និយាយនៅថ្ងៃសុក្រនេះថា សំណុំរឿងនេះ ត្រូវបានកំណត់គោលដៅ ដាក់ការសង្ស័យថា មានពាក់ព័ន្ធនឹងលោក ហ៊ុន សែន ដែលបញ្ជានៅពីក្រោយខ្នងឃាតកម្ម ទៅលើ លោក លិម គិមយ៉ា ។
លោកសង្កត់ធ្ងន់ថា ទំនងដោយមូលហេតុនេះហើយ ទើបអាជ្ញាធរខ្មែរ មិនព្រមចាប់ខ្លួន លី រតនៈរស្មី និង ពេជ្រ គឹមស្រ៊ីន ទៅឲ្យតុលាការថៃ ដើម្បីកាត់ទោស ឬចាប់ខ្លួនផ្តន្ទាទោសនៅកម្ពុជា តាមផ្លូវច្បាប់យុត្តិធម៌ ដោយរំឭកថា លី រតនៈរស្មី កាលនោះគឺជាទីប្រឹក្សារបស់ លោក ហ៊ុន សែន មេដឹកនាំបក្សកាន់អំណាច៕
